ស្ថាប័ន3ចាប់ផ្តើមរៀបចំយុទ្ធសាស្ត្រអភិវឌ្ឍន៍វិស័យវាយនភ័ណ្ឌ
រាជធានីភ្នំពេញ ៖ សមាគមរោងចក្រកាត់ដេរនៅកម្ពុជា ហៅកាត់ថា GMAC ក្រសួងសេដ្ឋកិច្ចនិងហិរញ្ញវត្ថុ និងអង្គការពលកម្មអន្តរជាតិ នៃគម្រោងរោងចក្រកាន់តែប្រសើរ (ILO-BFC) រួមសហការ
រាជធានីភ្នំពេញ ៖ សមាគមរោងចក្រកាត់ដេរនៅកម្ពុជា ហៅកាត់ថា GMAC ក្រសួងសេដ្ឋកិច្ចនិងហិរញ្ញវត្ថុ និងអង្គការពលកម្មអន្តរជាតិ នៃគម្រោងរោងចក្រកាន់តែប្រសើរ (ILO-BFC) រួមសហការគ្នាធ្វើពង្រាងយុទ្ធសាស្ត្រអភិវឌ្ឍន៍វិស័យកាត់ដេរ និងស្បែកជើងកម្ពុជា ក្នុងរយៈពេលវែងពីឆ្នាំ២០១៨-២០២៥ ។
យោងតាមសេចក្តីប្រកាសព័ត៌មានរួមរវាងGMAC និងក្រសួងសេដ្ឋកិច្ច និងហិរញ្ញវត្ថុ ដែលទទួលបាននាព្រឹកថ្ងៃទី៣១ កក្កដា ឲ្យដឹងថា សេចក្តីព្រាងផែនការយុទ្ធសាស្ដ្រ២០១៨-២០២៥ នឹងផ្តោតសំខាន់លើបញ្ហាប្រឈមសំខាន់ៗនៃឧស្សាហកម្មនេះដូចជា បញ្ហាធាតុចូល និងតម្លៃថ្លៃដើមខ្ពស់, ទំនាក់ទំនងឧស្សាហកម្ម, ផលិតកម្ម និងសមត្ថភាពផលិត, បរិយាកាសអាជីវកម្មបរិស្ថាន, បញ្ហាខាងក្រៅនិងការប្រកួតប្រជែង ។ គោលនយោបាយនេះធ្វើឡើងដើម្បីរក្សាកំណើនខ្ពស់ បង្កើនគុណភាពផលិតផលក្នុងផ្នែកឧស្សាហកម្ម យ៉ាងហោចណាស់ ឲ្យបាន៥០%នៅត្រឹមឆ្នាំ២០២៥ ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរកម្ពុជា បាននិយាយថា វាគឺជាកម្លាំងចលករថ្មីមួយសម្រាប់ឧស្សាហកម្មនេះមានយុទ្ធសាស្ត្រច្បាស់លាស់ និងជាគោលនយោបាយឆ្លើយតបក្នុងការរក្សាកំណើនរបស់ខ្លួន ក៏ដូចជាបង្កើនធនធានមនុស្សនៃឧស្សាហកម្មនេះ ដើម្បីបង្កើតឱ្យមានការប្រកួតប្រជែងកាន់តែខ្លាំងឡើង ។
លោកបន្តថា ៖« វាជាការងាររួមគ្នារវាងរាជរដ្ឋាភិបាល GMAC និង ILO-BFC ។ យើងអាចនិយាយបានថា រាជរដ្ឋាភិបាលកំពុងខិតខំប្រឹងប្រែងបង្កើតនូវគោលនយោបាយយុទ្ធសាស្ត្ររយៈពេលវែងនេះ ដើម្បីគាំទ្រ និងអភិវឌ្ឍវិស័យកាត់ដេរ និងស្បែកជើងឲ្យមានកំណើនប្រកបដោយស្ថិរភាព ។ សមាគមរោងចក្រកាត់ដេរកម្ពុជា សូមកោតសរសើរដល់កិច្ចប្រឹងប្រែងរបស់រាជរដ្ឋាភិបាលលើបញ្ហានេះ » ។
យោងតាមអគ្គនាយកដ្ឋានគយ និងកាត់ដេរកម្ពុជា (GDCE) បានឱ្យដឹងថា ការនាំចេញសម្លៀកបំពាក់ និងស្បែកជើងរបស់កម្ពុជា បានកើនឡើង៦.៨០០លានដុល្លារកាលពីឆ្នាំ២០១៥ ដល់៧.៣០០លានដុល្លារនៅឆ្នាំ២០១៦ ស្មើនឹងកំណើន៧,២% ។
លោក កាំង ម៉ូនីកា បន្តទៀតថា ៖«គោលនយោបាយចម្បងនេះ នឹងជួយកាត់បន្ថយនូវការចំណាយថ្លៃដើមខ្ពស់ និងបង្កើនប្រសិទ្ធភាពឧស្សាហកម្ម ដែលរួមបញ្ចូលការអភិវឌ្ឍជំនាញ ដើម្បីបង្កើនខ្សែសង្វាក់ផលិតកម្ម និងផលិតភាពផលិតកម្ម ។ គោលនយោបាយនេះ ក៏នឹងផ្តោតសំខាន់ទៅលើការកែលម្អនូវទំនាក់ទំនងវិជ្ជាជីវៈ ដោយនាំមកនូវបរិយាកាសផលិតកម្មមានស្ថិរភាព និងសន្តិភាព ក្នុងន័យកាត់បន្ថយចំណាយ » ។
ការស្ទង់មតិនៃពង្រាងនេះ បានចាប់ផ្តើមប្រហែល៣សប្តាហ៍មុនរួចមកហើយ ។ បច្ចុប្បន្ន វាត្រូវបានគេរៀបចំឡើងដើម្បីប្រមូលព័ត៌មាន និងទិន្នន័យគ្រប់គ្រាន់ជាមូលដ្ឋានសម្រាប់យុទ្ធសាស្ត្រ ។
បើយោងតាមយុទ្ធសាស្ដ្រ ឆ្នាំ២០១៨-២០២៥នេះ ក៏នឹងផ្តោតលើនិន្នាការសកលលោក និងឱកាសនៃឧស្សាហកម្មកាត់ដេរ បានបន្តដាក់សម្ពាធបន្ថែមទៀតលើឧស្សាហកម្មកាត់ដេរ និងស្បែកជើងរបស់កម្ពុជា ហើយវិធានការយុទ្ធសាស្ត្រ គឺត្រូវរៀបចំជាពិសេស ដើម្បីដោះស្រាយបញ្ហាប្រឈមទាំងនោះ ដោយពិចារណាអំពីរយៈពេលខ្លី និងមធ្យម ក៏ដូចជាទស្សនវិស័យរយៈពេលវែង ។
វិស័យនេះ នៅតែជាផ្នែកសំខាន់បំផុតនៃការនាំចេញរបស់កម្ពុជា ដោយការនាំចេញសម្លៀកបំពាក់ និងស្បែកជើង មានចំនួន៧៨%នៃការនាំចេញសរុបរបស់ប្រទេសនៅឆ្នាំ២០១៦ ។
យោងតាមទិន្នន័យពីសមាគមរោងចក្រកាត់ដេរកម្ពុជា (GMAC) បច្ចុប្បន្ន សមាគមនេះ មានសមាជិកចំនួន៥១២ ដោយក្នុងចំណោម៥៩ក្នុងវិស័យស្បែកជើង ហើយវិស័យនេះបានស្រូបយកការងារជាង៧០ម៉ឺននាក់ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ដែលបានធ្វើការជិតស្និទ្ធលើបញ្ហានេះ ថ្លែងថា គោលនយោបាយនេះមានសារសំខាន់ណាស់ដើម្បីធ្វើឲ្យមានសុខដុមនីយកម្មក្នុងវិស័យនេះ និងឲ្យភាគីអ្នកបញ្ជាទិញ ម្ចាស់រោងចក្រ និងកម្មករ និយោជិតអាចធ្វើការរួមគ្នា និងកុំចង្អុលដាក់គ្នាតទៅទៀត ។
លោកបន្តថា ៖« វាយនភ័ណ្ឌកាត់ដេរ និងស្បែកជើង នៅតែជាវិស័យតំណាងឲ្យការនាំចេញដ៏ធំរបស់កម្ពុជា សម្រាប់ទ្រទ្រង់សេដ្ឋកិច្ចជាតិ » ។ លោកបន្តថា ៖« ទាំងរាជរដ្ឋាភិបាល វិស័យឯកជន និងអ្នកពាក់ព័ន្ធ សុទ្ធតែយល់ពីសារសំខាន់ និងធ្វើយ៉ាងណា ពូនជ្រុំវិស័យនេះឲ្យរីកចម្រើនតទៅទៀត ដើម្បីធ្វើជាមូលដ្ឋានគ្រឹះ មុននឹងកម្ពុជាឈានទៅកាន់ប្រទេសប្រើប្រាស់កម្លាំងជំនាញ និងឧស្សាហកម្ម » ៕
ចែករំលែកព័តមាននេះ