ខេត្តពោធិ៍សាត់ ៖ ដើម្បីគិតគូរអំពីសុខភាពជាចម្បង និងចូលរួមអភិវឌ្ព្យន៍ខេត្តឲ្យកាន់តែរីកចម្រើន ក៏ដូចជាការជួយរកទីផ្សារលក់កសិផលជូនប្រជាកសិករផងនោះ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានទំនាក់ទំនងជាមួយលោកឧកញ៉ា ភូ ពុយ នៅខេត្តបាត់ដំបង មកធ្វើផ្សារមួយនៅខេត្តពោធិ៍សាត់ សម្រាប់លក់បន្លែគ្មានជាតិគីមី ។ ផ្សារនេះមានទីតាំងនៅជាប់ផ្លូវរថភ្លើងស្ថិតក្នុងភូមិពោធិ៍តាគួយ សង្កាត់លលកស ក្រុងពោធិ៍សាត់ បានសាងសង់ជិតរួចជាស្ថាពរ ហើយនឹងបើកឲ្យប្រជាពលរដ្ឋចូលលក់ដូរអំឡុងចុងឆ្នាំ២០១៧នេះ ។
អ្នកកាន់ការងារនៅទីនោះបានប្រាប់ឲ្យដឹងថា ផ្សារបន្លែគ្មានជាតិគីមីនេះ មានផ្ទៃដីធំទូលាយជាងនៅខេត្តបាត់ដំបង មានផ្លូវខ្វាត់ខ្វែង មានផ្ទះល្វែងជុំវិញផ្សារ មានបណ្ដាញទឹកភ្លើង និងប្រព័ន្ធលូតាមស្ដង់ដាអនាម័យ និងបរិស្ថាន ។ ផ្សារនេះជាគំនិតផ្ដួចផ្ដើមរបស់លោករដ្ឋមន្ត្រី ស៊ុយ សែម ដែលលោកចង់បានដើម្បីឲ្យបងប្អូនប្រជាកសិករនៅតាមជនបទដាំបន្លែប្រើជីធម្មជាតិ យកមកលក់នៅទីនេះ ព្រោះសព្វថ្ងៃបន្លែផ្លែឈើដែលនាំចូលពីបរទេសពោរពេញទៅដោយការប្រើជីគីមី ធ្វើឲ្យប៉ះពាល់ដល់សុខភាពអ្នកទទួលទានយ៉ាងខ្លាំង ។ លោកឲ្យដឹងថាផ្សារលក់បន្លែគ្មានជាតិគីមីនៅខេត្តពោធិ៍សាត់នេះ អាចនឹងរួចរាល់ក្នុងរយៈពេលមួយខែ ឫពីរទៀត បើកលក់២៤ម៉ោងលើ២៤ម៉ោង ហើយផ្ដល់ឱកាសឲ្យប្រជាកសិករលក់ក្នុងរយៈពេល៥ឆ្នាំ ដោយឥតគិតថ្លៃ ។
នៅពេលចុះមូលដ្ឋានម្ដងៗ លោករដ្ឋមន្ត្រី ស៊ុយ សែម តែងតែផ្សព្វផ្សាយអំពីផ្សារបន្លែនេះព្រមទាំងបានជំរុញឲ្យបងប្អូនប្រជាពលរដ្ឋគ្រប់ទីកន្លែងនាំគ្នាដាំបន្លែគ្រប់មុខទាំងបន្លែស្លឹក បន្លែផ្លែ និងបន្លែមើម ដោយប្រើជីធម្មជាតិដើម្បីយកមកលក់បានលុយដោះស្រាយជីវភាពគ្រួសារ ។ បើសិនជាបងប្អូនដាំបានច្រើនលើសពីតម្រូវការក្នុងខេត្ត នោះនឹងត្រូវចែកចាយដល់រាជធានីភ្នំពេញ និងតាមបណ្ដាខេត្តទូទាំងប្រទេសទៀត ព្រោះសព្វថ្ងៃនេះ អ្នកទទួលទានដែលក្រុមគ្រួសាររបស់គេមានជីវភាពគ្រាន់ធូរធារនោះ គេគិតអំពីបញ្ហាសុខភាពខ្លាំងណាស់ និងមានការប្រុងប្រយ័ត្នបំផុតចំពោះបន្លែផ្លែឈើ ដែលនាំចូលពីបរទេសផ្ទុកដោយសារធាតុគីមី ។
គេបានរំពឹងថា នៅពេលផ្សាររបស់លោកឧកញ៉ា ភូ ពុយ នេះដំណើរការទៅ បងប្អូនប្រជាកសិករខេត្តពោធិ៍សាត់ នឹងមានក្ដីសង្ឃឹមឡើងវិញ ព្រោះមានទីផ្សារសម្រាប់លក់កសិផលរបស់ពួកគាត់ ហើយពេលនោះពួកគាត់ប្រាកដជាសប្បាយដាំដុះសប្បាយលក់ធ្វើឲ្យជីវភាពកាន់តែប្រសើរឡើងពីមួយថ្ងៃទៅមួយថ្ងៃ ។ នៅពេលយើងនាំគ្នាដាំបន្លែផ្លែឈើបានច្រើន និងមានទីផ្សារសម្រាប់លក់ដូរនេះ នឹងជំរុញឲ្យបងប្អូនប្រជាកសិករយើងកាន់តែខិតខំដាំដុះបន្ថែមទៀត ដោយគ្មានខ្លាចនឿយហត់ឡើយ ។ ពេលនោះនឹងកាត់បន្ថយការធ្វើចំណាកស្រុក កាត់បន្ថយការហូរចូលបន្លែផ្លែឈើពីប្រទេសជិតខាង ដែលផ្ទុកដោយសារធាតុគីមី ហើយក្រុមគ្រួសារពិតជាមានសុភមង្គលដោយសារទទួលបានប្រាក់ចំណូលជារៀងរាល់ថ្ងៃ ។ ទាំងអស់នេះគឺជាគោលបំណងរបស់រាជរដ្ឋាភិបាល ក៏ដូចក្រុមការងារថ្នាក់កណ្ដាលចុះជួយខេត្តពោធិ៍សាត់ និងថ្នាក់ដឹកនាំខេត្ត ក្នុងការខិតខំប្រឹងប្រែងអភិវឌ្ព្យន៍ខេត្តឲ្យមានការរីកចំរើន ជួយរកទីផ្សារជូនប្រជាកសិករ និងលើកកម្ពស់ជីវភាពរស់នៅរបស់ប្រជាពលរដ្ឋ ៕
ចែករំលែកព័តមាននេះ