រាជធានីភ្នំពេញ ៖ ក្នុងពេលដែលអាណត្តិជាប្រធានសមាគមសិល្បករខ្មែរនឹងបញ្ចប់នៅដំណាច់ខែមិថុនានេះ លោកសុះ ម៉ាច បានបង្ហើបពីសមាសភាពអ្នកសិល្បៈមួយចំនួនដែលលោកយល់ថា សក្តិសមសម្រាប់តំណែងប្រធាន
រាជធានីភ្នំពេញ ៖ ក្នុងពេលដែលអាណត្តិជាប្រធានសមាគមសិល្បករខ្មែរនឹងបញ្ចប់នៅដំណាច់ខែមិថុនានេះ លោកសុះ ម៉ាច បានបង្ហើបពីសមាសភាពអ្នកសិល្បៈមួយចំនួនដែលលោកយល់ថា សក្តិសមសម្រាប់តំណែងប្រធានសមាគមក្នុងអាណត្តិថ្មី ។
ប្រធានសមាគមសិល្បករខ្មែរលោកសុះ ម៉ាច បានប្រកូកប្រកាសដល់បណ្តាអ្នកសិល្បៈទាំងអស់នៅទូទាំងប្រទេសឲ្យចូលរួមបោះឆ្នោតជ្រើសរើសប្រធានថ្មី ដែលនឹងធ្វើឡើងនៅថ្ងៃទី៧ ខែកក្កដា ឆ្នាំ២០១៧ នៅភោជនីយដ្ឋានបឹងមាសតំបន់ព្រែកលាប ។
លោកសុះ ម៉ាច រំពឹងថា ប្រធានថ្មីដែលនឹងដឹកនាំសមាគមសិល្បករខ្មែរនាអាណត្តិទី៥ គឺជាបុគ្គលមួយរូបដែលសក្តិសម និងមានសមត្ថភាព មានពេលវេលាគ្រប់គ្រាន់សម្រាប់ធ្វើការងារ។ បុគ្គលមួយចំនួនដែលលោកសម្លឹងឃើញរួចហើយ ដែលសុទ្ធតែអាចមានសមត្ថភាពដឹកនាំ ប៉ុន្តែវាអាស្រ័យទៅលើពួកគេអាចជួយដល់សមាគមសិល្បករខ្មែរ ឬយ៉ាងណា ។
បើតាមលោកសុះ ម៉ាច អ្នកសិល្បៈដែលសក្តិសមបំផុតនោះមានដូចជាអតីតតារាកំប្លែងនាយឃ្លោក លោកសុវណ្ណ រិទ្ធី ហៅតាវិចទ័រ លោកព្រាប សុវត្ថិ លោកណូយ វ៉ាន់ណេត អ្នកនាងយុគចិន្តា និងអ្នកនាងចន ច័ន្ទលក្ខិណាជាដើម។ «បុគ្គលខាងលើនេះគឺជាអ្នកសក្តិសមបំផុតសម្រាប់ដឹកនាំសមាគមសិល្បករខ្មែរ ព្រោះកន្លងមកពួកគាត់ទាំងនេះសុទ្ធតែធ្លាប់ដើរធ្វើការងារសប្បុរសធម៌ជាបន្តបន្ទាប់ ។ ពួកគាត់ធ្លាប់បានប្រាប់ពីគោលបំណងរបស់ខ្លួនក្នុងការចូលរួមជាមួយសមាគមដើម្បីធ្វើកិច្ចការងារសប្បុរសធម៌ ផ្សេងៗ ប៉ុន្តែយើងមិនដឹងថា ពួកគាត់នឹងចូលរួមជាមួយសមាគមនៅពេលណានោះឡើយ ។
ការដឹកនាំសមាគមមួយនេះគឺទាមទារឲ្យមានឆន្ទៈខ្ពស់ក្នុងការចូលរួមអភិរក្ស និងអភិវឌ្ឍន៍សិល្បៈខ្មែរ ជាបុគ្គលដែលស្មោះត្រង់ចេះជួយទុក្ខធុរៈគ្នា និងជាមនុស្សដែលមានកេរ្តិ៍ឈ្មោះល្អទាំងក្នុងសិល្បៈ និងសង្គម ហើយជាពិសេសនោះគឺមានពេលវេលាគ្រប់គ្រាន់សម្រាប់ដឹកនាំសមាគម » ។
ក្នុងនាមជាប្រធានសមាគមសិល្បករខ្មែរ លោកសុះ ម៉ាច បានអំពាវនាវឲ្យសិល្បករខ្មែរទាំងអស់ចូលរួមឲ្យបានច្រើនកុះករនៅថ្ងៃបោះឆ្នោតជ្រើសរើសប្រធានថ្មី ដើម្បីអាចជ្រើសរើសអ្នកដឹកនាំមួយរូបដែលមានសមត្ថភាពគ្រប់គ្រាន់សម្រាប់ដឹកនាំអ្នកសិល្បៈឲ្យមានការរួបរួមគ្នាមួយកម្រិតទៀត ៕
ចែករំលែកព័តមាននេះ