មានខ្សែភ្លើងរត់កាត់លើដំបូលផ្ទះរាប់ឆ្នាំមកហើយ តែមិនមានអគ្គិសនីប្រើដដែល
ខេត្តស្វាយរៀង ៖ ប្រជាពលរដ្ឋរាប់រយគ្រួសាររស់នៅភូមិសំដី ឃុំធ្លក ស្រុកស្វាយជ្រុំ ខេត្តស្វាយរៀង រាប់រយគ្រួសារមានខ្សែភ្លើងរត់កាត់លើដំបូលផ្ទះ
ខេត្តស្វាយរៀង ៖ ប្រជាពលរដ្ឋរាប់រយគ្រួសាររស់នៅភូមិសំដី ឃុំធ្លក ស្រុកស្វាយជ្រុំ ខេត្តស្វាយរៀង រាប់រយគ្រួសារមានខ្សែភ្លើងរត់កាត់លើដំបូលផ្ទះ ផ្ទះខ្លះបង្គោលភ្លើងស្ទើតែដាក់លើដំបូលផ្ទះ ក៏ប៉ុន្តែបែរជាមិនមានភ្លើងប្រើប្រាស់។ ប្រជាពលរដ្ឋលើកឡើងថា បង្គោលភ្លើង និងខ្សែភ្លើង បានដាក់ពង្រាយកាត់លើដំបូលផ្ទះរបស់ពួកគាត់អស់រយៈពេលជាង២ឆ្នាំមកហើយ ដោយបានឮដំណឹងមកថា ហ្នឹងមានភ្លើងប្រើឆាប់ៗ តែដំណឹងមួយនេះឮរហូត តែអ្នកភូមិនៅតែមិនមានអគ្គិសនីប្រើប្រាស់ ហើយពលរដ្ឋមួយចំនួនអស់ជម្រើស ពួកគាត់ក៏នាំគ្នាទិញបន្ទះសឡា ដាក់ប្រើប្រាស់ជំនួសវិញ។
ពលរដ្ឋបន្តថា នៅពេលរៀបចំបោះបង្គោលភ្លើង អ្នកដាំ បានរៀបគម្រោងដាំលើដំបូលផ្ទះរបស់ពួកគាត់តែម្តង ក៏ប៉ុន្តែនៅពេលមានការអង្វរពីម្ចាស់ផ្ទះ ទើបអ្នកដែលមកដាំបង្គោលបានបង្ខិតបង្គោលភ្លើងទាំងនោះមកនៅជាប់ដំបូលវិញ។ ហើយនៅក្នុងអំឡុងពេលដាំ និងបានដាំបង្គោលរួច អ្នកទាំងនោះក៏បាននិយាយថា ពួកគាត់អាចហ្នឹងបានភ្លើងប្រើឆាប់ៗនេះហើយ តែការពិតពាក្យឆាប់ៗទាំងនោះ ពួកគាត់បានរង់ចាំអស់ពេលជាងពីរឆ្នាំមកហើយនៅតែមិនទាន់បានភ្លើងប្រើប្រាស់ទៀត ហើយអាជ្ញាធរ ភូមិ ឃុំ ក៏អស់លទ្ធភាពស្នើសុំខាងលើដែរ ដោយចម្លើយគឺនៅដដែលជាដដែលគឺ បានភ្លើងប្រើឆាប់ៗ។
ក្រៅអំពីភូមិសំដីទៅ នៅមានភូមិមូយចំនួនទៀតក៏នៅពុំទាន់មានភ្លើងអគ្គិសនីប្រើប្រាស់ដូចគ្នា ដូចជានៅក្នុងឃុំធ្លក ក៏មានពីរ បីភូមិទៀតក៏អត់ដែរ ក៏ប៉ុន្តែមានភូមិមួយចំនួន នៅឃុំពោធិរាជ ស្រុកស្វាយជ្រុំ ខេត្តស្វាយរៀង ព្រំប្រទល់ជាប់គ្នា មានភ្លើងអគ្គិសនីប្រើប្រាស់ ដោយតម្លៃភ្លើងអគ្គិសនី ១គីឡូវ៉ាត់ម៉ោង តម្លៃ ២ពាន់រៀល ហើយពលរដ្ឋស្នើសុំចុះថ្លៃជាងបីឆ្នាំមកហើយ មិនមានចម្លើយទេ គឺតម្លៃនៅដដែល ហើយផ្ទះខ្លះប្រើអស់៣ គីឡូវ៉ាត់ ឬ ៧គីឡូវ៉ាត់ ក្នុងមួយខែ មេភូមិ មេឃុំដើរយក គិត១០គីឡូវ៉ាត់ដែរ៕
ចែករំលែកព័តមាននេះ