រាជធានីភ្នំពេញ ៖ មន្ត្រីជាន់ខ្ពស់ក្រសួងទេសចរណ៍បានឲ្យដឹងថា រយៈពេល៥ខែដើមឆ្នាំនេះ កម្ពុជាទទួលបានភ្ញៀវទេសចរចំនួន២,៣លាននាក់ កើនឡើង១២% បើធៀបនឹងរយៈពេលដូចគ្នាកាលពីឆ្នាំមុន ។
រាជធានីភ្នំពេញ ៖ មន្ត្រីជាន់ខ្ពស់ក្រសួងទេសចរណ៍បានឲ្យដឹងថា រយៈពេល៥ខែដើមឆ្នាំនេះ កម្ពុជាទទួលបានភ្ញៀវទេសចរចំនួន២,៣លាននាក់ កើនឡើង១២% បើធៀបនឹងរយៈពេលដូចគ្នាកាលពីឆ្នាំមុន ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងតាមទូរស័ព្ទនាព្រឹកថ្ងៃទី៦ កក្កដាម្សិលមិញថា ក្នុងចំណោមប្រទេសទាំង១០ដែលមានភ្ញៀវទេសចរមកទស្សនាច្រើនជាងគេ មានប្រទេសខ្លះធ្លាក់ចុះ ប្រទេសខ្លះកើនឡើង ប៉ុន្តែភ្ញៀវទេសចរមកពីចិន អឺរ៉ុប កើនឡើង ខណៈដែលវៀតណាមបានធ្លាក់មកចំណាត់ថ្នាក់ទី២បន្ទាប់ពីជាប់លេខ១ជាច្រើនឆ្នាំ ។ លោកបន្តថា នៅឆ្នាំនេះ កម្ពុជាទទួលបានអាកាសចរណ៍ថ្មីៗ បានភ្ជាប់ជើងហោះហើរត្រង់មកម្ពុជា និងមានក្រុមហ៊ុនអាកាសចរណ៍ថ្មីៗជាច្រើនទៀតត្រៀមហោះមកកាន់កម្ពុជា ។
ជាក់ស្តែងនៅដើមឆ្នាំនេះ មានក្រុមហ៊ុនអាកាសចរណ៍ជាច្រើនដូចជា Air Asia, Amirate Airline, Malindo Airline និងក្រុមហ៊ុនអាកាសចរណ៍ចិន មួយចំនួនទៀតបានប្រតិបត្តិការហោះហើរមកកម្ពុជា ។
រដ្ឋមន្ត្រីបានបន្តថា ៖« ការមកដល់របស់អាកាសចរណ៍កាន់តែច្រើន កាន់តែល្អសម្រាប់កម្ពុជា ព្រោះការមកដល់របស់អាកាសចរណ៍ថ្មីៗ ជាការនាំមកនូវភាពរីកចម្រើនសម្រាប់កម្ពុជា » ។
ប្រធានសហព័ន្ធទេសចរណ៍កម្ពុជា លោកធួន ស៊ីណាន បានយល់ស្របនឹងកំណើនដែលលើកឡើងដោយក្រសួងទេសចរណ៍ ដោយសារតែការមកដល់របស់ភ្ញៀវទេសចរចិន ពិតជាមានកំណើនខ្ពស់ បូករួមទាំងការមកដល់ពីបណ្តាប្រទេសដទៃទៀត ប៉ុន្តែកំណើនភ្ញៀវអឺរ៉ុប លោកមិនសូវមានសុទិដ្ឋិនិយមនោះទេ ។
លោកបន្តថា មានការលើកឡើងពីក្រុមហ៊ុនទេសចរណ៍ និងសណ្ឋាគារថា មានការបាត់បង់ភ្ញៀវ ប៉ុន្តែវាមិនមានអ្វីប្លែកទេ ព្រោះបាត់ពីក្រុមហ៊ុនមួយ អាចកើននៅក្រុមហ៊ុនមួយទៀត ។
លោក ហូ វណ្ឌី ទីប្រឹក្សាសភាពាណិជ្ជកម្មកម្ពុជា បានថ្លែងថា តាមរយៈគោលនយោបាយបើកចំហជើងមេឃរបស់រាជរដ្ឋាភិបាល បានធ្វើឲ្យក្រុមហ៊ុនអាកាសចរណ៍កើនឡើងជាលំដាប់ ដែលរហូតមកទល់ពេលនេះ មានក្រុមហ៊ុនអាកាសចរណ៍ចំនួន៤៤ហើយ ដែលបានហោះហើរត្រង់មកកម្ពុជា ។ ព្រមជាមួយនេះ ការវិនិយោគពីបរទេសកើនឡើង បានធ្វើឲ្យសេដ្ឋកិច្ចកម្ពុជាមានកំណើនយ៉ាងរឹងមាំ ក្នុងនោះភ្ញៀវទេសចរមកទស្សនាកម្ពុជា ក៏មានកំណើនដែរ ។
លោកបន្តថា ៖« ប្រសិនជាគ្មានអ្វីប្រែប្រួលទេនោះ ភ្ញៀវទេសចរអន្តរជាតិ នឹងកើនដល់៥,៤លាននាក់នៅដំណាច់ឆ្នាំនេះ ស្របតាមការព្យាកររបស់ក្រសួងទេសចរណ៍ និងកើនដល់៧លាននាក់នៅឆ្នាំ២០២០» ៕
ចែករំលែកព័តមាននេះ