រាជធានីភ្នំពេញ ៖ តាមសេចក្តីរាយការណ៍បឋមនៅវេលាម៉ោងប្រហែលជា៩និង៣០នាទីព្រឹកថ្ងៃទី១០ សីហា នេះមានកម្មករ-កម្មការនីប្រមាណជា២០០នាក់ក្នុងចំណោមជាង១.០០០នាក់បាននាំគ្នាដង្ហែជាក្បួនតវ៉ាទៅកាន់សាលាសង្កាត់ចោមចៅ ស្ថិតនៅសួនឧស្សាហកម្មកាណាឌីយ៉ាង ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ។
តាមប្រភពព័ត៌មានបានឱ្យដឹងថា ការដង្ហែក្បួននេះគឺតវ៉ាប្រឆាំងទៅនឹងការប្តឹងរបស់ថៅកែរោងចក្រ International Royal ដែលបានប្តឹងតំណាងសហព័ន្ធសហជីពមិត្តភាពកម្ពុជាម្នាក់ឈ្មោះ ប៊ូ ថេត ពីបទ ជ្រៀតជ្រែកការងារផ្ទៃក្នុង ។ សម្រាប់ការដង្ហែក្បួនទៅកាន់សាលាសង្កាត់ចោមចៅនេះ គឺកម្មករ-កម្មការនីទាំងនោះចង់ទាមទារឱ្យថៅកែរោងចក្រខាងលើដកពាក្យបណ្តឹងដែលបានប្តឹងឈ្មោះ ប៊ូ ថេត វិញ ដោយកម្មករ-កម្មការនីអះអាងថា ឈ្មោះ ប៊ូ ថេត គឺការពារផលប្រយោជន៍របស់ពួកគាត់ ។
ក្រោយពីបានលើកក្បួនដង្ហែទៅកាន់សាលាសង្កាត់រួចមក ក្រុមកម្មករ-កម្មការនីក៏បានលើកគ្នាដង្ហែបន្តទៅកាន់នាយកដ្ឋានអន្តោប្រវេសន៍ ដែលមានទីតាំងស្ថិតនៅតាមបណ្តោយផ្លូវសហព័ន្ធរុស្ស៊ី ទល់មុននឹងអាកាសយានដ្ឋានអន្តរជាតិភ្នំពេញ ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ដើម្បីស្នើសុំក៏ដូចជារកដំណោះស្រាយចំពោះបញ្ហាពាក្យបណ្តឹងរបស់ថៅកែរោងចក្រខាងលើ ៕
ចែករំលែកព័តមាននេះ