អតីតតារាសម្តែងនាទសវត្សន៍ឆ្នាំ៩០ លោក សុវណ្ណ មុន្នី បានបង្ហាញវត្តមានមកលេងស្រុកខ្មែរជាថ្មីម្តងទៀត បន្ទាប់ពីលោកបានចាកចេញទៅសាងជីវភាពថ្មីនៅលើទឹកដី
រាជធានីភ្នំពេញ ៖ អតីតតារាសម្តែងនាទសវត្សន៍ឆ្នាំ៩០ លោក សុវណ្ណ មុន្នី បានបង្ហាញវត្តមានមកលេងស្រុកខ្មែរជាថ្មីម្តងទៀត បន្ទាប់ពីលោកបានចាកចេញទៅសាងជីវភាពថ្មីនៅលើទឹកដីអាមេរិកប្រមាណជិត២០ឆ្នាំមកនេះ។
លោកបានមកដល់ស្រុកខ្មែរនៅវេលាម៉ោង១២យប់ ថ្ងៃទី២៤ ខែធ្នូ ឆ្នាំ២០២២នេះ ក្នុងដំណើរកំសាន្ត និងស្នាក់នៅទឹកដីកំណើតរយៈពេល៣សប្តាហ៍។ លោក សុវណ្ណ មុន្នី បានអះអាងប្រាប់កោះសន្តិភាពតាមសារអេឡិចត្រូនិចថា ការមកលេងស្រុកខ្មែរនាពេលនេះ គឺជាលើកទី៥ហើយ ខណៈពេលលើកនេះ លោកមកតែម្នាក់ឯងតែប៉ុណ្ណោះ ពោលគឺមិនបានមកទាំងគ្រួសារដូចជាលើកមុនៗឡើយ។
លោកបញ្ជាក់ថា គោលបំណងសំខាន់ដែលលោកមកលេងស្រុកខ្មែរនាពេលនេះ គឺមិនខុសពីលើកមុនៗឡើយ គឺលោកមកលេងគ្រួសារ និងមិត្តភក្តិ ដោយសារតែលោកមានការនឹករលឹកពួកគេដែលបែកគ្នាយូរ។ លោកថា សម្រាប់ការមកលើកនេះ លោកមកលេងមិនបានស្នាក់នៅយូរដូចលើកមុនៗឡើយ គឺលោកស្នាក់នៅរយៈពេល៣សប្តាហ៍ប៉ុណ្ណោះ ដោយសារលោកត្រូវមានធុរៈចាំបាច់នៅឯស្រុកអាមេរិក ហើយលោកនឹងឡើងយន្តហោះទៅវិញនៅថ្ងៃទី១១ ខែមករា ឆ្នាំ២០២២ខាងមុខនេះ។
ក្នុងវ័យ៥៤ឆ្នាំ លោក សុវណ្ណ មុន្នី បានលើកឡើងថា លោកបានចេញទៅរស់នៅអាមេរិកប្រមាណជា២០ឆ្នាំហើយ តែលោកនៅតែនឹករលឹកមិត្តភក្តិ និងទឹកដីកំណើតជានិច្ច ហើយលោកតែងតែឆ្លៀតពេលទំនេរមកលេងស្រុកកំណើតជាបន្តបន្ទាប់។ លោកបន្ថែមថា ការមកលេងស្រុកខ្មែរម្តងៗ លោកសង្កេតឃើញពីកាអភិវឌ្ឍន៍របស់ប្រទេសជាតិមានការរីកចម្រើនថ្មីៗជាបន្តបន្ទាប់ ដែលធ្វើអោយលោកស្ទើរតែលេងស្គាល់ទីកន្លែងចាស់ដែលលោកធ្លាប់នៅ។
យ៉ាងណាបើតាមលោក សុវណ្ណ មុន្នី ថា លោកពិតជាមានអារម្មណ៍រីករាយនៅពេលបានមកលេងស្រុកកំណើតម្តងៗ ហើយបើមានឱកាសលោកនឹងចូលរួមថតភាពយន្តជាថ្មី ប្រសិនបើផលិតកម្មណាមួយចង់អោយលោកចូលរួមសម្តែង។
ជាការកត់សម្កាល់ អ្នកនិយមទស្សនាភាពយន្តខ្មែរនាទសវត្សន៍ឆ្នាំ៩០ ប្រាកដជាបានស្គាល់តារាសម្តែងលោក សុវណ្ណ មុន្នី ដែលលោកគឺជាតារាមួយរូប ដែលមានឈ្មោះល្បីដូចទៅនឹងតារារួមជំនាន់មានដូចជា ៖ លោក ទេព រិនដារ៉ូ, លោក យុត្ថារ៉ា ឆានី, លោក សម តារា, លោក យស បូវណ្ណៈ និងលោក ខៃ ប្រសិទ្ធ ជាដើម ។ល។ បច្ចុប្បន្នលោកបានកសាងគ្រួសារនៅលើទឹកដីអាមេរិក និងមានកូនចំនួន២នាក់មកហើយ៕
ចែករំលែកព័តមាននេះ