តារាកំប្លែងប្រុសល្បីឈ្មោះ៣ដួង ពោលពាក្យយ៉ាងមានអត្ថន័យសម្រាប់ទិវានារីអន្តរជាតិ ៨មីនា
- ភ្នំពេញ
រាជធានីភ្នំពេញ ៖ តារាកំប្លែងជួរមុខនៅកម្ពុជាចំនួន៣ដួង បានលាតត្រដាងអារម្មណ៍ផ្សេងៗពីគ្នាជុំវិញអត្ថន័យនៃទិវាសិទ្ធិនារីអន្តរជាតិ ៨មីនា ដោយក្នុងនោះតារាកំប្លែងយើងបានពោលថា ក្តីស្រលាញ់មិនមែនមានតែថ្ងៃ ៨មីនាឡើយ ខណៈតារាកំប្លែងប្រុសផ្សេងទៀតពោលថា វាជាថ្ងៃបង្ហាញនូវការគោរពដឹងគុណដល់ឪពុកម្តាយផងដែរ។
ប្រាកដណាស់ នៅដែលនិយាយដល់តារាកំប្លែងល្បីទាំង៣ដួងនេះ ប្រាកដជាប្រិយមិត្តអ្នកតាមដានចង់ដឹចង់លឺហើយថា តើនៅថ្ងៃ ៨មីនា ដែលជាទិវានារីអន្តរជាតិ បុរសទាំង៣ដួង នឹងទម្លាយអារម្មណ៍អ្វីខ្លះសម្រាប់មនុស្សជាទីស្រឡាញ់ និងក្រុមគ្រួសារយ៉ាងដូចម្តេច? តើតារាទាំង៣ដួងនោះជានរណា?។
សម្រាប់កម្ពុជា ក៏បានរៀបចំពិធីអបអរសាទរទិវាអន្តរជាតិនារី ៨ មីនា លើកទី១១២ ក្នុងឆ្នាំ២០២៣នេះ ក្រោមប្រធានបទ «ស្ត្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល»។ ការប្រារព្ធពិធីអបអរសាទរទិវាអន្តរជាតិនារីក្រោមប្រធានបទនេះ មានគោលបំណងបន្តរំលេចពីតម្លៃនៃការចូលរួមរបស់ស្ត្រី ដែលមិនអាចកាត់ថ្លៃបាន ក្នុងការថែរក្សាសុខសន្តិភាព ក៏ដូចជាកំពុងចូលរួមយ៉ាងសកម្ម ក្នុងការពន្លឿនកិច្ចអភិវឌ្ឍលើគ្រប់វិស័យ។ ពិធីអបអរសាទរទិវាអន្តរជាតិនារី ៨មីនា ត្រូវបានពិភពលោកប្រារព្ធធ្វើឡើងជារៀងរាល់ឆ្នាំ ដើម្បីរំលឹកនូវការតស៊ូ និងគំរូវីរភាពរបស់នារីៗក្នុងការទាមទារសិទ្ធិសេរី និងគេចផុតពីទង្វើជិះជាន់នានា។
ងាកមក តារាកំប្លែងបុរសទាំង៣ដួងវិញ យើងក៏បានសាកសួរពីចំណាប់អារម្មណ៍របស់តារាកំប្លែងខ្លះៗ ដូចជា តារាកំប្លែងនាយ ពាក់មី នាយ គ្រឿន និងនាយពាង ជាដើម ថា តើចំណាប់របស់ពួកគាត់បែបណាក្នុងថ្ងៃពិសេសមួយនេះ?។
តាមរយៈបទសម្ភាសន៍ជាមួយសារព័ត៌មានកោះសន្តិភាព តារាកំប្លែងនាយ ពាក់មី មានឈ្មោះពិត ចែម ចាន់ដារ៉ា បានទម្លាយអារម្មណ៍ទាំងបែបនេះថា សម្រាប់ថ្ងៃ៨មីនា លោកគិតថាថ្ងៃនេះល្អ ដោយក្នុងនាមជាស្វាមីម្នាក់ ត្រូវតែមានអ្វីអោយភរិយា ធ្វើរឿងអ្វីដែលល្អៗ និយាយពាក្យផ្អែមល្ហែមចំពោះមនុស្សជាទីស្រឡាញ់ សម្រាប់គ្រួសារ ជាំពិសេសម្តាយ ភរិយា និងកូនៗ។
តារាកំប្លែង នាយពាក់មី បានបន្តថា ទិវា៨មីនា ក៏ជាថ្ងៃដែលយើងគួរតែបង្ហាញនូវភាពកតញ្ញូ និងធ្វើអ្វីល្អៗសម្រាប់អ្នកមានគុណ ដោយយើងត្រូវទិញរបស់អ្វីដែលឆ្ងាញ់ៗអោយគាត់ពិសារទាន់គាត់នៅមើលឃើញ នៅពិសារកើត កុំចាំដល់បាត់បង់ទើបស្តាយក្រោយ។ ត្រង់នេះ មានន័យថា បុណ្យទាន់ខែភ្លឺ ទាន់អ្នកមានគុណលោកនៅមានជីវិត និងនៅអាចទទួលទានបាន។ ជាចុងក្រោយសម្រាប់លោក ក្នុងនាមជាអ្នកសិល្បៈមួយរូប លោកក៏ជូនពរអោយស្ត្រីគ្រប់រូបជួបប្រទះអ្វីដែលសមបំណង ជាពិសេសជួបបុរសល្អៗក្នុងជីវិត និងទទួលបានសុខសុភមង្គលក្នុងក្រុមគ្រួសារ។
ចំណែកតារាកំប្លែងនាយគ្រឿនវិញ ក៏បានពោលពីអារម្មណ៍របស់លោកថា សម្រាប់លោកនិងក្រុមគ្រួសារប្រពន្ធកូនថ្ងៃណា ក៏ជាថ្ងៃល្អដែរ។ មានន័យថា លោកមិនមែនធ្វើល្អដល់អ្នកមានគុណ និងក្រុមគ្រួសារតែមួយថ្ងៃនោះទេ។ ពេលខ្លះអាចមានបញ្ហាល្អក់កករបន្តិចជាមួយគ្រួសារ តែលោកនៅចាត់ទុកថាវាជាថ្ងៃល្អ ព្រោះការស្រឡាញ់មើលថែគ្នាមិនមែនតែមួយថ្ងៃនេះទេ ពោលគឺស្រឡាញ់គ្នាអស់មួយជីវិត។ សម្រាប់ថ្ងៃ ៨មីនា ដែលជាទិវាសិទ្ធិនារីអន្តរជាតិ លោកក៏ជូនពរដល់អ្នកគាំទ្ររបស់លោក មហាជន និងក្រុមគ្រួសារលោក ឱ្យពើបប្រទះរឿងល្អៗ ជាពិសេសការចេះគោរពគ្នា ចេះអធ្យាស្រ័យអត់អោនអោយគ្នា ទើបទទួលបានសុខសុភមង្គល។
លើសពីនេះ តារាកំប្លែងនាយ គ្រឿន បានពោលថា សម្រាប់លោកផ្ទាល់ថ្ងៃ៨មីនា លោករវល់ជាប់ថត ប៉ុន្តែលោកក៏ពុំភ្លេចថ្ងៃនោះដែរ។ បន្ថែមពីនេះ តារារូបនេះ ពិតជារីករាយជាខ្លាំងដែលនាពេលបច្ចុ ប្បន្ន ស្ត្រីត្រូវបានគេអោយតម្លៃលើកកម្ពស់ស្មើនឹងបុរស ដោយស្ត្រីជាកម្លាំងចលករនៅក្នុងសង្គម និងប្រទេសជាតិ ដូច្នេះសង្គមជាតិមួយមានការអភិវឌ្ឍចាំបាច់ត្រូវការស្ត្រី។
សម្រាប់តារាកំប្លែងនាយ ពាង វិញ លោកក៏បាននិយាយថា ថ្ងៃ៨មីនា ដែលជាទិវានារីអន្តរជាតិជាថ្ងៃមួយដែលពិតជាអស្ចារ្យខ្លាំងណាស់សម្រាប់មនុស្សស្ត្រី ដែលជាថ្ងៃមួយរបស់ស្ត្រីនៅជុំវិញពិភពលោកទទួលបានសេរីភាព បញ្ឍប់ការរើសអើង ជាពិសេសលើកកម្ពស់ស្រី្តដែលជាមាតាពិភពើលោក។ លើសពីនេះ ក្នុងនាមលោកជាសិល្បៈមួយរូប លោកជូនពរអោយស្ត្រីដែលជាមាតាពិភពលោក ជួបតែភាពសុខដុមរមនា សម្រស់កាន់តែស្រស់ ជាពិសេសទទួលបានសុខសុភមង្គលក្នុងក្រុមគ្រួសារ។
គួររលឹកផងដែរថា សម្រាប់ថ្ងៃពិសេសនេះ តារាទាំង៣ដួងនេះ ហាក់ដូចជាកាន់តែមមាញឹកជាមួយការងាររបស់ខ្លួន ដោយរកពេលសម្រាប់គ្រួសារសឹងតែពុំបាន ប៉ុន្តែតារាទាំង៣រូបនេះក៏ពុំភ្លេចថ្ងៃពិសេសដ៏ល្អមួយនេះដែរ ពោលគឺថែមទាំងបានទម្លាយអារម្មណ៍ល្អៗ ពាក្យពេចន៍ផ្អែមល្ហែមសម្រាប់ក្រុមគ្រួសារទៀតផង៕ ដោយ ៖ លីហួ គីមឆាយ
ចែករំលែកព័តមាននេះ