កំណត់ត្រាថ្មី! ក្លិបនៅ EPL ចាយជិត១ពាន់លានដុល្លារ ក្នុងទីផ្សារដោះដូរខែមករានេះ
អង់គ្លេស ៖ ក្លិបនៅលីគកំពូលអង់គ្លេស English Premier League (EPL) បានចាយប្រាក់យ៉ាងច្រើន
អង់គ្លេស ៖ ក្លិបនៅលីគកំពូលអង់គ្លេស English Premier League (EPL) បានចាយប្រាក់យ៉ាងច្រើន
អង់គ្លេស ៖ ក្លិបនៅលីគកំពូលអង់គ្លេស English Premier League (EPL) បានចាយប្រាក់យ៉ាងច្រើនសន្ធឹកសន្ធាប់ពោលគឺជិត ៨០០លានផោន ស្មើនឹងប្រមាណ ៩៨៤លានដុល្លារអាមេរិក ដោយបំបែកកំណត់ត្រា លើការផ្ទេរកីឡាករ នៅក្នុងប្រវត្តិសាស្ត្រទីផ្សារដោះដូរកីឡាករខែមករា នៅក្នុងបាល់ទាត់ប្រទេសអង់គ្លេស។
Chelsea ក្លាយជាក្លិបចាយលុយច្រើនបំផុត នៅទីផ្សារដោះដូរខែមករានេះ ដែលនៅក្នុងថ្ងៃចុងក្រោយ ពួកគេបានចុះហត្ថលេខាលើខ្សែបម្រើកណ្តាលអាហ្សង់ទីន Enzo Fernandez ពីក្លិប Benfica ក្នុងតម្លៃ ១០៥លានផោន ដែលបានប្រកាសកាលពីថ្ងៃទី៣១ មករា កន្លងទៅ។ សេចក្តីថ្លែងការណ៍ក្លិប Benfica បញ្ជាក់ថា កិច្ចព្រមព្រៀងត្រូវបានធ្វើឡើងរវាងក្លិប Chelsea សម្រាប់ការផ្ទេរកីឡាករម្ចាស់មេដាយមាសព្រឹត្តិការណ៍ World Cup 2022 វ័យ២២ឆ្នាំរូបនេះ ដែលបានចុះហត្ថលេខាលើកុងត្រារយៈពេល៨ឆ្នាំកន្លះ នៅទឹក Stamford Bridge។
កិច្ចព្រមព្រៀងនេះ បានបំបែកតម្លៃកំណត់ត្រា ការផ្ទេរក្នុងតម្លៃខ្ពស់បំផុតនៅ Premier League របស់ក្លិប Manchester City ដែលចាយ ១០០លានផោន នាំយកខ្សែបម្រើប្រយុទ្ធ Jack Grealish ពីក្លិប Aston Villa នៅក្នុងឆ្នាំ ២០២១។
ចាប់តាំងពីការកាន់កាប់របស់ក្រុមហ៊ុនវិនិយោគ ដែលដឹកនាំដោយមហាសេដ្ឋីអាមេរិក លោក Todd Boehly កាលពីឆ្នាំមុន រហូតមកទល់ពេលនេះ Chelsea បានចាយប្រាក់លើផ្ទេរកីឡាករសរុបជាង ៥០០លានផោន យ៉ាងភ្ញាក់ផ្អើលបំផុត។ ខណៈដែលត្រឹមពេញ១ខែ ខែមករានេះ ពួកគេចាយជាង ៣០០លានផោនរួចទៅហើយ។
នៅក្នុងថ្ងៃជាមួយគ្នានោះ ក្លិបកាំភ្លើងធំ Arsenal បានបញ្ចប់ការចុះហត្ថលេខាដ៏ភ្ញាក់ផ្អើលរបស់ពួកគេ នាំយកខ្សែបម្រើប្រេស៊ីល Jorginho ពីក្លិប Chelsea ដែលជាគូប្រជែង នៅក្នុងតម្លៃ ១០លានផោន ជាមួយកុងត្រារយៈពេល១ឆ្នាំកន្លះ។ ស្របពេលក្លិបបិសាចក្រហម Manchester United ក៏បានចុះហត្ថលេខាលើខ្សែបម្រើប្រយុទ្ធ Marcel Sabitzer ក្នុងលក្ខខណ្ឌខ្ចីជើងពីក្លិប Bayern Munich រហូតដល់ចប់រដូវកាលនេះ។ ការតាមប្រមាញ់ភ្លាមៗ លើខ្សែបម្រើសញ្ជាតិអូទ្រីសវ័យ២៨ឆ្នាំរូបនេះ កើតឡើងបន្ទាប់ពីខ្សែបម្រើ Christian Eriksen ត្រូវអវត្តមានច្រើនខែ ដោយសាររបួសកជើង។
Southampton ក៏ស្ថិតក្នុងចំណោមក្លិបចាយធំ នៅថ្ងៃចុងក្រោយនៃទីផ្សារដោះដូរខែមករានេះ ផងដែរ ដោយចុះហត្ថលេខាលើខ្សែបម្រើស្លាប Kamaldeen Sulemana ពីក្លិប Rennes ក្នុងតម្លៃបំបែកកំណត់ត្រាក្លិប ២២លានផោន និងបញ្ចប់ការផ្ទេរខ្សែប្រយុទ្ធ Paul Onuachu ពីក្លិប Genk ដែលមានតម្លៃ ១៨.៥លានផោន។
Tottenham Hotspur ក៏បានបញ្ចប់កិច្ចព្រមព្រៀងខ្ចីជើងខ្សែការពារស្តាំ Pedro Porro ពីក្លិប Sporting CP រហូតដល់ចប់រដូវកាលនេះ ជាមួយលក្ខខណ្ឌទិញផ្តាច់តម្លៃ ៤០លានផោន នៅពេលក្រោយ។
ការចំណាយរួមរបស់ក្លិបទាំងអស់នៅ Premier League រយៈពេលពេញ១ខែ ក្នុងខែមករានេះ គឺជិត ៨០០លានផោន ដោយបានបំបែកកំណត់ត្រាចាស់ កាលពីខែមករា ឆ្នាំ២០១៨ ដែលចាយច្រើនបំផុតចំនួន ៤៣០លានផោន តែប៉ុណ្ណោះ៕ (ដកស្រង់ចេញពី The Telegraph និង Sky Sports)
ចែករំលែកព័តមាននេះ