ពិតជាគំរូល្អ និងគួរឲ្យស្ងើចសរសើរខ្លាំងណាស់ ដែលតារាសម្ដែងស្រីដ៏ល្បីឈ្មោះ និងមានប្រជាប្រិយភាពខ្ពស់មិនធម្មតា ដែលអាចដើរតួសម្ដែងបានគ្រប់ទម្រង់ និងត្រូវជាតួអង្គសម្ដែងក្នុងរឿង «ជីវិតក្មេងវត្ត» គឺកញ្ញា
រាជធានីភ្នំពេញ ៖ ពិតជាគំរូល្អ និងគួរឲ្យស្ងើចសរសើរខ្លាំងណាស់ ដែលតារាសម្ដែងស្រីដ៏ល្បីឈ្មោះ និងមានប្រជាប្រិយភាពខ្ពស់មិនធម្មតា ដែលអាចដើរតួសម្ដែងបានគ្រប់ទម្រង់ និងត្រូវជាតួអង្គសម្ដែងក្នុងរឿង «ជីវិតក្មេងវត្ត» គឺកញ្ញា នីតាវរវង្ស ទទួលបានគ្រឿងឥស្សរិយយសថ្នាក់ខ្ពស់មួយ ក្រោយតារាស្រីរូបនេះ បានបរិច្ចាគថវិការផ្ទាល់ខ្លួនចូលរួមចំណែកក្នុងវិស័យព្រះពុទ្ធសាសនា។
ជាការពិតណាស់ នាព្រឹកថ្ងៃទី១៧ ខែធ្នូ ឆ្នាំ២០២២ ម្សិលមិញនេះ គឺជាពិធីសម្ភោធកុដិមួយខ្នង និងសមិទ្ធផលនានាក្នុងវត្តតាំងក្រសាំងខាងជើង ស្ថិតក្នុងសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់ សម្ដេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា និងឯកឧត្តម ទេព ងន អនុប្រធានទី២ ព្រឹទ្ធសភា នៃព្រះរាជាណាចក្រកម្ពុជា។ ជាមួយគ្នានោះ ក៏នឹងមានការបំពាក់គ្រឿងឥស្សរិយយស ទៅដល់សប្បុរសជនដែលបានចូលរួមចំណែកកសាងសមិទ្ធផលជាច្រើន ក្នុងទីវត្តអារាមតាំងក្រសាំងខាងជើងផងដែរ។ សប្បុជនដែលត្រូវបានបំពាក់គ្រឿងឥស្សរិយយស ក្នុងនោះមានចំនួន៤៧រូប ហើយគ្រឿងឥស្សរិយយស ក៏មានបំពាក់តាមលំដាប់ថ្នាក់ផងដែរ។
យ៉ាងណាមិញ ក្រឡេកមកមើល កញ្ញា នីតាវរវង្ស ដែលជាតារាស្រីមួយរូប មានចិត្តសប្បុរសធម៌ ចូលចិត្តបរិច្ចាគថវិការផ្ទាល់ខ្លួន ចូលរួមចំណែកជួយដល់កិច្ចការងាសង្គមឯណេះវិញ ក៏ត្រូវបានឯកឧត្តម ទេព ងន អនុប្រធានទី២ ព្រឹទ្ធសភា នៃព្រះរាជាណាចក្រកម្ពុជា បំពាក់គ្រឿងឥស្សរិយយស ព្រះរាជាណាចក្រកម្ពុជា ថ្នាក់ មហាសេរីវឌ្ឍន៍ ជូនកញ្ញាដោយផ្ទាល់តែម្ដង។
ទន្ទឹមនឹងការទទួលបានគ្រឿងឥស្សរិយយសថ្នាក់ មហាសេរីវឌ្ឍន៍ គឺធ្វើឡើងបន្ទាប់ពីកញ្ញា នីតា វរវង្ស បានចូលរួមចំណែកក្នុងវិស័យព្រះពុទ្ធសាសនា បរិច្ចាគធនធានផ្ទាល់ខ្លួនមួយចំនួនធំ ជួយកសាងសមិទ្ធផលនានា នៅវត្តតាំងក្រសាំងខាងជើង។
បើតាមរយៈបទសម្ភាសន៍ជាមួយសារព័ត៌មានកោះសន្តិភាព តារាសម្ដែងស្រី កញ្ញា នីតា វរវង្ស បានបង្ហាញអារម្មណ៍សប្បាយរីករាយ និងរំភើបចិត្តយ៉ាងខ្លាំង ដែលបានចូលរួមចំណែកកសាងសមិទ្ធផលនានា ក្នុងវិស័យព្រះពុទ្ធសាសនា ហើយកញ្ញាក៏បានថ្លែងអំណអរគុណយ៉ាងក្រៃលែងចំពោះ ឯកឧត្តម ទេព ងន ដែលបានបំពាក់គ្រឿងឥស្សរិយយស ព្រះរាជាណាចក្រកម្ពុជា ថ្នាក់ មហាសេរីវឌ្ឍន៍ ជូនកញ្ញាដផយផ្ទាល់។
គួរបញ្ជាក់ផងដែតថា នេះមិនមែនជាលើកទី១នោះឡើយ ដែលតារាសម្ដែងស្រីរូបនេះ បានចូលរួមចំណែកក្នុងវិស័យព្រះពុទ្ធនោះ ពោលគឺកន្លងមក កញ្ញាក៏ធ្លាប់ចូលរួមចំណែកកសាងសមិទ្ធផលនានាតាមទីវត្តអារាម និងសកម្មយ៉ាងខ្លាំងក្នុងការរួមជួយដល់កិច្ចការសង្គមជាតិ តាមរយៈការបរិច្ចាគធនធានផ្ទាល់ខ្លួនជាដើម៕
ចែករំលែកព័តមាននេះ