កម្ពុជាត្រៀមឈានទៅកាត់បន្ថយការនាំចូលអគ្គិសនីពីប្រទេសជិតខាង
រាជធានីភ្នំពេញ ៖ កម្ពុជាកំពុងត្រៀមឈានទៅកាត់បន្ថយតម្រូវការផ្គត់ផ្គង់អគ្គិសនីពីប្រទេសជិតខាងនាពេលដ៏ខ្លីខាងមុខ ហើយ
រាជធានីភ្នំពេញ ៖ កម្ពុជាកំពុងត្រៀមឈានទៅកាត់បន្ថយតម្រូវការផ្គត់ផ្គង់អគ្គិសនីពីប្រទេសជិតខាងនាពេលដ៏ខ្លីខាងមុខ ហើយពង្រីកការចែកចាយ និងប្រើប្រាស់អគ្គិសនីឲ្យបានកាន់ច្រើននៅក្នុងក្របខ័ណ្ឌទូទាំងប្រទេស បន្ទាប់ពីដាក់ឱ្យដំណើរការជាផ្លូវការនូវទំនប់វារីអគ្គិសនីសេសានក្រោម២ ស្ថិតនៅខេត្តស្ទឹងត្រែង នាដើមឆ្នាំ២០១៨ ខាងមុខ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consuting បានមានប្រសាសន៍កាលពីថ្ងៃទី២៥ កញ្ញា ម្សិលមិញថា ៖« កម្ពុជាអាចចូលរួមកាត់បន្ថយការពឹងផ្អែកការនាំចូលអគ្គិសនីពីប្រទេសជិតខាង ហើយមួយផ្សេងទៀតតាមខ្ញុំដឹង តម្លៃអគ្គិសនីនឹងធ្លាក់ចុះមកតាមផែនការ ជាពិសេស សម្រាប់សហគ្រាសធ្វើប្រតិបត្តិការអាជីវកម្មនៅពេលយប់ ។ នេះជាសញ្ញាល្អសម្រាប់ប្រទេសណា ក៏ដូចប្រទេសណា » ។
បើតាមលោក ង៉ែត ជូ ថា នៅពេលវារីអគ្គិសនីសេសានក្រោម២ ដាក់ឱ្យដំណើរការនាពេលខាងមុខ វិស័យណាដែលប្រើប្រាស់អគ្គិសនីច្រើនជាងគេនឹងរីកចម្រើន ដូចជា វិស័យកម្មន្តសាលទូទៅ និងកាត់ដេរជាដើម ។
លោកបន្តថា ការផ្គត់ផ្គង់អគ្គិសនីនាពេលកន្លងមក លោកមើលឃើញមានបញ្ហាចំនួន៣ គឺតម្លៃអគ្គិសនី, តំបន់មួយចំនួនពុំទាន់មានអគ្គិសនី និងភាពអាចជឿជាក់បាន ឬស្ថិរភាព។ តួយ៉ាង ថ្មីៗនេះ នៅខេត្តបាត់ដំបង រោងម៉ាស៊ីនកិនស្រូវ ដែលត្រូវការអគ្គិសនីច្រើនក្នុងរដូវប្រមូលផល គឺមានការដាច់ចរន្តអគ្គិសនីជាញឹកញាប់ ។ ប៉ុន្តែបើដល់ឆ្នាំ២០១៨ខាងមុខ ពេលវារីអគ្គិសនីសេសានក្រោម២ ដាក់ដំណើរការអាចជួយកាត់បន្ថយបាននូវបញ្ហានេះ ។ វាជារឿងល្អប្រសើរបំផុតសម្រាប់អាជីវកម្មដែលមានស្រាប់ ហើយគុណភាពអាចនឹងប្រសើរឡើងផងដែរ ។
ថ្លែងនៅក្នុងពិធីបិទទ្វារទំនប់វារីអគ្គិសនីសេសានក្រោម២ កាលពីថ្ងៃទី២៥ កញ្ញា សម្តេច តេជោ ហ៊ុន សែន នាយករដ្ឋមន្ត្រី បានបញ្ជាក់ថា ៖« កម្ពុជាសព្វថ្ងៃកំពុងប្រើប្រាស់អគ្គិសនីជាង២ពាន់មេហ្គាវ៉ាត់រួចហើយ នាពេលខាងមុខ តម្រូវការអគ្គិសនីនឹងកើនខ្ពស់ ។ ពីមុនការផ្គត់ផ្គង់អគ្គិសនីមានលក្ខណៈបណ្តោះអាសន្នប៉ុណ្ណោះ ព្រោះត្រូវទិញពីប្រទេសជិតខាង ប៉ុន្តែចាប់ពីពេលដំណើរការវារីអគ្គិសនីពីទីនេះទៅ គឺកម្ពុជាមានបណ្តាញផ្គត់ផ្គង់ខ្លួនឯងប្រកបដោយស្ថិរភាព និងឯករាជ្យភាព ។ យើងមិនត្រឹមតែផ្គត់ផ្គង់សម្រាប់ខេត្តស្ទឹងត្រែងទេ គឺនឹងឆ្លងទៅផ្គត់ផ្គង់នៅខេត្តផ្សេងៗទៀត»៕
ចែករំលែកព័តមាននេះ