ខេត្តព្រះវិហារ ៖ កសិករដែលកំពុងដាំចេកណាំវ៉ា បានត្អូញត្អែរពីរឿងគ្មានទីផ្សារ ហើយតម្លៃចេកធ្លាក់ចុះ ខណៈដែលឆ្នាំនេះ អ្នករស់នៅខេត្តព្រះវិហារសម្រុកនាំគ្នាដាំចេកនេះជាច្រើនហិកតា ព្រោះកន្លងទៅ
ខេត្តព្រះវិហារ ៖ កសិករដែលកំពុងដាំចេកណាំវ៉ា បានត្អូញត្អែរពីរឿងគ្មានទីផ្សារ ហើយតម្លៃចេកធ្លាក់ចុះ ខណៈដែលឆ្នាំនេះ អ្នករស់នៅខេត្តព្រះវិហារសម្រុកនាំគ្នាដាំចេកនេះជាច្រើនហិកតា ព្រោះកន្លងទៅ លក់បានថ្លៃសមរម្យ អាចឲ្យពួកគាត់មានចំណូលគ្រាន់បានដោះស្រាយជីវភាពប្រចាំថ្ងៃ ។
ជុំវិញការធ្លាក់ថ្លៃចេកណាំវ៉ានេះ អ្នកស្រី អឹុម រុន ជាអ្នកដាំចេកនិងជាអ្នកនាំចេញទៅលក់លើទីផ្សារ នៅភូមិបេងកោង ឃុំព្រះឃ្លាំង ស្រុកត្បែងមានជ័យ បានឲ្យដឹងថា បច្ចុប្បន្នកសិករដែលកំពុងសម្រុកដាំចេកនៅខេត្តព្រះវិហារបានត្អូញត្អែរស្ទើរគ្រប់គ្នា ព្រមទាំងព្រួយបារម្ភពីបញ្ហាទីផ្សារចេកណាំវ៉ាធ្លាក់ថ្លៃ ធ្វើឲ្យពួកគាត់ប្រឈមនឹងការខាតបង់ប្រាក់កាសសម្រាប់ផ្គត់ផ្គង់ជីវភាពប្រចាំថ្ងៃ ។
អ្នកស្រីបន្តថា ៖ « បច្ចុប្បុន្ននេះចេកណាំវ៉ាបានធ្លាក់ថ្លៃមកត្រឹម៨០០រៀលក្នុង១ស្និត បើធៀបនឹងឆ្នាំ២០១៦ លក់បានរហូតដល់១.២០០រៀល ទៅ១.៥០០រៀលក្នុង១ស្និត ជាតម្លៃមួយអាចឲ្យកសិករទទួលយកបាន » ។
អ្នកស្រីបញ្ជាក់ថា រៀងរាល់ឆ្នាំអ្នកស្រីទិញពីតំបន់នេះទៅលក់នៅខេត្តសៀមរាប ដើម្បីផ្គត់ផ្គង់ទីផ្សារក្នុងស្រុក ហើយនាំចេញម្តងចាប់ពី៧.០០០ស្និតទៅ១ម៉ឺនស្និត និងក្នុង១ខែនាំចេញ៣ទៅ៤ដង ។ ពីមុនចេកណាំវ៉ានេះ ជាធម្មតា២០ថ្ងៃកាប់ចេញពីចម្ការម្តង តែពេលនេះកសិករខ្លះមានរហូតដល់១ខែ ទៅ១ខែកន្លះ ទើបឈ្មួញបញ្ជាទិញឲ្យកាប់ម្តង ។ រីឯកសិករខ្លះទៀត ពុំមានឈ្មួញទិញធ្វើឲ្យចេកក្នុងចម្ការខ្លះទុំស្អុយតែម្តង ។
អ្នកស្រី អឹុម រុន សំណូមពរដល់រាជរដ្ឋាភិបាល សូមជំរុញញយន្តការយ៉ាងណា ដើម្បីឲ្យកសិផលទាំងអស់នៅខេត្តព្រះវិហារ មានទីផ្សារនិងមានតម្លៃសមរម្យដល់កសិករ ដែលកំពុងដាំដុះដំណាំទាំងអស់នេះឡើងវិញ ។ បើពុំនោះទេ កសិករទាំងអស់ច្បាស់ជាប្រឈមមុខនឹងបញ្ហាសេដ្ឋកិច្ចក្នុងគ្រួសារជាមិនខានឡើយ ។
កសិករម្នាក់ទៀតឈ្មោះ ហ៊ុន រដ្ឋា លើកឡើងថា ដោយសារតែអ្នកបញ្ជាទិញក្នុងស្រុកលក់ចេកដែលនាំចេញពីទឹកដីខេត្តព្រះវិហារពុំទាន់អស់ ទើបធ្វើឲ្យការនាំចេញចេកណាំវ៉ាមានការស្ទះនិងធ្លាក់ថ្លៃ ។ គាត់បានសម្តែងនូវការសោកស្តាយនិងនិយាយថា ប្រសិនបើនៅតែធ្លាក់ថ្លៃទៀត គាត់នឹងប្តូរទៅដាំដំណាំផ្សេងវិញ ដែលអាចទទួលបានផលចំណេញច្រើនជាងដំណាំចេកនេះ ។
លោក ផាន់ សំអាង អនុប្រធានមន្ទីរពាណិជ្ជកម្មខេត្ត បានទទួលស្គាល់ថា ចេកណាំវ៉ាបច្ចុប្បន្ននេះពិតជាធ្លាក់ថ្លៃប្រាកដមែន ហើយកត្តាដែលធ្លាក់ថ្លៃនេះ ដោយសារតែផលចេក មួយចំនួនមានការថយចុះផ្នែកគុណភាពបន្តិច ។ កសិផលទាំងនេះ ពុំទាន់មានការនាំចេញទៅកាន់ ប្រទេសជិតខាងនៅឡើយទេ ដោយបច្ចុប្បន្នកំពុងផ្គត់ផ្គង់នៅក្នុងស្រុក ។
យោងតាមរបាយការណ៍របស់មន្ទីរកសិកម្មរុក្ខាប្រមាញ់ និងនេសាទខេត្ត នៅក្នុងឆ្នាំ២០១៧ នេះ បង្ហាញថា ផ្ទៃដីដាំដុះដំណាំចេកតាមផែនការសរុបប្រមាណជាង៧ពាន់ហិកតា មានផ្ទៃដីប្រហាក់ប្រហែលឆ្នាំ២០១៦ ។ ដោយឡែកកាលពីឆ្នាំ២០១៦កន្លងទៅ ការដាំដុះចេកអនុវត្តបានជាង៦,៨ពាន់ហិកតា ស្មើនឹង១១០,៦៣%នៃផែនការ ហើយការនាំចេញចេកពីទឹកដីខេត្តព្រះវិហារក្នុងឆ្នាំ២០១៦ មានប្រមាណ៥.៩០០តោន ៕
ចែករំលែកព័តមាននេះ