លោក អុល សំអាង បង្ហាញចំណុចពិសេសដែលធ្វើឲ្យក្រុមលោកមានឱកាសម្តែងតាមកញ្ចក់ទូរទស្សន៍
- ភ្នំពេញ
រាជធានីភ្នំពេញ ៖ ប្រធានក្រុមសិល្បៈល្ខោនបាសាក់មហាជន អុលសំអាងវង់ទី១ រាជធានីភ្នំពេញ បានលើកឡើងនូវលក្ខណៈពិសេស នៃការសម្តែងរបស់ក្រុមលោកមួយចំនួនដែលជាហេតុនាំឲ្យក្រុម ត្រូវបានផ្តល់ឱកាសបង្ហាញការសម្តែងតាមរយៈកញ្ចក់ទូរទស្សន៍ជាបន្តបន្ទាប់។
លោក អុល សំអាង បានបញ្ជាក់ថា ការខិតខំប្រឹងប្រែង ការតស៊ូ ភាពស្មោះត្រង់ ជាពិសេសការសម្តែងដែលមានអ្នកជំនាញច្បាស់លាស់ និងរក្សាទម្រង់ដើមនៃល្ខោនបាសាក់នោះជាមូលហេតុចម្បង និងសំខាន់ដែលនាំឲ្យក្រុមរបស់លោកអាចឆក់បានឱកាសសម្តែងតាមការកញ្ចក់ទូរទស្សន៍ជាបន្តបន្ទាប់។
លោក អុល សំអាង បានអះអាងបន្តថា បច្ចុប្បន្ន ក្រុមល្ខោនបាសាក់របស់លោកត្រូវបានលោករដ្ឋមន្ត្រីក្រសួងព័ត៌មានផ្តល់ឱកាសឲ្យសហការជាមួយស្ថានីយទូរទស្សន៍ជាតិកម្ពុជានៅក្នុងការរៀបរៀងល្ខោនបាសាក់ ដើម្បីធ្វើការផ្សព្វផ្សាយទុកជាគំរូ និងឯកសារ និងជាការចូលរួមការអភិវឌ្ឍន៍ និងអភិរក្សសិល្បៈវប្បធម៌ខ្មែរ។
លោកបញ្ជាក់ថា ជាការពិតការល្ខោនបាសាក់ គឺមានការពិបាកណាស់នៅក្នុងការចងក្រង និងប្រមែប្រមូលជាក្រុមមួយឡើង ប៉ុន្តែក្រុមរបស់លោកនៅតែព្យាយាមបង្កើតក្រុមនេះឡើង ដោយរក្សាទម្រង់ដើមនៃល្ខោនបាសាក់ ដើម្បីធ្វើជាគំរូ ដើម្បីចូលរួមអភិវឌ្ឃន៍ លើកកម្ពស់វិស័យសិល្បៈល្ខោនបាសាក់ខ្មែរ។
យ៉ាងណា បើតាម លោក អុល សំអាង ថា ក្នុងពេលដែលក្រុមរបស់លោកបានខិតខំផ្សព្វផ្សាយការសម្តែងតាមទម្រង់ដើមនៃល្ខោនបាសាក់ខ្មែរនាពេលនេះ លោកក៏បានសង្កេតឃើញមានក្រុមវង់ល្ខោនមហាជនមួយចំនួនបានកែប្រែទម្រង់ល្ខោនបាសាក់ ដោយមានការខុសឆ្គង ដែលនោះ គឺក្តីបារម្ភ។
លោកបញ្ជាក់ថា តាមការកត់សម្គាល់ លោកឃើញមានវង់ល្ខោនបាសាក់មហាជនមួយចំនួនបានសម្តែងដោយមានភាពក្លាយខុសពីទម្រង់ដើម ដែលនោះជាហេតុនាមឲ្យល្ខោនបាសាក់កាន់តែបាត់ប្រជាប្រិយភាព។ លោកថា ខ្ញុំមានការព្រួយបារម្ភពីរឿងនេះ ព្រោះទៅថ្ងៃអនាគតប្រសិនបើមានការសម្តែងល្ខោនក្លាយទៅៗនោះ វានឹងធ្វើឲ្យបាត់បង់ទម្រង់ដើមដែលដូនតាខ្មែរបន្សល់ទុកអោយ។ កត្តានេះក៏អាចជះឥទ្ធិពលមិនល្អ ដែលនាំឲ្យល្ខោនបាសាក់ខ្មែរបាត់បង់ប្រជាប្រិយភាព ស្របពេលដែលបច្ចុប្បន្នបច្ចេកវិជ្ជាកាន់តែទំនើប ហើយយុវជនកម្ពុជាហាក់មិនសូវអើពើ និងជួយគាំទ្រសិល្បៈនេះផងនោះ។
លោកបន្ថែមថា បើនៅតែបន្តធ្វើរឿងខាងលើ ហើយប្រសិនបើយើងនៅតែបណ្តោយអោយមហាជនមិនគាំទ្រទម្រង់សិល្បៈល្ខោនបាសាក់បែបនេះ នោះវានឹងនាំឲ្យយើងបាត់បង់ព្រលឹង និងខឿនវប្បធម៌ជាតិ ខណៈពេលដែលខ្មែរជាពូជពង្សមហានគរដែលធ្លាប់មានអរិយធម៌ដ៏រុងរឿង។ យ៉ាងណាក្នុងនាមជាប្រតិបត្តិករមួយរូបនោះ ក្នុងវិស័យសិល្បៈមួយនេះ លោកនៅតែខិតខំធ្វើយ៉ាងណាប្រមែប្រមូលពូនផ្តុំអ្នកសិល្បៈដែលមានចំណេះជំនាញពិតប្រាកដ ដើម្បីចងក្រងយកមកចូលរួមសម្តែងនៅក្នុងក្រុមរបស់លោកដោយរក្សាទម្រង់ដើមនៃល្ខោនបាសាក់ខ្មែរ ដើម្បីធ្វើជាគំរូ បើទោះបីជាពេលខ្លះក្រុមរបស់លោកនៅខ្វះខាតថវិកា និងបញ្ហាបច្ចេកទេសមួយចំនួនក្តី។
ជាការកត់សម្គាល់ រហូតមកដល់បច្ចុប្បន្ន ក្រុមល្ខោនបាសាក់របស់លោក អុល សំអាង បានសហការជាមួយស្ថានីយទូរទស្សន៍ជាតិកម្ពុជា នៅក្នុការផលិតរឿងល្ខោនបាសាក់ជាបន្តបន្ទាប់ ដោយនៅក្នុងនោះសម្រាប់ឆ្នាំថ្មីនេះ ក្រុមរបស់លោកក៏បានផលិតរឿងថ្មី គឺរឿងទិព្វសង្វារ ផងដែរ៕
ចែករំលែកព័តមាននេះ