មហាសេដ្ឋីល្បីឈ្មោះ១រូប ត្រៀមចូលរោងការក្នុងវ័យ៩២ឆ្នាំ
សហរដ្ឋអាមេរិក ៖ មហាសេដ្ឋីអាមេរិក លោក Rupert Murdoch ដែលជាម្ចាស់ក្រុមហ៊ុនប្រព័ន្ធផ្សព្វ
សហរដ្ឋអាមេរិក ៖ មហាសេដ្ឋីអាមេរិក លោក Rupert Murdoch ដែលជាម្ចាស់ក្រុមហ៊ុនប្រព័ន្ធផ្សព្វផ្សាយដ៏ធំរបស់សហរដ្ឋអាមេរិក News Corp បានប្រកាសភ្ជាប់ពាក្យជាផ្លូវការជាមួយនឹងគូស្នេហ៍របស់គាត់គឺលោកស្រី Ann Lesley Smith ដែលជាអតីតមន្ត្រីប៉ូលិស តារាម៉ូដែល និងជាអ្នកនិពន្ធបទចម្រៀងមួយរូបផងដែរ។
លោក Murdoch អាយុ៩២ឆ្នាំ និងលោកស្រី Smith អាយុ៦៦ឆ្នាំ បានជួបគ្នាលើកដំបូងកាលពីខែកញ្ញាឆ្នាំមុន នៅក្នុងកម្មវិធីមួយនៅឯចម្ការទំពាំងបាយជូររបស់លោក Murdoch ក្នុងរដ្ឋកាលីហ្វ័រញ៉ា។ លោក Murdoch បានប្រាប់កាសែត New York Post យ៉ាងដូច្នេះថា «ខ្ញុំខ្លាចធ្លាក់ក្នុងអន្លង់ស្នេហ៍ម្តងទៀត ប៉ុន្តែខ្ញុំដឹងថានេះជាលើកចុងក្រោយរបស់ខ្ញុំ ខ្ញុំពិតជារីករាយណាស់»។
លោក Murdoch បានចែកផ្លូវជាមួយប្រពន្ធទី៤របស់គាត់គឺលោកស្រី Jerry Hall កាលពីឆ្នាំមុន ខណៈដែលសា្វមីមុនរបស់លោកស្រី Smith គឺលោក Chester Smith ដែលជាតារាចម្រៀង និងជានាយកប្រតិបត្តិស្ថានីយវិទ្យុ និងទូរទស្សន៍ ដែលបានទទួលមរណភាពកាលពីឆ្នាំ២០០៨ នៅក្នុងអាយុ៧៨ឆ្នាំ។
លោកស្រី Smith បានប្រាប់កាសែត New York Post ថា «សម្រាប់យើងទាំង២ វាគឺជាអំណោយពីព្រះ។ យើងបានជួបគ្នាកាលពីខែកញ្ញាឆ្នាំមុន។ ខ្ញុំគឺជាស្ត្រីមេម៉ាយរយៈពេល១៤ឆ្នាំមកហើយ។ ដូច Rupert ដែរ ប្តីរបស់ខ្ញុំក៏ជាអ្នកជំនួញម្នាក់ផងដែរ ដូច្នេះបានចែករំលែកជំនឿ និងភាពដូចគ្នាច្រើន។
បន្ថែមពីលើនេះ លោក Murdoch ដែលមានកូន៦នាក់ ដែលបន្សល់ពីចំណងអាពាហ៍ពិពាហ៍៣លើកដំបូងរបស់គាត់បានបន្ថែមថា «យើងទាំង២នាក់ ទន្ទឹងរង់ចាំចំណាយពេលពាក់កណ្តាលទីពីរនៃជីវិតរបស់យើងជាមួយគ្នា»។
ពិធីមង្គលការរបស់លោក Murdoch និងលោកស្រី Smith នឹងប្រព្រឹត្តទៅនៅចុងរដូវក្តៅនេះ ហើយគូស្នេហ៍ចំណាស់មួយគូនេះ នឹងចំណាយពេលសម្រាប់ដំណើរកម្សាន្តនៅរដ្ឋកាលីហ្វ័រញ៉ា ម៉ុនតាណា ញូវយ៉ក រួមនិងចក្រភពអង់គ្លេសផងដែរ។
គួររំលឹកថា លោក Rupert Murdoch ធ្លាប់បានរៀបការ៤លើក ដោយលើកទី១ជាមួយលោកស្រី Patricia Booker អ្នកបម្រើការលើយន្តហោះជនជាតិអូស្ត្រាលី លើកទី២ជាមួយលោកស្រី Anna Mann អ្នកកាសែតដើមកំណើតស្កុតឡេន លើកទី៣ជាមួយលោកស្រី Wendi Deng សហគ្រិនជនជាតិចិន និងលើកទី៤ជាមួយលោកស្រី Jerry Hall តារាម៉ូដែល និងសម្តែងអាមេរិក៕
ចែករំលែកព័តមាននេះ