ទីបំផុតសមត្ថកិច្ចបានដីកាឆែកឆេរ ឃ្លាំងរថយន្តមួយនេះហើយ
រាជធានីភ្នំពេញ ៖ កម្លាំងគណៈបញ្ជាការឯកភាព ខណ្ឌដង្កោ ដោយមានការចូលរួមសហការណ៍ពីសំណាក់កម្លាំងនគរបាលព្រហ្មទណ្ឌកម្រិតស្រាល
រាជធានីភ្នំពេញ ៖ កម្លាំងគណៈបញ្ជាការឯកភាព ខណ្ឌដង្កោ ដោយមានការចូលរួមសហការណ៍ពីសំណាក់កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ កម្លាំងគយ ជាពិសេសមានការចូលរួមពីសំណាក់ លោក កុល បុណ្យ ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងមានដីកាឆែកឆេរត្រឹមត្រូវថែមទៀតផង។ បានបន្តចុះទៅឆែកឆេរទីតាំងបញ្ចាំរថយន្ត និងស្តុករថយន្តមួយកន្លែង ដែលមានទីតាំងស្ថិតនៅក្នុងភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ កាលពីវេលាម៉ោង៩ព្រឹក ថ្ងៃទី១៧ ខែសីហា ឆ្នាំ២០១៧នេះ ពេលនោះបានរកឃើញរថយន្តចំនួន៣៣គ្រឿង ប៉ុន្តែនៅពេលត្រួតពិនិត្យបានដឹងថាមានឯកសារ និងច្បាប់គ្រប់គ្រាន់ទាំងអស់។
នគរបាលបានឲ្យដឹងថា ទីតាំងទទួលបញ្ចាំរថយន្ត និងស្ដុករថយន្តមួយនោះ មានម្ចាស់ឈ្មោះ ឃឹម យ៉ូត ភេទប្រុស ហើយទីតាំងនោះត្រូវបានសង្ស័យថា ជាទីតាំងខុសច្បាប់គ្មានអាជ្ញាប័ណ្ណត្រឹមត្រូវ និងជាជម្រកនៃបទល្មើស ត្រូវបានកម្លាំងគណៈបញ្ជាការឯកភាពខណ្ឌដង្កោ ចុះទៅត្រួតពិនិត្យ និងឆែកឆេរម្ដងរួចមកហើយ កាលពីថ្ងៃទី១៦ ខែសីហា ឆ្នាំ២០១៧។ ប៉ុន្តែត្រូវទទួលការបរាជ័យ ដោយសារតែកម្លាំងមិនបានចូលទៅដល់ក្នុងទីតាំងនោះទេ បានត្រឹមនៅតែខាងក្រៅតែប៉ុណ្ណោះ ព្រោះខណៈនោះពុំមានការឯកភាពពីព្រះរាជអាជ្ញាអមសាលាដំបូងរាជធានីភ្នំពេញ ទើបកម្លាំងមិនហ៊ានចូលទៅឡើយ ម្យ៉ាងទៀតម្ចាស់ក៏បានគេចវេសមិនព្រមសហការណ៍ដែរ។ កម្លាំងខាងលើបានត្រឹមតែស្ថិត នៅខាងមុខទីតាំងមួយនោះតាំងពីព្រឹក រហូតដល់វេលាល្ងាចទើបសម្រេចដកកម្លាំងខ្លះ និងទុកមួយចំនួនឲ្យនៅយាមការពារ ព្រោះខ្លាចម្ចាស់ ឬបុគ្គលណាមួយចូលទៅដឹកវត្ថុតាងចេញពីទីនោះអស់។
ប្រភពខាងលើបានបន្តទៀតថា រហូតដល់វេលាព្រឹកថ្ងៃបន្ទាប់ គឺថ្ងៃទី១៧ ខែសីហា កម្លាំងគណៈបញ្ជាការឯកភាពខណ្ឌខាងលើលែងឯកោទៀតហើយ ព្រោះបានការចូលរួមសហការណ៍ពីសំណាក់កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ កម្លាំងគយ។ ជាពិសេមានការចូលរួមពីសំណាក់ លោក កុល បុណ្យ ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងមានដីកាឆែកឆេរត្រឹមត្រូវថែមទៀតផង ក៏បានបន្តធ្វើការឆែកឆេរទីនោះជាបន្តទៀត ហើយរហូតដល់វេលាម៉ោង១១និង១៥នាទីព្រឹកថ្ងៃដដែល ទើបម្ចាស់ទៅបើកទ្វារឲ្យចូលទៅត្រួតពិនិត្យ។ នគរបាលបានឲ្យដឹងបន្តទៀតថា ក្រោយពេលចូលទៅដល់បានឃើញមានរថយន្តចំនួន៣៣គ្រឿង ក្នុងនោះភាគច្រើនជាប្រភេទរថយន្តស៊េរីទំនើបៗ ហើយក៏មានរថយន្តធុនធំដឹកទំនិញផងដែរ ពេលនោះកម្លាំងសមត្ថកិច្ចជំនាញបានធ្វើការត្រួតពិនិត្យឃើញថា រថយន្តទាំងនោះមានឯកសារគ្រប់គ្រាន់ទាំងអស់។
ប៉ុន្តែអ្វីដែលបានបង្កើតឲ្យមានការសង្ស័យដំបូងនោះគឺដោយសារតែទីតាំងមួយនេះ បិទទ្វារចោលទាំងយប់ទាំងថ្ងៃ ហើយមានដាក់ស្លាកប្រកាសលក់បិតជាប់មាត់ទ្វារតែម្ដង ចំណែលម្ចាស់ទីតាំងមិនបានសហការណ៍តាំងពីដំបូងមកឡើយ។ ទោះបីបែបណាទាល់តែពិនិត្យឃើញជាក់ស្ដែងទើបអស់មន្ទិលសង្ស័យព្រោះការធ្វើបែបនេះគឺជាការទប់ស្កាត់បទល្មើសនៅក្នុងមូលដ្ឋានផងដែរ ហើយកុងស៊ីបញ្ចាំរថយន្តឬម៉ូតូប្រសិនបើគ្មានច្បាប់ត្រូវតែបិទចោល ហើយម្ចាស់នឹងត្រូវប្រឈមនឹងទោសទណ្ឌថែមទៀតផង៕
ចែករំលែកព័តមាននេះ