ខេត្តបន្ទាយមានជ័យ ៖ មានការកត់សម្គាល់ថា រាល់ថ្ងៃនេះ ក្រុមឈ្មួញបាននាំជ្រូកវៀតណាមចូលមកលក់ចែកចាយនៅក្នុងភូមិសាស្ត្រខេត្តបន្ទាយមានជ័យយ៉ាងគគ្រឹកគគ្រេង ដោយគ្មានការទប់ស្កាត់ទេ ។ ក្រុមហ៊ុនដែលនាំជ្រូកចូលមាន៣ក្រុមហ៊ុន ហើយក្នុងមួយថ្ងៃ ត្រូវបាននាំចូលប្រមាណជាង២០០ក្បាល ជាហេតុធ្វើឱ្យទីផ្សារជ្រូកក្នុងស្រុកធ្លាក់ថ្លៃយ៉ាងគំហុក ។
តាមប្រភពបានឱ្យដឹងថា នៅក្នុងទឹកដីខេត្តបន្ទាយមានជ័យរយៈពេលជាង២ទៅ៣ខែមកនេះ ឃើញមានសកម្មភាពនាំជ្រូកវៀតណាមចូលមកលក់ចែកចាយយ៉ាងគគ្រឹកគគ្រេង ខណៈឃើញសារព័ត៌មាននៅប្រទេសចិនបានកប់ជ្រូកនិងគោ-ក្របីដែលនាំចូលពីប្រទេសវៀតណាម ហើយច្រកនាំចេញទៅចិនត្រូវបានបិទ ដូច្នេះជ្រូកវៀតណាមទាំងនោះក៏ហូរចូលមកស្រុកខ្មែរតែម្តង ។
ប្រជាកសិករ និងម្ចាស់កសិដ្ឋានចិញ្ចឹមជ្រូកក្នុងស្រុកបានប្រាប់ថា កាលពីឆ្នាំ២០១៦ និងដើមឆ្នាំ២០១៧កន្លងទៅ ទាំងប្រជាកសិករនិងកសិដ្ឋានចិញ្ចឹមជ្រូកក្នុងស្រុកលក់បានក្នុងតម្លៃសមរម្យ អាចនឹងឆ្លើយតបតាមតម្រូវការទីផ្សារក្នុងប្រទេសបាន ។ ប៉ុន្តែរយៈពេល២ទៅ៣ខែនេះ ក្រោយពេលឈ្មួញនាំជ្រូកចូលពីប្រទេសវៀតណាមមកលក់ចែកចាយយ៉ាងគគ្រឹកគគ្រេង ធ្វើឱ្យទីផ្សារជ្រូកចិញ្ចឹមក្នុងស្រុកដូចជាជ្រូកប្រជាកសិករចិញ្ចឹម និងជ្រូកកសិដ្ឋាននានាប្រឈមនឹងការធ្លាក់ចុះលក់ជ្រូករស់១គីឡូក្រាម តម្លៃ៦.៥០០រៀល ហើយគ្មានអ្នកទិញទៅទៀត ។ អ្នកចិញ្ចឹមជ្រូកក្នុងស្រុកបានសំណូមពរសុំឱ្យរាជរដ្ឋាភិបាលកម្ពុជា និងក្រសួងជំនាញមានវិធានការទប់ស្កាត់ការនាំចូលជ្រូកពីប្រទេសជិតខាង ដើម្បីលើកកម្ពស់ការចិញ្ចឹមសត្វក្នុងស្រុកនិងកាត់បន្ថយការចំណាកស្រុករបស់អ្នកស្រុក ។
លោកហ៊ុយ ទូច ប្រធានការិយាល័យផលិតកម្មបសុព្យាបាលខេត្តបន្ទាយមានជ័យបានប្រាប់ថា នៅទូទាំងខេត្តក្នុងឆ្នាំ២០១៧នេះមានជ្រូកចិញ្ចឹមក្នុងស្រុកសរុបប្រមាណជាង៨ម៉ឺនក្បាល ក្នុងនោះមានកសិដ្ឋានចំនួន៦កន្លែង និងប្រជាពលរដ្ឋចិញ្ចឹមជាលក្ខណៈគ្រួសារផងដែរ ។ ការចិញ្ចឹមជ្រូកក្នុងស្រុកបើប្រៀបធៀបឆ្នាំ២០១៦និង២០១៧ មានការថយចុះប្រមាណ២០% ហើយទីផ្សារលក់ជ្រូកក្នុងស្រុកជ្រូករស់ ជ្រូកកសិដ្ឋាន១គីឡូក្រាមតម្លៃ៦.៨០០រៀល និងជ្រូកប្រជាកសិករចិញ្ចឹម១គីឡូក្រាម តម្លៃ៦.៦០០រៀល រីឯជ្រូកវៀតណាម១គីឡូក្រាមតម្លៃ៦.៤០០រៀល ។
លោកបានបញ្ជាក់ថា ជ្រូកដែលនាំចូលពីប្រទេសវៀតណាមមកចែកចាយក្នុងខេត្ត មួយថ្ងៃមាន២១០ក្បាលដែលមាន៣ក្រុមហ៊ុននាំចូល។ ការនាំចូលជ្រូកវៀតណាមលក់ចែកចាយក្នុងខេត្តបន្ទាយមានជ័យ គឺមានការត្រួតពិនិត្យពីមន្ត្រីជំនាញហើយមានលិខិតស្នាមនិងឯកសារគ្រប់គ្រាន់ក្នុងការនាំចូលទើបលក់ចែកចាយបាន ។
លោក ហ៊ុយ ទូច បានបញ្ជាក់ថា កាលពីមុនជ្រូកថៃត្រូវឈ្មួញនាំចូលមកលក់ចែកចាយក្នុងខេត្ត តែក្រោយពេលជ្រូកវៀតណាមនាំចូលលក់ក្នុងតម្លៃទាបជាង ឈ្មួញក៏លែងនាំចូលជ្រូកថៃទៅ និងកំពុងប៉ះពាល់ទីផ្សារជ្រូកក្នុងស្រុករហូតដល់ពេលនេះ ។ លោក ថង ធីណា ប្រធានមន្ទីរពាណិជ្ជ កម្មខេត្តបានបញ្ជាក់ថា បញ្ហាទីផ្សារជ្រូក ក្នុងស្រុកនៅឆ្នាំ២០១៧នេះមានការធ្លាក់ចុះរហូតដល់ប្រជាពលរដ្ឋខ្លះដែលធ្លាប់ចិញ្ចឹមជ្រូកក៏បោះបង់ការចិញ្ចឹម ងាកទៅរកការងារធ្វើនៅប្រទេសថៃវិញ ព្រោះតែជ្រូកវៀតណាមនាំចូលយ៉ាងគំហុកវាយលុកក្នុងទីផ្សារខេត្តមួយនេះ ៕
ចែករំលែកព័តមាននេះ