ឆ្នាំនេះ! ឧស្សាហកម្មឡានជជុះថៃ ព្យាករណ៍ការលក់កើនឡើងតិចតួច
ថៃ ៖ សមាគមឡានជជុះរបស់ប្រទេសថៃ ដែលហៅកាត់ថា AUC បានព្យាករណ៍ថា ទីផ្សារឡានជជុះ
ថៃ ៖ សមាគមឡានជជុះរបស់ប្រទេសថៃ ដែលហៅកាត់ថា AUC បានព្យាករណ៍ថា ទីផ្សារឡានជជុះ
ថៃ ៖ សមាគមឡានជជុះរបស់ប្រទេសថៃ ដែលហៅកាត់ថា AUC បានព្យាករណ៍ថា ទីផ្សារឡានជជុះក្នុងប្រទេសថៃ នឹងកើនឡើង ១៥% នៅក្នុងឆ្នាំនេះ បើទោះបីជាមានការខ្វះខាតជាបន្តបន្ទាប់នៃគ្រឿងអេឡិចត្រូនិក ដែលត្រូវការសម្រាប់ការផលិតរថយន្តថ្មី យ៉ាងណាក៏ដោយ។ នេះបើយោងតាមប្រភពពីសារព័ត៌មានថៃ The Thaiger ចេញផ្សាយកាលពីថ្ងៃទី១០ ខែមករា កន្លងទៅ។
កង្វះឧបករណ៍អេឡិចត្រូនិកសម្រាប់ការផលិត នៅទូទាំងពិភពលោក គឺកាន់តែធ្ងន់ធ្ងរឡើងដោយសារតែបញ្ហាវិបត្តិនយោបាយឆ្មា និងកណ្ដុររវាងប្រទេសចិន និងតៃវ៉ាន់។ តៃវ៉ាន់ត្រូវបានគេស្គាល់យ៉ាងទូលំទូលាយថា ជាទីតាំងនៃគ្រឿងអេឡិចត្រូនិកដ៏ធំមួយរបស់ពិភពលោក តែជាអកុសលសម្រាប់តៃវ៉ាន់ ដោយសារចិនមានវត្ថុធាតុដើម ដែលត្រូវការចាំបាច់សម្រាប់ការផលិតគ្រឿងអេឡិចត្រូនិក ដែលបានបដិសេធនៅក្នុងការដឹកបញ្ជូន។
លោក Pinyo Tanawatcharaporn ប្រធានសមាគមឡានជជុះរបស់ថៃ បាននិយាយថា កង្វះបន្ទះឈីបបានជះឥទ្ធិពលដល់ការលក់រថយន្តស៊េរីថ្មី ហើយបានបង្ខំឱ្យក្រុមហ៊ុនផលិតរថយន្ត ពន្យារពេលការដឹកជញ្ជូនដល់អតិថិជន។ ជាក់ស្តែង អតិថិជនជាច្រើនមិនចង់រង់ចាំការដឹកជញ្ជូន ដែលអាចពន្យាពេលចាប់ពី ៦-៨ខែ ដូច្នេះពួកគេសម្រេចចិត្តទិញឡានជជុះជំនួសវិញ។
ក្លិបឧស្សាហកម្មយានយន្តរបស់សហព័ន្ធឧស្សាហកម្មថៃ បានចាត់ទុកកង្វះខាតបន្ទះឈីប បានបន្តប៉ះពាល់ដល់ឧស្សាហកម្មរថយន្តរបស់ប្រទេសថៃ បើទោះបីជាស្ថានភាពគ្រឿងអេឡិចត្រូនិកពិភពលោក មានភាពប្រសើរឡើងកាលពីចុងឆ្នាំ២០២២ ដោយសារការថយចុះ នៃតម្រូវការសម្រាប់ផលិតផលពីវិស័យព័ត៌មានវិទ្យា យ៉ាងណាក៏ដោយ។
កាលពីឆ្នាំ ២០២២ ការលក់ឡានជជុះនៅក្នុងទីផ្សារថៃ បានកើនឡើង ១៥% ពីមួយឆ្នាំទៅមួយឆ្នាំ ដោយឈានដល់១លានគ្រឿង ពោលកើនឡើងពី ៩០ម៉ឺនគ្រឿងនៅក្នុងឆ្នាំ ២០២១។
ការកើនឡើងនេះ គឺមួយផ្នែក ដោយសារតែការព្រួយបារម្ភអំពីការឆ្លងរីករាលដាលនៃជំងឺកូវីដ១៩ ដែលនាំឱ្យគ្រប់គ្នាសម្រេចចិត្តទិញរថយន្តផ្ទាល់ខ្លួន ដើម្បីជៀសវាងការប្រើប្រាស់មធ្យោបាយធ្វើដំណើរសាធារណៈ។
ជំងឺកូវីដ១៩ បានមកដល់ប្រទេសថៃ នៅដើមឆ្នាំ ២០២០ ជាមួយគ្នានោះ អាកប្បកិរិយាអតិថិជន ក៏បានផ្លាស់ប្តូរចាប់តាំងពីពេលនោះ ដោយពួកគេភាគច្រើនព្រួយបារម្ភថា វិធានការរបស់រដ្ឋាភិបាលក្នុងការទប់ស្កាត់ការរីករាលដាលនៃជំងឺនេះ ដែលអាចប៉ះពាល់ដល់ការធ្វើដំណើរប្រចាំថ្ងៃរបស់ពួកគេ។
លោក Pinyo បានបន្តទៀតថា កំណើនទីផ្សារឡានជជុះនៅថៃ ជាធម្មតាទៅក្នុងទិសដៅផ្ទុយពីកំណើនសេដ្ឋកិច្ច។ ប្រសិនបើសេដ្ឋកិច្ចធ្លាក់ចុះ ទីផ្សារនឹងពង្រីក ប៉ុន្តែមនុស្សមាននិន្នាការទិញឡានថ្មី នៅពេលដែលសេដ្ឋកិច្ចល្អ។
ទីផ្សារឡានជជុះថៃ ហាក់ដូចជាមានទស្សនវិស័យភ្លឺស្វាងសម្រាប់ឆ្នាំ ២០២៣ ដោយលោក Pinyo បានគូសបញ្ជាក់ថា ការកើនឡើងនៃអត្រាគោលនយោបាយ ដែលបានអនុវត្តដោយធនាគារកណ្តាលថៃ កាលពីឆ្នាំមុន អាចជះឥទ្ធិពលដល់ការសម្រេចចិត្តរបស់គ្រប់គ្នា ក្នុងការទិញឡានជជុះ ហើយការដំឡើងអត្រាការប្រាក់នេះ ធ្វើឡើងស្របតាមការសម្រេចចិត្តរបស់ធនាគារកណ្តាលអាមេរិក ក្នុងការដំឡើងអត្រាការប្រាក់ ដើម្បីទប់ស្កាត់ការកើនឡើងនៃអតិផរណា។
យោងតាមរបាយការណ៍ពីសមាគមឡានជជុះថៃ AUC បានបង្ហាញថា ឡានជជុះ គឺមានតម្លៃទាបជាងឡានថ្មី ប្រហែល ៣០-៤០% ជាមួយនឹងក្រុមហ៊ុនចុះបញ្ជីលក់ឡានជជុះមានចំនួន៥ពាន់ នៅទូទាំងប្រទេស៕
ចែករំលែកព័តមាននេះ