អស្ចារ្យណាស់! ស្នាដៃចម្លាក់ក្បាច់អង្គរដ៏ល្អឯកនៃជាងចម្លាក់ខ្មែរស្នងត្រកូលពីលោកតា
- កណ្តាល
ខេត្តកណ្ដាល ៖ ជាជាងចម្លាក់ដោយដៃទាមទារឲ្យមានទេពកោសល្យខ្ពស់ ទឹកចិត្តស្រឡាញ់ ការតស៊ូអត់ធ្មត់ខ្លាំង ទើបអាចហាត់រៀនឆ្លាក់ប្រាក់ឆ្លាក់ស្ពាន់ ដែលមើលទៅធម្មតាឲ្យក្លាយជាគ្រឿងប្រាក់ គ្រឿងស្ពាន់ដែលមានតម្លៃមានចម្លាក់ល្អឯក រូបឆ្លាក់ឡើងដូចផុសមកពិតៗ និងស្រស់ស្អាត។
តួយ៉ាងលោកតា ជា យុទ្ធា ជាជាងចម្លាក់ដែលមានទឹកដៃដ៏លេចធ្លោមួយរូប បានស្នងត្រកូលរបស់លោកតា ក្នុងការបន្តស្នាដៃចម្លាក់ ពិសេសលោកតា បានបង្ហាញស្នាដៃដ៏អស្ចារ្យ ដោយឆ្លាក់តាមក្បាច់អង្គរ និងក្បាច់ផ្កាភ្ញីផ្សេងៗគួរឱ្យគយគន់ រហូតប្រែក្លាយឃុំវិហាហ្លួង ឱ្យបងប្អូនខ្មែរទាំងក្នុងនៅក្រៅប្រទេសបានស្គាល់ច្រើនឡើងៗ។
ស្ថិតក្នុងវ័យ ៦៨ឆ្នាំ លោកតា ជា យុទ្ធា ជាជាងចម្លាក់ប្រាក់ស្ពាន់ រស់នៅក្នុងភូមិសាលាកាត់សក់ ឃុំវិហាហ្លួង ស្រុកពញ្ញាឮ ខេត្តកណ្ដាល ក្បែរច្រកចូលរមណីយដ្ខានប្រវត្តិសាស្ត្រ «ឧដុង្គ»។ ទោះស្ថិតក្នុង៦០ក្រាស់ក៏ពិតមែន តែលោកតា ជា យុទ្ធា ដែលមានសំបុររាងស្រអែម មាឌធំមាំខ្ពស់ នៅតែពេញដោយកម្លាំងកាយនិងកម្លាំងចិត្តយ៉ាងមុះមុត ក្នុងការបន្តធ្វើការងារដែលលោកស្រលាញ់ ពិសេសជាស្នាដៃដែលតពីដូនតារបស់លោកតែម្តង។
ស្ថិតក្នុងសម្លៀកបំពាក់អាវយឺតដៃខ្លីពណ៌ខ្មៅ សក់របាយអាចម៌ខ្លា ថែមបង់កក្រម៉ាខ្មែរ និងពាក់វ៉ែនតាផងនោះ លោកតា ជា យុទ្ធា បានពោលមកកាន់អ្នកសារព័ត៌មានបណ្តើរ ដៃកំពុងកំពុងកាន់ដង្កៀប កៀបស្ពាន់លឿងដែលបានធ្លាក់ជាសន្លឹកពពិល កំពុងតដុតលើរងើកភ្លើងបណ្តើរថា ការរៀនឆ្លាក់មិនមែនជារឿងងាយនោះទេ គឺទាមទារនូវការអំណត់ ការផ្ជង់អារម្មណ៍ខ្លាំងបំផុតទើបអាចឆ្លាក់ចេញជាចម្លាក់បានស្អាតល្អ។
លោកតាបានមានប្រសាសន៍បន្តថា លោកតាមានចិត្តស្រឡាញ់ការដាប់ និងចង់ចេះឆ្លាក់តាំងពីដឹងក្ដីមកម្លេះ បើទោះបីជាកាលពីសម័យនោះ មិនទាន់មានគេមើលឃើញពីស្នាដៃ និងតម្លៃការចម្លាក់ដោយដៃយ៉ាងណាក្ដី។ លោកតា ជា យុទ្ធា បានពោលបន្ថែមថា «ស្នាដៃចម្លាក់ពីដំបូងឡើយ គឺលក់អត់ដាច់ទេ។ លក់ឲ្យថៅកែហាង គេឲ្យតម្លៃយើងថោក គេថាលក់អត់ដាច់ដែរហ្នឹង ទើបគេទិញក្នុងតម្លៃធូរថ្លៃ ខណៈការឆ្លាក់ជារូបផ្សេងៗលើស្ពាន់ ឬប្រាក់ទាមទារនូវពេលវេលា ភាពអត់ធ្មត់និងទឹកដៃខ្លាំង!»។
យ៉ាងណាមិញរហូតមកទល់ពេលបច្ចុប្បន្ននេះ ការខិតខំប្រឹងប្រែងថែរក្សាស្នាដៃរបស់លោកតាទទួលបានលទ្ធផល ដោយស្នាដៃចម្លាក់របស់លោកតា ត្រូវបានគេទទួលស្គាល់ និងកោតសរសើរមិនដាច់ពីមាត់ ថាលោកតាពិតជាមានទេពកោសល្យខ្ពស់ និងសមត្ថភាពដ៏កម្រមួយនេះ ដោយការឆ្លាក់របស់លោកតា ដកស្រង់ចេញពីក្បាច់នៅអង្គរ។
«កន្លែងខ្ញុំឆ្លាក់តែក្បាច់អង្គរទេ ទាល់តែគេកម្មង់ជាភ្ញីទេស បានខ្ញុំឆ្លាក់ភ្ញីទេសឲ្យគេ» ។ នេះជាការបញ្ជាក់របស់លោកតា។ ជាងចម្លាក់ដែលមានបទពិសោធន៍ជាង ៥ ទសវត្ស រូបនេះបានបន្តថា «ក្បាច់ខ្លះឆ្លាក់ឡើង ដោយបញ្ជាក់ពីអត្ថន័យត្រជាក់ត្រជុំ ហើយការឆ្លាក់នីមួយៗត្រូវចំណាយពេលរាប់ខែ ដោយទាមទារឲ្យជាងមានការអត់ធ្មត់ ផ្ចិតផ្ចង់ តស៊ូបន្តិចទើបចម្លាក់ល្អឯកដូចផុសមកពិតៗ»។
ងាកមកស្ថានភាពគ្រួសាររបស់លោកតាវិញ លោកតា ជា យុទ្ធា បានបញ្ជាក់លោកតារីករាយដែលមានកូនៗបានបន្តរៀនស្នាដៃចម្លាក់ពីលោកតា ដូច្នេះលោកតាក៏បានព្យាយាមបង្រៀនកូន ចៅ ឱ្យចេះស្ទាត់ជំនាញដើម្បីស្នងត្រកូលបន្តពីលោកតា ដោយសារតែបច្ចុប្បន្នេះ លោកតាវ័យក៏កាន់តែមានវ័យចាស់ ហើយកូនៗរបស់លោកតាក៏ចេះនិងមានជំនាញប្រហាក់ប្រហែលលោកតា អាចស្នងស្នាដៃជំនួសលោកតាបានហើយ។
ចំណែកឯចៅៗ លោកតាក៏បានបង្រៀនបណ្ដើរៗហើយដែរ ព្រោះលោកតាពិតជាមិនចង់ឲ្យស្នាដៃចម្លាក់របស់លោកតា ត្រូវបាត់បង់ទៅតាមលោកតាឡើយ ជារួមគឺលោកតាបានមានប្រសាសន៍ថា ដរាបណាលោកតានៅមានជីវិតនឹងជម្រុញកូនៗចៅបន្តស្នាដៃនេះ ហើយថ្ងៃណាមួយដែលលោកតា អស់ជីវិតពីលើលោកនេះទៅ ក៏លោកតាអាចបន្សល់ទុកនូវស្នាដៃចម្លាក់របស់លោកតា ដែលជាដួងព្រលឹង និងស្នាដៃដែលមិនអាចបំភ្លេចបាន៕
ចែករំលែកព័តមាននេះ