អាមេរិក ៖ ឆ្កែមួយក្បាលដែលបា.ត់ខ្លួនពីផ្ទះរបស់ម្ចាស់វាក្នុងរដ្ឋ California អស់រយៈពេល ១៤ខែបានបង្ហាញខ្លួនវិញនៅក្នុងរដ្ឋ Kansas ចំងាយប្រហែល ១.៦០០ម៉ាយ (២.៥០០គីឡូម៉ែត្រ) ពីផ្ទះរបស់វា ហើយវាកំពុងត្រូវបានគេបញ្ជូនត្រឡប់មកផ្ទះវិញ។
ស្ត្រីជាម្ចាស់ឆ្កែ Sandra O’Neil បាននិយាយថាឆ្កែរបស់គាត់ឈ្មោះ Zeppelin ពេលខ្លះបាត់ ដោយសារវារត់ចេញពីផ្ទះ ទៅលេងនៅការដ្ឋានសាងសង់មួយកន្លែង ប៉ុន្តែវាតែងតែត្រឡប់មកផ្ទះវិញនៅពេលល្ងាច ប្រសិនបើគាត់មិនឃើញវានៅកន្លែងសាងសង់ ។
ប៉ុន្តែគាត់និយាយថា សត្វឆ្កែ Zeppelin មិនបានត្រឡប់មកផ្ទះវិញសោះនៅយប់មួយនៅខែតុលា ឆ្នាំ ២០២១។
មិនមានដានរបស់វាសោះអស់រយៈពេល ១៤ខែ រហូតដល់ស្ត្រីម្នាក់មកពីទីក្រុង Louisburg បានយកឆ្កែមួយក្បាលទៅកាន់គ្លីនិក Wildcat Veterinary Clinic ដោយពន្យល់ថាគាត់បានរកឃើញឆ្កែនោះនៅលំនៅដ្ឋានរបស់គាត់កាលពីល្ងាចមួយ។
ខាងគ្លីនិកបានស្កេនបន្ទះឈីបនៅលើខ្លួនរបស់វា និងបានដឹងថាវាមានឈ្មោះ Zeppelin ដែលជាឆ្កែបាត់ពីផ្ទះយូរមកហើយ។
ម្ចាស់ឆ្កែបាននិយាយថា គាត់ពិតជាមានការភ្ញាក់ផ្អើលយ៉ាងខ្លាំងនៅពេលដឹងថាឆ្កែរបស់គាត់នៅក្នុងរដ្ឋ Kansas។
ខាងគ្លីនិកសត្វរកបានអ្នកស្ម័គ្រចិត្តម្នាក់ឈ្មោះ Mary Hastings ដែលបានរៀបចំដឹកវាត្រឡប់ទៅកាន់រដ្ឋ California វិញបន្ទាប់ពីមកលេងកូនស្រីរបស់គាត់នៅក្នុងរដ្ឋ Kansas។
ខាងគ្លីនិកបញ្ជាក់នៅលើផេកហ្វេសបុករបស់ខ្លួនថា ឆ្កែឈ្មោះ Zeppelin និងអ្នកស្រី Mary Hastings បានចាកចេញកាលពីថ្ងៃអាទិត្យក្នុងដំណើរលើចំងាយផ្លូវ ១.៦០០ម៉ាយ ដោយគាត់ត្រូវគេរំពឹងថានឹងទៅដល់ផ្ទះនៅថ្ងៃបុណ្យណូអែល៕ (យោងតាមប្រភព៖ UPI)
ចែករំលែកព័តមាននេះ