ខេត្តសៀមរាប ៖ កូនប្រុសអកត្តញ្ញូម្នាក់បានយកកាំបិតខ្វែវទៅកាប់ប្រហារលើឪពុកបង្កើតដាច់បំពង់.ក កាលពីវេលាម៉ោង០៣ និង៣០នាទីទៀបភ្លឺ ឈានចូលថ្ងៃទី០១ សីហា នេះ ស្ថិតលើគ្រែដេក ក្នុងភូមិគ្រួស សង្កាត់ស្វាយដង្គំ ក្រុងសៀមរាប ក្រោយពីឪពុកបានស្តីបន្ទោសតែប៉ុណ្ណោះ ។
ប្រភពពីសមត្ថកិច្ចឱ្យដឹងថា បុរសជាឪពុកឈ្មោះឈឿន ឈឿម អាយុ៦៦ឆ្នាំ រស់នៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។ ចំណែកជនសង្ស័យជាកូនបង្កើតឈ្មោះឈឿន សម្បត្តិ អាយុ២៦ឆ្នាំ ស្នាក់នៅជាមួយគ្នាក្នុងភូមិកើតហេតុខាងលើ។ សមត្ថកិច្ចឃាត់ខ្លួនបាន រួមទាំងកាំបិតខ្វែវមួយនៅកន្លែងកើតហេតុប្រលាក់ទៅដោយឈាម ។
សមត្ថកិច្ចបន្តថា មូលហេតុឈានដល់ជនសង្ស័យលើកដៃសម្លាប់ឪពុកខ្លួននោះ គឺដោយសារខឹងឪពុកស្តីបន្ទោសឱ្យនៅពេលល្ងាច ហើយណាមួយជនសង្ស័យមិនសូវគ្រប់សតិផង ទើបរូបគេមានចិត្តគុំគួនលើឪពុកក៏ដេកចាំដល់មានឱកាស ទើបសម្លាប់តែម្តង។បច្ចុប្បន្ន ជនសង្ស័យនិងវត្ថុតាង ត្រូវបានកម្លាំងការិយាល័យព្រហ្មទណ្ឌកំរិតធ្ងន់ កំពុងសួរនាំនិងរៀបចំកសាងសំណុំរឿងបញ្ជូនទៅតុលាការនៅថ្ងៃទី០១ សីហា ចាត់ការតាមច្បាប់ ។
ចែករំលែកព័តមាននេះ