តារាសម្តែងនាង តាន់ សុផា ឬ ជេ ស៊ីកា បានធ្វើការឆ្លើយតបយ៉ាងចាក់ដោតទៅកាន់មហាជនមួយចំនួន ដែលនាំគ្នារិះគន់ទៅលើរូបភាពប្រម៉ូតមួយដែលតារាស្រីរូបនេះ ដោះអាវថតជាមួយនឹងតារាប្រុសម្នាក់ ដែលមើលទៅសិចស៊ី និងត្រូវបានគេចែកចាយ
រាជធានីភ្នំពេញ ៖ តារាសម្តែងនាង តាន់ សុផា ឬ ជេ ស៊ីកា បានធ្វើការឆ្លើយតបយ៉ាងចាក់ដោតទៅកាន់មហាជនមួយចំនួន ដែលនាំគ្នារិះគន់ទៅលើរូបភាពប្រម៉ូតមួយដែលតារាស្រីរូបនេះ ដោះអាវថតជាមួយនឹងតារាប្រុសម្នាក់ ដែលមើលទៅសិចស៊ី និងត្រូវបានគេចែកចាយពេញបណ្តាញសង្គម។
រូបភាពដែលស្រីស្អាត ជេ ស៊ីកា ថតឱបរឹត និងបែបសិចស៊ីជាមួយតារាសម្តែងប្រុសលោក ប៉ែន ភក្រ័សុធារិទ្ធ ត្រូវបានចែកចាយពេញបណ្តាញសង្គម TikTok ហើយក៏ត្រូវបានចុះផ្សាយតាមបណ្តាញសារព័ត៌មាននៅក្នុងស្រុកមួយចំនួនផងដែរ។ ការផ្សព្វផ្សាយរូបភាពដ៏សិចស៊ីរបស់ ជេ ស៊ីកា នាពេលនេះ ក៏ត្រូវបានមហាជនមួយចំនួននាំគ្នាចូលទៅរិះគន់យ៉ាងចាស់ដៃចំពោះតារាស្រីរូបនេះ ដោយគេយល់ថា ដើម្បីបានភាពល្បីល្បាញ និងលុយអ្វីៗក៏នាងអាចហ៊ានធ្វើបានដែរ។
ការរិះគន់ខាងលើនេះ ក៏បានក្លាយជាប្រធានបទក្តៅមួយផងដែរ នៅក្នុងបណ្តាញសង្គមហ្វេសប៊ុក ហើយវាស្ទើរតែក្លាយជាជម្លោះ និងការវា.យប្រ.ហារគ្នាដោយពាក្យសម្តីទៅវិញទៅមកសម្រាប់អ្នករិះគន់ និងបណ្តាអ្នកគាំទ្ររបស់ស្រីស្អាត ជេ ស៊ីកា។
ទោះជាយ៉ាងណា ជាមួយនឹងការរិះគន់ខាងលើនេះ តារាសម្តែងដែលចូលចិត្តសម្ញែងភាពសិចស៊ី នាង ជេ ស៊ីកា ក៏បានចេញមុខឆ្លើយតបយ៉ាងចាក់ដោតមួយ ដោយនៅក្នុងនោះនាងបានចាត់ទុកការបញ្ចេញភាពសិចស៊ីតាមបែបសិល្បៈរបស់នាងនាពេលនេះ គឺធ្វើឡើងតាមតួនាទីជាតារាសម្តែងមួយរូប ហើយវាមិនបានធ្វើឲ្យផ្លាស់ប្តូរផ្នត់គំនិតអ្នកស្រឡាញ់វប្បធម៌នោះដែរ។
តាមរយៈបណ្តាញសង្គមហ្វេសប៊ុកស្រីស្អាត ជេ ស៊ីកា បានបង្ហោះសារដោយអមជាមួយនឹងរូបសិចស៊ីដែលទទួលការរិះគន់នេះថា «អរគុណ សម្រាប់ការរិះគន់ចំពោះខ្ញុំ ការងារអ្វីក៏មានតម្លៃរបស់វាដែរ មិនថាតូចឬធំ។ សួរថា នរណាដែលមិនខំធ្វើការដើម្បីប្រាក់ ខ្ញុំស្រលាញ់ការងារជាតារាសម្ដែងនេះ តែខ្ញុំច្បាស់ពីតួនាទីរបស់ខ្ញុំ»។
នាងបញ្ជាក់ថា «ខ្ញុំមានសតិសម្បជញ្ញៈ ដឹងខុសត្រូវពីអ្វីដែលគួរធ្វើ និងមិនគួរ។ ខ្ញុំគិតថា ការសម្ដែងរបស់ខ្ញុំ ក៏មិនបានធ្វើឲ្យបងប្អូនដែលស្រលាញ់វប្បធម៌ ផ្លាស់ប្ដូរគំនិតមកឈប់ស្រលាញ់វប្បធម៌វិញដែរ សូមបើកចិត្តឲ្យទូលាយ ខ្ញុំសមត្ថភាពរបស់ខ្លួន»។
ជាការកត់សម្គាល់ ការបញ្ចេញរូបភាពបែបសិចស៊ីរបស់តារាសម្តែងនាង ជេ ស៊ីកា នាពេលនេះ មិនមែនជាលើកទីមួយទេ សម្រាប់នាង ពោលគឺកន្លងមក តារារូបនេះក៏តែងតែបង្ហាញរូបភាពបែបសិចស៊ីលេងស្ទីលប្លែកៗបង្ហោះតាមបណ្តាញសង្គមជាបន្តបន្ទាប់ ខណៈពេលដែលរូបភាពរបស់នាងក៏ទទួលបានការចាប់អារម្មណ៍យ៉ាងខ្លាំងផងដែរពីមហាជន។ ជេ ស៊ីកា ក៏ត្រូវបានគេចាត់ទុកថា ជាតារាស្រីមួយរូបដែលហ៊ានថតឈុតបែបសិចស៊ីម្នាក់ផងដែរ។ ជេ ស៊ីកា បានសាងភាពល្បីល្បាញនៅក្នុងវិថីសិល្បៈនៅក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីរូបនាងបានបង្ហាញវត្តមានសម្តែងរឿងភាគទូរទស្សន៍ រឿងខ្លី សម្តែងក្នុង MV និងថតស្ពតពាណិជ្ជកម្មនានាជាបន្តបន្ទាប់ស្ទើរមិនដាច់សូរ៕
ចែករំលែកព័តមាននេះ