ខេត្តកំពត ៖ ក្រោយពីមានឧបទ្ទវហេតុទូកទេសចរណ៍១គ្រឿងបានលិចបណ្ដាលឲ្យមានអ្នកស្លា.ប់កាលពីប៉ុន្មានខែកន្លងមក ធ្វើឲ្យអាជីវកម្មទូកទេសចរណ៍ដឹកភ្ញៀវទស្សនាកម្សាន្តតាមដងព្រែកមុនថ្ងៃលិច និងមើលសត្វអំពិល
ខេត្តកំពត ៖ ក្រោយពីមានឧបទ្ទវហេតុទូកទេសចរណ៍១គ្រឿងបានលិចបណ្ដាលឲ្យមានអ្នកស្លាប់កាលពីប៉ុន្មានខែកន្លងមក ធ្វើឲ្យអាជីវកម្មទូកទេសចរណ៍ដឹកភ្ញៀវទស្សនាកម្សាន្តតាមដងព្រែកមុនថ្ងៃលិច និងមើលសត្វអំពិលអំពែកនៅពេលរាត្រីក្នុងទីរួមខេត្តកំពតធ្លាក់ចុះ ខណៈពីមុនមកមានទាំងភ្ញៀវទេសចរជាតិ និងអន្តរជាតិជិះកម្សាន្តច្រើន ។
កញ្ញា ស៊ុយ សុភ័ក្រដានី ម្ចាស់ទូកទេសចរណ៍ឆាកគីយោខេត្តកំពត ឲ្យដឹងថា នៅពេលនេះ ចំនួនភ្ញៀវទេសចរជិះទូកកម្សាន្តតាមដងព្រែកមិនច្រើនដូចពីមុនទេ តែបើច្រើន គឺនៅថ្ងៃឈប់សម្រាកដូចជា ថ្ងៃសៅរ៍-អាទិត្យ និងថ្ងៃបុណ្យទានប៉ុណ្ណោះ ទោះជាយ៉ាងណា ក៏នៅមិនស្មើកាលពីប៉ុន្មានខែមុនដែរ ។ កញ្ញានិយាយថា ៖ « ការធ្លាក់ចុះនេះបានចាប់ផ្ដើមក្រោយមានករណីទូកទេសចរណ៍មួយគ្រឿងលិចកាលពីពេលកន្លង ដែលបណ្ដាលឲ្យមានអ្នកស្លាប់ ហើយភ្ញៀវមួយចំនួនអាចភ័យខ្លាច » ។
កញ្ញាបន្តថា ក្រោយពីមានឧបទ្ទវហេតុលិចទូកមក អាជ្ញាធរបានរៀបចំសណ្ដាប់ធ្នាប់ និងច្បាប់ទម្លាប់មួយចំនួនដើម្បីការពារក្រែងមានករណីនោះកើតឡើងម្ដងទៀត ។ ជាក់ស្ដែង អ្នកបើកទូកទាំងអស់ត្រូវមានប័ណ្ណបើកបរ មានការបណ្ដុះបណ្តាលច្បាស់លាស់ ហើយទូកក៏មានឈៀកត្រឹមត្រូវផងដែរ ។ ជាពិសេស អាជ្ញាធរ និងមន្ទីរទេសចរណ៍ខេត្តកំពត បានកំណត់ចំនួនភ្ញៀវទេសចរជិះទូកនីមួយៗច្បាស់លាស់ ធ្វើយ៉ាងណា កុំឲ្យលើសចំណុះដែលទូកអាចផ្ទុកបាន ។
កញ្ញាបន្ថែមថា បន្ទាប់ពីអាជ្ញាធរ និងម្ចាស់ទូកនីមួយៗសហការគ្នារៀបចំឲ្យមានច្បាប់ និងសណ្ដាប់ធ្នាប់ឡើងវិញឃើញថា ចំនួនភ្ញៀវទេសចរមកជិះទូកកម្សាន្តកើនឡើងវិញបន្តិចម្ដងៗ ជាពិសេស នៅថ្ងៃសៅរ៍-អាទិត្យ និងថ្ងៃឈប់សម្រាកម្ដងៗ ក្នុងនោះក៏មានអ្នកខ្លះនាំគ្រួសារ មិត្តភក្តិបងប្អូនមកជាក្រុមរៀបចំជាពិធីជប់លៀងនៅលើទូកផងដែរ ។
កញ្ញានិយាយថា ៖ « ក្នុង១ថ្ងៃ ទូកទេសចរណ៍របស់នាងខ្ញុំ ចេញដំណើរពីម៉ោង៥កន្លះដល់ម៉ោង៧កន្លះល្ងាច ហើយបើមានភ្ញៀវចង់ជិះបន្តទៀត អាចនាំទៅបាន ក្នុងនោះតម្លៃសម្រាប់ភ្ញៀវទេសចរជាតិ១ម៉ឺនរៀល ឬ២,៥ដុល្លារអាមេរិក និងភ្ញៀវទេសចរអន្តរជាតិតម្លៃ២ម៉ឺនរៀល ឬ៥ដុល្លារអាមេរិក ។ នៅលើទូកទេសចរណ៍នីមួយៗក៏មានបម្រើអាហារ និងភេសជ្ជៈទៅតាមការកុម្មង់ផងដែរ »។
លោក អិុត សារី ម្ចាស់ទូកទេសចរណ៍ Lovely នាំភ្ញៀវកម្សាន្តតាមដងព្រែកកំពត ក៏បានលើកឡើងដូចគ្នាដែរថា នៅថ្ងៃធម្មតាមានភ្ញៀវតិចតួចទេ ដែលជិះទូកកម្សាន្តមើលទេសភាព និងស្រូបខ្យល់អាកាសតាមដងព្រែកខេត្តកំពត ប៉ុន្តែសម្រាប់ថ្ងៃសៅរ៍-អាទិត្យ ឬថ្ងៃបុណ្យទាន អាចមានភ្ញៀវច្រើនរហូតដល់៥០នាក់ ហើយបើមានលើសនេះ ក៏មិនអាចដាក់បានដែរ ដើម្បីការពារសុវត្ថិភាពអ្នកដំណើរ ។
លោកបន្តថា លោកទើបតែប្រកបអាជីវកម្មទូកទេសចរណ៍សម្រាប់ដឹកភ្ញៀវទេសចរទស្សនាតាមដងព្រែក បានរយៈពេល៤-៥ខែប៉ុណ្ណោះ ហើយចាប់តាំងពីបើកអាជីវកម្មទូកទេសចរណ៍ ឃើញថា មានភ្ញៀវមកជិះកម្សាន្តជារៀងរាល់ថ្ងៃ ព្រោះតម្លៃសមរម្យ ហើយនាំភ្ញៀវទស្សនា ស្រូបខ្យល់អាកាសតាមដងព្រែក និងមើលអំពិលអំពែកនៅពេលរាត្រីផងដែរ ។
ទេសចរជនជាតិអូស្ត្រាលីម្នាក់ដែលមកទស្សនាក្នុងប្រទេសកម្ពុជា និងជិះទូកលេងកម្សាន្តតាមដងព្រែកខេត្តកំពត និយាយថា ការជិះទូកតាមដងព្រែកនៅខេត្តកំពត ថ្វីដ្បិតតែមិនទំនើប មិនអស្ចារ្យ ប៉ុន្តែទទួលបានខ្យល់អាកាសធម្មជាតិពិតៗ ជាមួយការស្រស់ស្រូបអាហារនៅលើទូកផងដែរ ។ ទេសចរបរទេសរូបនេះនិយាយថា ៖ « តម្លៃជិះទូក និងអាហារនៅលើទូកទាបមែនទែន បើធៀបនឹងបណ្ដាប្រទេសដែលយើងធ្លាប់ទៅ ហើយបើនិយាយពីខ្យល់អាកាសវិញ ក៏ល្អបរិសុទ្ធ ធម្មជាតិពិតៗទៀតផង » ៕
ចែករំលែកព័តមាននេះ