រាជធានីភ្នំពេញ ៖ សេចក្តីរាយការណ៍ឱ្យដឹងថា ស្ត្រីដែលត្រូវជាប្រពន្ធបុរសឃាតករសម្លាប់កូនស្រីបង្កើត ហើយតាមទៅសម្លាប់ឪពុកក្មេកនៅក្នុងមន្ទីរពេទ្យខេត្តស្វាយរៀងនោះ កាលពីថ្ងៃទី០៥ កញ្ញា បានធ្វើដំណើរមកកាន់រាជធានីភ្នំពេញ ដើម្បីផ្តល់បទសម្ភាសន៍ជាច្រើន ពាក់ព័ន្ធជាមួយប្តីដែលមានចិត្តតរិច្ឆាននេះ ។
សេចក្តីរាយការណ៍បន្តថា ស្ត្រីខាងលើឈ្មោះ ពេជ្រ សាខុន អាយុ២៧ឆ្នាំ ជាកម្មការិនីរោងចក្រ រស់នៅភូមិទន្លៀង ឃុំរមាំងថ្កោ ស្រុកស្វាយទាប ខេត្តស្វាយរៀង ។ នាងអះអាងថា ខ្លួនត្រូវជាប្រពន្ធរបស់ឈ្មោះអន សំណាង អាយុ២៦ឆ្នាំ (ជាឃាតករ) ។ រីឯកូនស្រីឈ្មោះពេជ្រ ចរិយា អាយុ២ខួប៦ខែ (ស្លាប់) និងឪពុកបង្កើតឈ្មោះ ពេជ្រ ជឿន អាយុ៥៧ឆ្នាំ (ស្លាប់) ។
ពាក់ព័ន្ធហេតុការណ៍ដ៏រន្ធត់ខាងលើនេះ ស្ត្រីជាប្រពន្ធបានរៀបរាប់ទាំងទឹកភ្នែកថា នាងបានស្គាល់បុរសជាប្ដីតាមរយៈទូរស័ព្ទ ក្រោយមកក៏ស្រឡាញ់គ្នា និងបានរៀបការតាមប្រពៃណី ។ ប៉ុន្តែតាំងពីចាប់ដៃគ្នាមក ប្ដីមិនដែលប្រកបរបររកស៊ីចិញ្ចឹមជីវិត និងផ្គត់ផ្គង់គ្រួសារទេ គឺដេកស៊ីនៅផ្ទះឱ្យឪពុកម្ដាយគាត់ និងប្រពន្ធជាអ្នករកស៊ីចិញ្ចឹម ។ ពេលខ្លះ ប្តីវាយធ្វើបាបនាងនិងគ្រួសារទៀតព្រោះខឹងម្ហូបមិនឆ្ងាញ់ ។
គាត់បន្តថា មុនពេលកើតហេតុ សម្លាប់កូននិងឪពុកនាង គឺកាលពីថ្ងៃទី២៩ សីហា ប្ដីបានចាប់រំលោភម្ដាយនាង ហើយប៉ុនប៉ងសម្លាប់គាត់តែមិនបានសម្រេច ។ ពេលនោះ ម្ដាយនាងបានទៅប្ដឹងសមត្ថកិច្ចឃុំ តែមិនបានចាប់ជនសង្ស័យជាប្ដីនាងមកផ្ដន្ទាទោសទេ ដោយសម្អាតថា គ្មានភស្តុតាង ។ ពេលនាងត្រឡប់មកពីធ្វើការរោងចក្រវិញ នាងបានដឹងរឿង ក៏ឈ្លោះជាមួយប្ដី ប្ដីនាងក៏យកកូនស្រី (ក្មេងស្រីរងគ្រោះ) មកភ្នំពេញស្នាក់នៅជាមួយប្អូនថ្លៃនាង (ត្រូវជាប្អូនបង្កើតជនសង្ស័យ) ។
លុះដល់ថ្ងៃទី០២ កញ្ញា ប្ដីនាងបានសម្លាប់កូនស្រី នៅវេលាម៉ោងប្រមាណ៩ព្រឹក ហើយបានធ្វើដំណើទៅស្វាយរៀង ទៅជួបឪពុកនាងកំពុងសម្រាកនៅមន្ទីរពេទ្យ។ ពេលទៅដល់ ប្ដីនាងបានទះស្មាឪពុកនាង រួចយកដៃខ្ទប់មាត់គាត់ជាប់ ហើយគ្រាទៅដល់បន្ទប់ទឹក ក៏ច្របាច់.កគាត់ ជ្រមុជក្បាលចូលធុងទឹក ហើយដាក់គាត់លើចានបង្គន់ យកជើងធាក់គាត់ពីក្រោយខ្នងផ្ទប់នឹងចានបង្គន់ធ្វើឲ្យផតដើមទ្រូង និងបែកគ្រាប់ពោនស្លាប់។ រឿងនេះ ពេលដែលនាងចេញពីធ្វើការវិញម៉ោង៤និង២០នាទីទើបដឹង ។
ស្ត្រីជាប្រពន្ធបានលើកដៃសំពះ សុំឱ្យសប្បុរសជនមេត្តាជួយជាបច្ច័យខ្លះ ដើម្បីនាងបានយកទៅធ្វើបុណ្យឱ្យកូនស្រី និងឪពុកនាងបានសមរម្យផង។ អាស្រ័យហេតុនេះ សូមទាក់ទងមកកាន់លេខគាត់រយៈទូរសព្ទលេខ 097 793 8492 ។
ចែករំលែកព័តមាននេះ