ដី និងផ្ទះ ដែលលោក គង់ គាំ ស្ម័គ្រចិត្តប្រគល់ជូនរដ្ឋវិញ សម្ដេចតេជោ ហ៊ុន សែន សម្រេចផ្តល់ទៅឲ្យ គ.ជ.ប
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានសម្រេចផ្ដល់ ដី និងផ្ទះ…
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានសម្រេចផ្ដល់ ដី និងផ្ទះ ដែលជាទ្រព្យសម្បត្តិរដ្ឋ ដែលលោក គង់ គាំ បានស្ម័គ្រចិត្តប្រគល់ត្រឡប់ជូនក្រសួងការបរទេស និងសហប្រតិបត្តិការអន្តរជាតិវិញ ទៅឱ្យគណៈកម្មាធិការជាតិរៀបចំការបោះឆ្នោត ដើម្បីប្រើប្រាស់ធ្វើជាទីស្នាក់ការរបស់ គ.ជ.ប នេះបើយោងតាមសេចក្ដីប្រកាសព័ត៌មាន ស្ដីពី លទ្ធផល នៃសម័យប្រជុំពេញអង្គគណៈរដ្ឋមន្ត្រី ថ្ងៃសុក្រ ទី១៣ ខែមករា ឆ្នាំ២០២៣ ។
សូមជម្រាបថា លោក គង់ គាំ កាលពីថ្ងៃទី១២ ខែមករា ឆ្នាំ២០២៣ បានផ្ញើលិខិតមួយទៅលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ដោយទទួលស្គាល់ថា លោកពិតជាមិនបានយល់ពីបែបបទ នៃការសុំកាន់កាប់ផ្ទះ និងដី ។ លោក គង់ គាំ ក៏បានប្រកាសផ្តល់ដី និងផ្ទះ ស្ថិតនៅផ្លូវសុធារស ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ជូនរដ្ឋវិញ ដោយស្ម័គ្រចិត្ត ក្រោមហេតុផលថា កុំឲ្យអង្គភាពពាក់ព័ន្ធខាតពេលវេលាស្រាវជ្រាវ និងដើម្បីបញ្ចប់ករណីនេះបានឆាប់រហ័ស ។ ហើយការស្ម័គ្រចិត្តនេះ ក៏នឹងមិនមានការកែប្រែនោះដែរ ។
បន្ទាប់មកសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានសរសេរលើហ្វេសប៊ុកផេក នាយប់ថ្ងៃទី១២ មករា យ៉ាងដូច្នេះថា ៖ «ទីបំផុត ដីនិងផ្ទះ ដែលជាសម្បត្តិរដ្ឋ ត្រូវបានលោក គង់ គាំ និងភរិយា ផ្តិតមេដៃប្រគល់ជូនរដ្ឋវិញ បន្ទាប់ពីអង្គភាពប្រឆាំងអំពើពុករលួយធ្វើការជាមួយលោក គង់ គាំ និងគ្រួសារ រយៈពេល៣ម៉ោងកន្លះ។ កុំឲ្យយប់យូរ សុបិនច្រើនខ្ញុំសម្រេចមិនប្តឹងបន្តទៀតទេ គឺបញ្ចប់ត្រឹមការប្រគល់ផ្ទះនេះជូនក្រសួងការបរទេស ដែលអាចធ្វើ នាសប្តាហ៍ក្រោយ» ៕
ចែករំលែកព័តមាននេះ