រាជធានីភ្នំពេញ ៖ រាជរដ្ឋាភិបាលកម្ពុជាបានចាប់ផ្តើមពិភាក្សា លើសេចក្តីព្រាងគោលនយោបាយជាតិ ស្តីពី ការលើកទឹកចិត្ត និងការបង្កើតគោលនយោបាយសម្រាប់អភិវឌ្ឍន៍លំនៅឋានតម្លៃសមរម្យ ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក វង្សី វិស្សុត បានថ្លែងបន្ទាប់ពីបើកកិច្ចប្រជុំនៅឧត្តមក្រុមប្រឹក្សាសេដ្ឋកិច្ចជាតិ នាព្រឹកថ្ងៃទី ២២ ខែមិថុនា ថា ទស្សនវិស័យរបស់រាជរដ្ឋាភិបាលកម្ពុជា គឺលើកទឹកចិត្ត និងការបង្កើតកម្មវិធីគោលនយោបាយជាតិ សម្រាប់ការអភិវឌ្ឍលំនៅឋានដែលមានតម្លៃសមរម្យ សំដៅធ្វើឲ្យប្រជាជនទូទាំងប្រទេស មានលំនៅឋានសមរម្យ អាចរស់នៅបានប្រកបដោយសុខុមាលភាពសុវត្ថិភាព និងសេចក្តីថ្លៃថ្នូរ ។
លោកបន្តទៀតថា គោលបំណង និងគោលដៅធំរបស់រាជរដ្ឋាភិបាលកម្ពុជា ចូលរួមចំណែកដល់ការទទួលបានលំនៅឋានសមរម្យ សម្រាប់ក្រុមគ្រួសារដែលមានចំណូលទាប និងមធ្យម ហើយជាការលើកម្ពស់សុវត្ថិភាព នៃការកាន់កាប់លំនៅឋាន ការពង្រឹងគុណភាព និងបង្កើនការទទួលបានសេវាទឹក ភ្លើង និងអគ្គិសនីជាដើម ។
មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបញ្ជាក់ទៀតថា គោលដៅនៃការសង់លំនៅឋានតម្លៃសមរម្យ ដោយប្រើប្រាស់យន្តការភាពជាដៃគូរដ្ឋ និងឯកជន ហើយបង្កើតឲ្យមានការកម្ចីអនុគ្រោះសម្រាប់ទិញ និងជួសជុលលំនៅឋាន ដោយផ្តល់កម្ចីវែង និងមានការប្រាក់សមរម្យ សម្រាប់ប្រជាពលរដ្ឋមានចំណូលទាប និងមធ្យម ។
គម្រោងលំនៅឋានសាធារណៈមានតម្លៃសមរម្យសម្រាប់មហាជនរួមទាំងមន្ត្រីរាជការ និងប្រជាពលរដ្ឋដែលមានប្រាក់ចំណូលទាប និងមធ្យមនៅក្នុងប្រទេសកម្ពុជា បានលេចចេញជារូបរាងហើយនៅឆ្នាំ២០១៧នេះ ។
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានថ្លែងថា ជាមួយនឹងកំណើនសេដ្ឋកិច្ច នគរូបនីយកម្មក៏បានកើនឡើងយ៉ាងឆាប់រហ័ស ព្រោះតាមការសិក្សារបស់ក្រសួង អំពីក្របខ័ណ្ឌយុទ្ធសាស្ត្រអភិវឌ្ឍន៍ទីក្រុងនៅកម្ពុជា បានរកឃើញថា ចំនួនប្រជាជនរស់នៅរាជធានី ក្រុង និង ទីប្រជុំជននៅឆ្នាំ២០១៤ មានចំនួន៤,៥លាននាក់ ស្មើនឹង២៧,១% និងបន្តកើនឡើងដល់៧,៩២លាននាក់នៅឆ្នាំ២០៣០ ស្មើនឹង៤៤%នៃចំនួនប្រជាជនកម្ពុជាសរុប ។
តាមទិន្នន័យនេះបានបង្ហាញឲ្យឃើញថា សម្រាប់រយៈពេល១៥ឆ្នាំ គិតចាប់ពីឆ្នាំ២០១៥ ដល់២០៣០ តម្រូវការលំនៅឋានសម្រាប់រាជធានី ក្រុង និងទីប្រជុំជនមានប្រមាណ៨០ម៉ឺនលំនៅឋាន ដែលគិតជាមធ្យមមានតម្រូវការប្រមាណ៥ម៉ឺនលំនៅឋានក្នុងមួយឆ្នាំ ។
លោក ប៉ែន សុផល បានបន្តថា ឆ្លើយតបនឹងបញ្ហានេះក្រសួងបាននិងកំពុងសកម្មអនុវត្តគោលនយោបាយជាតិ ស្តីពីការរៀបចំដែនដី ក្នុងការកសាងផែនការរៀបចំដែនដីប្លង់គោល និងផែនការប្រើប្រាស់ដីគ្រប់កម្រិត និងគោលនយោបាយជាតិស្តីពីលំនៅឋាន ពិសេសលំនៅឋានដែលមានតម្លៃសមរម្យជូនមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋដែលមានប្រាក់ចំណូលមធ្យម ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកបដោយចីរភាព និងសមធម៌ ៕
ចែករំលែកព័តមាននេះ