រាជធានីភ្នំពេញ ៖ តារាកំប្លែងអ្នកនាងទេព បុទុមបូផល នៅតែដក់ចិត្តចំពោះសិល្បៈដោយមិនចង់ចាកចោលឡើយ ។ ទោះជាយ៉ាងណាក្តីពេលនេះនាងអាចនឹងលះបង់សិល្បៈ ដើម្បីមើលថែប្តីចាស់មានជំងឺបេះដូងដែលត្រូវទៅនៅបារាំងវិញ ។
តារាកំប្លែងទេព បុទុមបូផល បានសម្តែងការដឹងគុណចំពោះស្វាមីវ័យចំណាស់ដែលខំមើលថែចំណងស្នេហានេះជាមួយនាងជាង១៥ឆ្នាំមិនខ្លាចនឿយហត់ ។ ម្ល៉ោះហើយនាងតាំងចិត្តមើលថែស្នេហារហូតចាស់កោងខ្នង ។
នាងទេព បុទុមបូផល តារាកំប្លែងមាឌល្អិតបានប្រារព្ធពិធីខួបអាពាហ៍ពិពាហ៍គម្រប់ខួប១២ឆ្នាំ ជាមួយលោកអៀង ធី ជាអ្នកជំនួញនៅប្រទេសបារាំងវ័យ៥២ឆ្នាំ ។ ពិធីខួបអាពាហ៍ពិពាហ៍នេះធ្វើឡើងកាលពីថ្ងៃទី២៧ ឧសភា ឆ្នាំ២០១៧ ស្របនឹងពិធីឡើងគេហដ្ឋានថ្មីនៅបុរីមង្គលភ្នំពេញ ។
អ្នកនាងទេព បុទុមបូផល វ័យ៣៧ឆ្នាំ ឱ្យដឹងថា នាងស្រឡាញ់គ្នាជាមួយស្វាមីវ័យចំណាស់៣ឆ្នាំទើបរៀបការ ។ នាងនិងស្វាមីបានរៀបការនៅប្រទេសបារាំងតាមបែបអឺរ៉ុប ដូច្នេះហើយនឹងរៀបចំមង្គលការតាមប្រពៃណីខ្មែរវិញម្តង ។
ក្រោយរៀបអាពាហ៍ពិះពាហ៍១៥ឆ្នាំមកនេះ អ្នកនាងទេព បុទុមបូផល មានកូនពីរនាក់ ប្រុស២ ដោយកូនបងអាយុ១៥ឆ្នាំ និងប្អូនអាយុ៦ឆ្នាំ ។
រយៈពេល១៥ឆ្នាំកន្លងមកទេព បុទុមបូផលឱ្យដឹងថា ស្វាមីមើលថែថ្នាក់ថ្នមនាងទាំងដាំស្ល និងការងារផ្ទះ មិនឱ្យនាងខ្វល់ចិត្តទេ ។ នាងអាណិតស្វាមីក្រោយវះកាត់បេះដូងកាលពីពីរឆ្នាំមុន ហើយគ្រូពេទ្យឱ្យទៅនៅបារាំងវិញ ព្រោះទីនោះត្រជាក់អាចជួយសុខភាពបាន ។ ដូច្នេះហើយទោះជានាងមិនចេះនៅបារាំងក៏សុខចិត្តតាំងជំហរមើលថែប្តី ។ ពេលនៅបារាំងដោយសារត្រជាក់ពេកបណ្តាលឱ្យនាងហូរឈាមច្រមុះ ហើយបានប្តីថែទាំ ។ នាងនឹងទៅបារាំងវិញនៅចុងឆ្នាំនេះ ។
ទេព បុទុមបូផល អតីតជាតារាកំប្លែងក្នុងក្រុមនាយវីតាមីនសេ ។ នាងតែងតែចូលរួមសម្តែងក្នុងកម្មវិធីប្រគំតន្ត្រីនៅទូរទស្សន៍បាយ័ន និងកម្មវិធី ផ្សេងៗទៀត ៕
ចែករំលែកព័តមាននេះ