ខេត្តបន្ទាយមានជ័យ ៖ នៅឆ្នាំ២០១៧នេះ ក្នុងខេត្តបន្ទាយមានជ័យ មានក្រុមហ៊ុនចំនួន១៧៣កន្លែងកំពុងប្រតិបត្តិការផលិតកម្មរបស់ខ្លួន ក្នុងនោះមានបុគ្គលិក-កម្មករ១៦.៤៨៣នាក់ បើធៀបនឹងឆ្នាំ២០១៦ មានប្រមាណ១ម៉ឺន៥ពាន់នាក់ កើនឡើង១,៥% ។
លោក រស់ សារុំ ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត ឲ្យដឹងថា ខេត្តបន្ទាយមានជ័យមាន៩ស្រុក-ក្រុង, ប្រជាពលរដ្ឋចំនួន១៦៨.៤៣៥គ្រួសារ ក្នុងនោះអចិន្ត្រៃយ៍១៦៦.០៧៨គ្រួសារ និងបណ្តោះអាសន្ន២.៣៥៧គ្រួសារ ព្រមទាំងប្រជាពលរដ្ឋសរុបចំនួន៧៦៣.៧៨៧នាក់ (ស្រី៣៨២.៨៥៦នាក់)។ ចំណែកប្រជាពលរដ្ឋអាយុ១៨ឆ្នាំឡើងសរុបចំនួន៤៦០.៤៥៦នាក់ (ស្រី២៣៣.៣៩២នាក់)។ ដោយឡែក ប្រជាពលរដ្ឋចំណាកស្រុកទៅរកការងារធ្វើនៅក្រៅប្រទេស មានចំនួន១៦.៣៤៦នាក់ (ស្រី៦.៨៥១នាក់) ។
លោកបញ្ជាក់ថា ក្នុងឆ្នាំ២០១៧នេះ មានក្រុមហ៊ុនចំនួន១៧៣កន្លែង, កាស៊ីណូ១០កន្លែង, រោងចក្រកាត់ដេរ៤កន្លែង, រោងចក្រអេឡិចត្រូនិក និងគ្រឿងបង្គំរថយន្ត៤កន្លែង, សិប្បកម្ម៧កន្លែង, គ្រឹះ-ស្ថានមីក្រូហិរញ្ញវត្ថុ២៩កន្លែង, សាកលវិទ្យាល័យឯកជន៣កន្លែង និងសិប្បកម្មតូចធំមួយចំនួន ទៀត ។
លោក រស់ សារុំ បន្ថែមថា ក្នុងឆ្នាំនេះ មានបុគ្គលិកកម្មករសរុបទាំងជនបរទេស និងខ្មែរចំនួន១៦.៤៨៣នាក់ ក្នុងនោះខ្មែរ៩.៨៥៦នាក់ (ស្រី៩.៤៥៦នាក់) បើធៀបនឹងឆ្នាំ២០១៦ មានប្រមាណ១ម៉ឺន៥ពាន់នាក់ កើនឡើង១,៥%។
លោកក៏បានសំណូមពរដល់បងប្អូនប្រជាពលរដ្ឋខ្មែរទាំងអស់ ត្រូវបញ្ឈប់ការធ្វើចំណាកស្រុកខុសច្បាប់ ហើយនាំគ្នារកការងារធ្វើក្នុងស្រុកវិញ ដែលមានក្រុមហ៊ុនចំនួន១៧៣កន្លែងរង់ចាំបងប្អូនធ្វើការងារ និងបាននៅជិតផ្ទះសម្បែងផងដែរ ៕
ចែករំលែកព័តមាននេះ