ស្ទឹងបយ៉ាខា ក្លាយទៅជាល្អក់កករជិត១ឆ្នាំហើយ
ខេត្តប៉ៃលិន ៖ រហូតមកដល់ថ្ងៃទី១៧ ខែសីហា ឆ្នាំ២០១៧ ប្រជាពលរដ្ឋជាច្រើនគ្រួសារ ដែលរស់នៅប្រកបរបរតាមដងស្ទឹងបយ៉ាខា កំពុងស្ថិតនៅក្នុងការ
ខេត្តប៉ៃលិន ៖ រហូតមកដល់ថ្ងៃទី១៧ ខែសីហា ឆ្នាំ២០១៧ ប្រជាពលរដ្ឋជាច្រើនគ្រួសារ ដែលរស់នៅប្រកបរបរតាមដងស្ទឹងបយ៉ាខា កំពុងស្ថិតនៅក្នុងការលំបាកវេទនា ដោយសារការជួបប្រទះនឹងបញ្ហាទឹកស្ទឹងល្អក់កករ អស់រយ:ពេលជាង៨ខែកន្លងមកហើយ បន្ទាប់ពីអាជ្ញាធររៀបចំឈូសឆាយធ្វើផ្លូវក្រវាត់ព្រំដែន ។ បញ្ហាទឹកស្ទឹងល្អក់នេះ មិនមែនតែពេលមេឃភ្លៀងប៉ុណ្ណោះឡើយ តែនៅពេលអត់មានភ្លៀង ក៏ទឹកស្ទឹងនេះល្អក់កករដែរ ដូច្នេះធ្វើឱ្យពួកគាត់ដាច់ចិត្តទិញទឹកតាមរថយន្តយកមកប្រើប្រាស់ប្រចាំថ្ងៃយ៉ាងត្រដាបត្រដួស ។
ប្រជាពលរដ្ឋបានបង្ហើបឱ្យដឹងថា ពួកគាត់ពិតជាមានការលំបាកយ៉ាងខ្លាំង ដោយសារខ្វះទឹកប្រើប្រាស់ប្រចាំថ្ងៃ ហើយត្រូវចំណាយលុយកាក់ជាច្រើនទៅលើការទិញទឹកប្រើប្រាស់ និងយកមកទទួលទានផងដែរ ។ កាលពីមុនពួកគាត់អាចដងទឹកស្ទឹងដ៏ថ្លាយង់នេះ យកមកច្រោះផឹកជួបជុំគ្រួសារ និងអាចបោកសំលៀកបំពាក់ ដាំបាយ ស្រោចស្រពដំណាំថែមទៀតផង ។ ប៉ុន្តែអស់រយៈពេលជិត១ឆ្នាំមកនេះ ខណៈកងវិស្វកម្មឈូសឆាយធ្វើផ្លូវក្រវាត់ព្រំដែនចេញពីខេត្តប៉ៃលិន ឆ្ពោះទៅស្រុកសំឡូតខេត្តបាត់ដំបង ក៏ក្លាយទៅជាល្អក់បែបនេះ ទោះជាមានភ្លៀង ឬអត់ភ្លៀងក៏មិនថ្លាដែរ ឃើញសុទ្ធតែភក់ជ្រាំហូរជាបន្តបន្ទាប់រាល់ថ្ងៃតែម្តង ។
បច្ចុប្បន្ន ពលរដ្ឋរាប់សិបគ្រួសារដែលរស់នៅក្បែរដងស្ទឹងបយ៉ាខា ត្រូវចំណាយថវិកាមួយចំនួនទៅលើទឹកប្រើប្រាស់ ដូច្នេះហើយទើបធ្វើឱ្យពួកគាត់រស់នៅកាន់តែលំបាកខ្លាំងឡើងៗ ។ ចំណែកអ្នកខ្លះទៀតសុខចិត្តតភ្ជាប់សេវាទឹកស្អាត អស់ថវិកាមួយជាន់ទៀត ។ លើសពីនេះទឹកស្ទឹង ដែលហូរពីលើក៏បន្តទៅប៉ះពាល់ដល់ស្រុកមួយចំនួនក្នុងខេត្តបាត់ដំបងផងដែរ ។
ពាក់ព័ន្ធទៅនឹងបញ្ហានេះ លោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា ៖ មូលហេតុទឹកស្ទឹងបយ៉ាខាល្អក់កករបែបនេះ ដោយសារតែខាងកងវិស្វកម្មយកគ្រឿងចក្រឈូសឆាយធ្វើផ្លូវក្រវាត់ព្រំដែនកម្ពុជា-ថៃ ពីប៉ៃលិន ឆ្ពោះទៅទិសខាងត្បូងឈាងខាងលិច រហូតដល់ស្រុកសំឡូតខេត្តបាត់ដំបង ។
លោកបន្តទៀតថា ៖ ការល្អក់ទឹកស្ទឹងនេះ មានរយ:ពេលយូរប្រហែលជារហូតដល់ធ្វើផ្លូវរួចរាល់ ទើបអាចឱ្យប្រជាពលរដ្ឋប្រើប្រាស់ទឹកស្ទឹងសារជាថ្មីឡើងវិញ ៕
ចែករំលែកព័តមាននេះ