រាជធានីភ្នំពេញ ៖ តារាសម្តែងនាង នី មុន្នីនាថ បានបង្ហាញតម្រុយពីទំនាក់ទំនងកាន់តែល្អរវាងនាង និងគូស្នេហ៍នៅឯនាយសមុទ្រកាន់តែយល់ចិត្តគ្នាខ្លាំង បន្ទាប់ពីភ្ជាប់ទំនាក់ទំនងគ្នាអស់រយៈពេលប៉ុន្មានឆ្នាំចុងក្រោយនេះ បើទោះបីជានាងនៅមិនទាន់បង្ហើបពីគម្រោងរៀបការក៏ដោយ។
កន្លងមក តារាសម្តែងស្រី ដែលពូកែបង្ហូរទឹកភ្នែករូបនេះ បានទទួលស្គាល់ថា នាងកំពុងតែភ្ជាប់ទំនាក់ទំនងស្នេហ៍ជាមួយបុរសអាណិកជនមួយរូប ដែលរស់នៅប្រទេសអូស្ត្រាលី ខណៈពេលដែលទំនាក់ទំនងនេះក៏ត្រូវបានចាស់ទុំទាំងសងខាងដឹងលឺផងដែរ។
យ៉ាងណា ទោះបីជាស្រីស្អាត នី មុន្នីនាថ សារភាពថា មានគូស្នេហ៍នាពេលនេះក៏ដោយ ប៉ុន្តែរហូតមកទល់នាពេលនេះ នាងហាក់នៅមិនទាន់បង្ហាញគម្រោងរៀបការនាអំឡុងពេលណាមួយនៅឡើយទេ បើទោះបីជាចំណងរបស់នាងកំពុងតែមានភាពកាន់តែល្អប្រសើរក៏ដោយ។
ជាថ្មីម្តងទៀត តារារូបនេះក៏បានបង្ហាញតម្រុយបន្ថែមទៀតពីចំណងស្នេហ៍របស់នាងកាន់តែមានការយល់ចិត្តគ្នា និងស្រឡាញ់គ្នាខ្លាំងថែមទៀត ក្នុងពេលដែលអ្នកទាំងពីរក៏បានខិតខំពុះពារនូវឧបសគ្គមួយចំនួន រហូតឈានមកដល់ដំណាក់កាលនាពេលនេះ។
នី មុន្នីនាថ បានបញ្ចេញសំណេរពាក់ព័ន្ធចំណងស្នេហ៍របស់នាងនៅលើគណនីហ្វេសប៊ុករបស់ខ្លួនកាលពីពេលថ្មីៗនេះថា «ស្គាល់គ្នាកាន់តែយូរ ស្រលាញ់គ្នាកាន់តែខ្លាំង ចិត្តស្រលាញ់មិនដែលថយចុះសោះឡើយ អាចមានឈ្លោះគ្នាខ្លះ មិនយល់ពីគ្នាខ្លះ ខឹងគ្នាខ្លះមែន តែយើងក៏អាចឆ្លងកាត់វាជាមួយគ្នាទាល់តែបាន អរគុណដែលចូលមកផ្ដល់ក្ដីសុខក្នុងជីវិតខ្ញុំ»។
តាមរយៈសំណេរដែលបានបង្ហោះខាងលើនេះ គេឃើញ មានមហាជន ជាពិសេសបណ្តាអ្នកគាំទ្ររបស់នាងជាច្រើនបានចូលទៅធ្វើការខំមិន ដោយបានសម្តែងការសាទរនៅពេលដែលឃើញនាងអាចរកឃើញគូស្នេហ៍ពិត ខណៈពេលគេរំពឹងថា នាងនឹងអាចចូលរោងការនាពេលឆាប់ៗខាងមុខនេះ។
ជាការកត់សម្គាល់កន្លងមក ស្រីស្អាត នី មុន្នីនាថ ហាក់មិនបានលាក់លៀមពីចំណងស្នេហ៍ឆ្លងសមុទ្ររបស់នាងនាពេលនេះឡើយ ក្នុងពេលដែលនាងនិងគូស្នេហ៍បានកសាងទំនាក់ទំនងជាមួយគ្នាអស់ជាច្រើនឆ្នាំ។
ស្រីស្អាត នី មុន្នីនាថ បានលើកឡើងថា ទំនាក់ទំនងរបស់ពួកនាងកាន់តែមានភាពល្អប្រសើរពីមួយថ្ងៃទៅមួយថ្ងៃ ហើយគូស្នេហ៍របស់នាងក៏បានចុះមកលេងស្រុកខ្មែរជាច្រើនលើកហើយដែរ ហើយអ្នកទាំងពីរក៏មានគម្រោងធ្វើការជាមួយគ្នាច្រើនផងដែរ។ នាងបញ្ជាក់ថា ទោះបីជាមិនបានជួបមុខគ្នាផ្ទាល់រាល់ថ្ងៃក៏ពិតមែន ប៉ុន្តែនាងនឹងគូស្នេហ៍តែងជួបជជែកគ្នាតាមប្រពន្ធអ៊ីនធើរណែតមិនដែលខានឡើយ។
យ៉ាងណា បើតាមស្រីស្អាត នី មុន្នីនាថ ថា នាថ្ងៃអនាគត ប្រសិនបើនាងពិតជាបានចូលរោងការតាមប្រពៃណីនោះ នាងនឹងចេញទៅរស់នៅជាមួយគូស្នេហ៍នៅក្នុងទឹកដីប្រទេសអូស្ត្រាលីមួយរយៈ ហើយនៅពេលដែលនាងទទួលបានសញ្ញាតិហើយនោះ នាងនឹងត្រឡប់មកធ្វើការរកស៊ីនៅស្រុកខ្មែរវិញ៕
ចែករំលែកព័តមាននេះ