ឈ្មួញសម្រុកនាំសត្វគោក្របីទៅប្រទេសវៀតណាមក្នុង១ថ្ងៃ៤០០ទៅ៥០០ក្បាល (វីដេអូ)
- ព្រៃវែង
ខេត្តព្រៃវែង ៖ មានឈ្មួញនាំសត្វគោក្របីរាប់រយក្បាលឆ្លងដែនចេញទៅប្រទេសវៀតណាមតាមច្រក
ខេត្តព្រៃវែង ៖ មានឈ្មួញនាំសត្វគោក្របីរាប់រយក្បាលឆ្លងដែនចេញទៅប្រទេសវៀតណាមតាមច្រករបៀងស្វាយអាង៉ោង ភូមិស្វាយអាង៉ោង ឃុំចាម ស្រុកកំពង់ត្របែក ។ ករណីនេះកើតឡើងនៅវេលាម៉ោង៦និង៣០នាទីយប់ថ្ងៃទី១២ មករា ឆ្នាំ២០២៣ នៅចំណុចច្រករបៀងស្វាយអាង៉ោង ឃុំចាមស្រុកកំពង់ត្របែក ខេត្តព្រៃវែង។
បើតាមបុរសម្នាក់បានឲ្យដឹងថា គាត់រស់នៅភូមិចាម ឃុំកំពង់ត្របែក បានឲ្យដឹងថា គាត់ជាអ្នកចិញ្ចឹមគោក្តាម ក្នុង១ក្បាលលក់បានតម្លៃ៩០០.០០០រៀល គាត់ត្រូវបង់ឲ្យមន្ត្រីពេទ្យសត្វ១ក្បាល៤,០០០រៀល និងបង់ឲ្យ ក្រុមហ៊ុននាំចេញ១ក្បាល៥០.០០០រៀល រីឯក្របី១ក្បាលលក់បាន៤លានទៅ៥លានរៀល ។
ចំណែកបុរសម្នាក់មកពីខេត្តកំពង់ធំ បានឲ្យដឹងថា គោកូនកាត់១ក្បាលលក់ឱ្យវៀតណាម១ក្បាលតម្លៃ៤លានរៀលទៅ៤លាន៤សែនរៀល ក្នុងនោះត្រូវបង់ពន្ធ១ក្បាល១០ម៉ឺនរៀល បង់ឲ្យពេទ្យសត្វ១ក្បាល៨ពាន់រៀល និងបង់សមត្ថកិច្ចតាមផ្លូវពីខេត្តកំពង់ធំមកដល់ព្រំដែនស្វាយអាង៉ោងអស់៥ម៉ឺនរៀលចំណាយថ្លៃរថយន្តដឹកគោ១០ក្បាលអស់៨០ម៉ឺនរៀល។
ទាក់ទិនករណីនេះដែរលោកចិនវិសាល ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មខេត្តព្រៃវែងបានឲ្យឲ្យដឹងថា មានក្រុមហ៊ុនចំនួន០២គឺក្រុមហ៊ុន អង្គរសុខរិទ្ធ មានជ័យ និងក្រុមហ៊ុនយុវពាណិជ្ជ មានអាជ្ញាបន័នាំសត្វគោក្របីរស់ចេញទៅប្រទេសវៀតណាមក្នុង១ខែចំនួន៥ម៉ឺនក្បាល ហើយនៅច្រករបៀងស្វាយអាង៉ោង គឺមានមន្ត្រីពេទ្យសត្វចាំកាត់ស្តុក សូមឲ្យទាក់ទងមន្ត្រីពេទ្យសត្វទីតាំងនាំចេញនោះទៅ។ ចំពោះមហាជន បានលើកឡើងថា. ក្រុមហ៊ុន ទាំងពីខាងលើ បានធ្វើក្រោលគោ ក្រោលក្របី ចំនួន២កន្លែងផ្សេងគ្នា គឺទី១ បេនក្រោលគោ ក្រោលក្របី ស្វាយអាង៉ោង នៅខាងជើងច្រករបៀងស្វាយអាង៉ោង១០០ម៉ែត្រស្ថិតនៅភូមិស្វាយអាង៉ោងឃុំចាមស្រុកកំពង់ត្របែកខេត្តព្រៃវែង។ ក្រោលទី២ ជិតបុស្តិ៍នគបាលវរៈការពារព្រំដែនគ្រួស (ច្រករបៀងក្រសាំងជ្រំ)ស្ថិតនៅភូមិក្រសាំងជ្រំឃុំគ្រួសស្រុកស្វាយជ្រំខេត្តស្វាយរៀង។
តាមប្រភពបន្តទៀតថា នៅក្រសាំងជ្រំ ឈ្មួញបាននាំសត្វគោក្របី ទាំងយប់ទាំងថ្ងៃឆ្លងដែនទៅប្រទេសវៀតណាមមានពីររូបភាព ពេលថ្ងៃ ឈ្មួញដេញគោ ក្របី មកឃ្វាលនៅជិតព្រំដែន ជាមួយគោក្របីអ្នកស្រុក ពេលរសៀលម៉ោង៣និង៣០នាទី ឈ្មួញដេញគោក្របី ចុះទឹកព្រែកព្រំដែនឆ្លងទៅប្រទេសវៀតណាមតែម្តងគ្មានសមត្ថកិច្ចឬមន្ត្រីពេទ្យសត្វណាមកពិនិត្យកាត់ស្តុកទេ។ដល់ពេលយប់ឈ្មួញដឹកសត្វគោក្របី ចេញពីក្រោលឆ្លងដែនទៅប្រទេសវៀតណាមតាមច្រករបៀង។ចំណែកនៅស្វាយអាង៉ោងវិញ គឺមានក្រោលគោ ក្រោលក្របី និងមានដឹកតាមរថយន្តធុនយក្ស និងដឹកតាមរថយន្តខ្នាត២តោនកន្លះ និងគោក្នុងស្រុកដឹកតាមរ៉ឺម៉ាកម៉ូតូ ។
មហាជនបានលើកឡើងថា បើក្រុមហ៊ុនអង្គរសុខរិទ្ធមានជ័យនិងក្រុមហ៊ុនយុវពាណិជ្ជ មានច្បាប់នាំចេញក្នុង១ខែ៥ម៉ឺនក្បាលតើមន្ត្រីជំនាញកាត់ស្តុកឬបង់ពន្ធយ៉ាងម៉េចទាន។ទាក់ទិនករណីនេះដែរ លោកឧកញ៉ា ជឹមសុខ ដែលម្ចាស់អាជ្ញាបន័នាំគោក្របី ចេញទៅប្រទេសវៀតណាម បានប្រាប់កោះសន្តិភាពថា ការនាំចេញសត្វគោ ក្របី ទៅក្រៅប្រទេសបានច្រើនកាលណា គឺកាន់តែប្រសើរដល់ជីវភាពប្រជាពលរដ្ឋអ្នកចិញ្ចឹម គោ ក្របីនិងជ្រូក មានទីផ្សារនាំចេញ។
លោកឧញ៉ាជឹមសុខ បន្តថា ក្រុមហ៊ុនលោកប្រមូលទិញ សត្វគោក្របី តាមបណ្តាខេត្តទូទាំងប្រទេស ហើយការនាំចេញ គឺថ្ងៃខ្លះ១០០ក្បាលទៅ១៥០ក្បាល គឺតាមឈ្មួញវៀតណាមគេមកទិញ ។ដូច្នេះបើឈ្មួញវៀតណាមមិនទិញត្រូវដាក់នៅក្នុងក្រោលសិនទើបគោក្របីនៅសល់ក្នុងក្រោលច្រើន ហើយការនាំចេញសត្វគោក្របី នៅពេលយប់ តាមច្រករបៀង ដោយភាគីវៀតណាមគេមិនឲ្យនាំចេញតាមផ្លូវត្រង់នៃច្រកទ្វាព្រំដែន ទើបដឹកទៅចុះតាមព្រែកព្រំដែន។
លោកឧកញ៉ា ជឹមសុខ បានបញ្ជាក់ថា ក្រោលនៅក្រសាំងជ្រំឃុំគ្រួសស្រុកស្វាយជ្រំខេត្តស្វាយរៀងគឺម្ចាស់ក្រុមហ៊ុនផ្សេង ហើយចំពោះមានឈ្មួញដេញក្របីបន្លំក្រប៉គោអ្នកស្រុករួចដេញចុះព្រែកឆ្លងដែនទៅប្រទេសវៀតណាមនោះ គឺលោកមិនដឹងថាជាក្រុមហ៊ុនណាដែរ។
បើតាមមន្ត្រីពេទ្យសត្វម្នាក់បានបង្ហើបឲ្យដឹងថា មានឈ្មួញរកស៊ីនាំសត្វគោក្របី ឆ្លងដែនទៅប្រទេសវៀតណាមនៅច្រករបៀងស្វាយអាង៉ោងនិងក្រសាំងជ្រំទាំងមានច្បាប់និងអត់ច្បាប់មានរហូតដល់២០ក្រុមហ៊ុន ក៏ប៉ុន្តែគេត្រូវបង់ឲ្យក្រុមហ៊ុនដែលមានច្បាប់គោក្តាម១ក្បាល៥ម៉ឺន គោកូនកាត់១០ម៉ឺនរៀលក្របី១ក្បាល១០ម៉ឺនរៀល ហើយក្រុមហ៊ុនគេបែងចែកឲ្យសមត្ថកិច្ចជំនាញតាមស្ថាបន័ដែលឈជើងនៅព្រំដែននោះ៕
ចែករំលែកព័តមាននេះ