ទើបតែដឹងមូលហេតុអ្នកដែលស្លា.ប់… ក្រោយហូបសាច់ជ្រូកព្រៃឆៅនៅខេត្តកំពង់ធំ
រាជធានីភ្នំពេញ ៖ នៅថ្ងៃទី២៦ កញ្ញា នេះ ក្រសួងសុខាភិបាល
រាជធានីភ្នំពេញ ៖ នៅថ្ងៃទី២៦ កញ្ញា នេះ ក្រសួងសុខាភិបាល បានចេញសេចក្តីប្រកាសព័ត៌មានបញ្ជាក់ថា ករណីប្រជាពលរដ្ឋបានស្លាប់ ដោយសារការបរិភោគសាច់ជ្រូកព្រៃឆៅ កាលពេលកន្លងទៅនោះ គឺបណ្តាលមកពីសាច់ជ្រូកព្រៃនោះ មានដង្កូវព្រូន«ទ្រីស៊ីណែឡា» ។ គួររំលឹកថា រឿងហេតុលម្អិត… ករណីហូបសាច់សត្វព្រៃឆៅស្លាប់មនុស្ស៧នាក់យ៉ាងរន្ធត់
ក្រសួងសុខាភិបាលបានឱ្យដឹងទៀតថា បន្ទាប់ពីទទួលបានព័ត៌មានដែលប្រជាពលរដ្ឋជាច្រើនរូបបានស្លាប់ជាបន្តគ្នា នៅភូមិច្រកតោល ឃុំមានរិទ្ធ ស្រុកសណ្តាន់ ស្ថិតនៅតំបន់ព្រៃឡង់ ក្នុងខេត្តកំពង់ធំនោះ ក្រសួងបានចាត់ក្រុមការងារឆ្លើយតបបន្ទាន់របស់នាយកដ្ឋានប្រយុទ្ធនឹងជំងឺឆ្លង រួមជាមួយមជ្ឈមណ្ឌលជំនាញនានា ដោយសហការជាមួយមន្ទីរសុខាភិបាលខេត្តកំពង់ធំ និងតំណាងអង្គការសុខភាពពិភពលោក បានចុះទៅស្រាវជ្រាវបន្ទាន់ ដល់ទីតាំងកើតហេតុហើយរកឃើញថា ករណីដង្កូវព្រូន«ទ្រីស៊ីណែឡា» នេះ កំពុងកើតមាននៅទីតាំងខាងលើ ។
ក្រសួងសុខាភិបាលបញ្ជាក់ថា ជំងឺដង្កូវព្រូន «ទ្រីស៊ីណែឡា» គឺជាជំងឺមួយដែលចម្លងមកមនុស្ស តាមរយៈការបរិភោគសាច់ឆៅ ឬសាច់ចម្អិនមិនឆ្អិនល្អ ដែលសាច់នោះមានដង្កូវព្រូនទ្រីស៊ីណៃឡា ដែលមានរោគសញ្ញាដំបូង រួមមាន ក្អួតចង្អោរ រាករូស អស់កម្លាំង និងគ្រុនក្តៅ ហើយឈឺពោះ អំឡុងពី១ ទៅ២ថ្ងៃ បន្ទាប់ពីឆ្លងដង្កូវព្រូនទ្រីស៊ីណែឡា ចូលមកក្នុងខ្លួនមនុស្សយើង ។ អ្នកដែលមានដង្កូវព្រូនទ្រីស៊ីណែឡា ក្នុងរយៈទី២ ទៅ៨សប្តាហ៍ បន្ទាប់ពីការបរិភោគសាច់ ដែលមានដង្កូវព្រូននេះ នឹងចាប់ផ្តើមឈឺក្បាល គ្រុនក្តៅ ក្អក ហើមមុខ ដៃ ជើង និងត្របកភ្នែក ឈឺសន្លាក់និងសាច់ដុំ រមាស់ស្បែក រាក ឬទល់លាមកជាដើម ។
បន្ទាប់មកទៀត នឹងកើតមានរោគសញ្ញាធ្ងន់ធ្ងរ ដូចជាពិបាកធ្វើចលនា និងបង្ករបញ្ហាដល់បេះដូងនិងដង្ហើម ដែលបណ្តាលមកពីការរាតត្បាតនៃដង្កូវព្រូននេះ នៅក្នុងសេរីរាង្គមនុស្ស ដូចជាសួត បេះដូង ថ្លើម និងខួរក្បាល នឹងអាចបណ្តាលឱ្យស្លាប់បាន។ភ្ជាប់គ្នានេះ ក្រសួងសុខាភិបាលអះអាងថា ករណីជំងឺដង្កូវព្រូន «ទ្រីស៊ីណែឡានេះ គឺអាចព្យាបាលបានដោយសាមញ្ញនិងមានប្រសិទ្ធភាព ខណៈដែលឆ្លងមកទទួលការព្យាបាលឱ្យបានឆាប់ ហើយក្នុងករណីអ្នកភូមិច្រកតោល ឃុំមានរិទ្ធ ស្រុកសណ្តាន់ មានរោគសញ្ញាដូចដែលក្រសួងបានបញ្ជាក់ សូមប្រញាប់រួសរាន់មកមណ្ឌលសុខភាព ឬមន្ទីរពេទ្យដែលនៅជិតផ្ទះដើម្បីទទួលបានការព្យាបាលទាន់ពេលវេលា ។
ចែករំលែកព័តមាននេះ