ប៉ូលិសបង្ការពន្លត់អគ្គីភ័យនិងសង្គ្រោះ ចុះបង្រៀនអំពីរបៀបពន្លត់អគ្គីភ័យ
ខេត្តសៀមរាម ៖ នារសៀលនៅថ្ងៃទី២១ ខែកក្កដា ឆ្នាំ២០១៧ កម្លាំងការិយាល័យជំនាញបង្ការពន្លត់អគ្គភ័យ
ខេត្តសៀមរាម ៖ នារសៀលនៅថ្ងៃទី២១ ខែកក្កដា ឆ្នាំ២០១៧ កម្លាំងការិយាល័យជំនាញបង្ការពន្លត់អគ្គភ័យ និងសង្គ្រោះនៃស្នងការដ្ឋាននគរបាលខេត្តសៀមរាបដឹកនាំដោយលោកវរសេនីយ៍ឯក មាស សាង នាយការិយាល័យបង្ការពន្លត់អគ្គភ័យ និងសង្គ្រោះនៃស្នងការដ្ឋាននគរបាលខេត្តសៀមរាបបានចុះធ្វើការផ្សព្វផ្សាយ និងពន្យល់ណែនាំដល់បុគ្គលិកសណ្ឋាគារ ហ្គោលដិនធេមផល ចំនួន៤០នាក់ ក្នុងនោះមានស្រី១៥នាក់អំពីរបៀបបង្ការទប់ស្កាត់គ្រោះអគ្គីភ័យ និងរបៀបទុកដាក់ និងប្រើប្រាស់បំពង់ពន្លត់អគ្គីភ័យឱ្យចំគោលដៅ និងអនុវត្តពន្លត់ជាក់ស្តែងដើម្បីឱ្យបុគ្គលិកទាំងអស់ងាយយល់ និងចេះប្រើប្រាស់បំពង់បាញ់ពន្លត់នៅពេលមានអគ្គីភ័យកើតឡើង ។
មានប្រសាសន៍សំណេះសំណាលនាពេលនោះដែរលោកវរសេនីយ៍ឯក មាស សាង នាយការិយាល័យបង្ការពន្លត់អគ្គីភ័យ និងសង្គ្រោះដោយអនុវត្តតាមការណែនាំ និងដាស់តឿនក្រើនរំលឹកពីសំណាក់លោកវរសេនីយ៍ឯក ទិត្យ ណារ៉ុង ស្នងការនគរបាលខេត្តសៀមរាបក្នុងកិច្ចការពារធានាសន្តិសុខសុវត្ថិភាព និងសណ្តាប់ធ្នាប់ជូនប្រជាពលរដ្ឋនៅក្នុងខេត្ត ពិសេសការបង្ការនូវគ្រោះអគ្គីភ័យដែលកន្លងមកតែងតែកើតមានឡើងជាយថាហេតុដែលបង្កឱ្យមានការប៉ះពាល់ការខាតបង់នូវទ្រព្យសម្បត្តិថែមទាំងអាចឈានទៅបាត់បង់អាយុជីវិតមនុស្សសត្វថែមទៀតផងនោះ ។
សូមបញ្ជាក់ផងដែរថា កងកម្លាំងនគរបាលបង្ការពន្លត់អគ្គីភ័យក៏បានសំណូមពរដល់បងប្អូនប្រជាពលរដ្ឋដែលរស់នៅក្នុងខេត្តសៀមរាបទាំងអស់សុំឱ្យមានការប្រុងប្រយ័ត្នខ្ពស់នូវគ្រោះអគ្គីភ័យដែលបណ្តាមកពីភ្លើង ទៀន ភ្លើងធូប ចរន្តអគ្គីសនី ប្រេងសាំង ហ្គាស និងឧស្ម័នផ្សេងៗទៀត ហើយពេលមានអគ្គីភ័យកើតឡើងណាមួយ សូមទំនាក់ទំនងមកកាន់លេខទូរស័ព្ទហតឡាញរបស់ស្នងការដ្ឋាននគរបាលខេត្តមានដូចជា លេខ ០១២ ៦៣០ ០៦៦, ០៦៦ ៦៣០ ០៦៦ ដើម្បីកម្លាំងយើងចេញសង្គ្រោះបានទាន់ពេលវេលា ៕
ចែករំលែកព័តមាននេះ