ចាត់ទុកជារឿងដ៏អស្ចារ្យមួយ ក្នុងពេលដែលក្រុមសៀក នៃអង្គការហ្វាពន្លឺសិល្បៈ បានបំបែកកំណត់ត្រារបស់ខ្លួនពីការសម្តែងរយៈពេលយូរជាងគេ សម្រាប់ការបំបែកកំណត់ត្រាពិភពលោក Guinness World Records
រាជធានីភ្នំពេញ ៖ ចាត់ទុកជារឿងដ៏អស្ចារ្យមួយ ក្នុងពេលដែលក្រុមសៀក នៃអង្គការហ្វាពន្លឺសិល្បៈ បានបំបែកកំណត់ត្រារបស់ខ្លួនពីការសម្តែងរយៈពេលយូរជាងគេ សម្រាប់ការបំបែកកំណត់ត្រាពិភពលោក Guinness World Records ។
ការសម្តែងសៀករបស់អង្គការហ្វាពន្លឺសិល្បៈ ត្រូវបានកត់ត្រាពិភពលោកហ្គីណេស បន្ទាប់ពីពួកគេបានសម្តែងជាប់គ្នារយៈពេល២៤ម៉ោង និង១០នាទី។
ជាមួយនឹងការសម្រេចជោគជ័យដ៏ធំនេះ អង្គការហ្វាពន្លឺសិល្បៈ ក៏បានបង្ហោះសារនៅលើផេកហ្វេសប៊ុកផ្លូវការរបស់ខ្លួនថា តើអ្នកនឹងធ្វើយ៉ាងណា ប្រសិនបើអ្នកទើបតែដឹងថា អ្នកបានជាប់កំណត់ត្រាពិភពលោក Guinness⁉។
ពួកយើងបានប្រារព្ធនូវពិធីជប់លៀងដ៏ពិសេស សម្រាប់អ្នកសម្ដែងទាំងអស់ដែលបានផ្តល់នូវរូបកាយ និងកម្លាំងចិត្តរបស់យើង ដើម្បីបង្កើតនូវ «កម្មវិធីសម្ដែងសៀកវែងជាងគេលើពិភពលោក» ជាផ្លូវការក្នុងរយៈពេល២៤ម៉ោង ១០ នាទី និង៣០វិនាទី‼។
ក្នុងអំឡុងពេលនៃការរីករាលដាល នៃជំងឺរាតត្បាត ហើយក៏បានឃើញពីភាពតក់ស្លុត និងសេចក្តីរីករាយនៅលើមុខរបស់ពួកគេ នៅពេលដែលពួកគេដឹងថា សុបិនដ៏ធំបំផុតរបស់ពួកគេបានក្លាយជាការពិត បន្ទាប់ពី Guinness បានបញ្ចប់នូវការវា.យតម្លៃយ៉ាងជោគជ័យក្នុងរយៈពេលមួយឆ្នាំរបស់ពួកគេដែលមាន ១៣១ទំព័រ និង ២៥វីដេអូនៃភស្តុតាង!។
ឥឡូវនេះ ពួកយើងចង់ឱ្យអ្នកអបអរសាទរជាមួយនឹងយើង! យើងកំពុងប្រារព្ធនូវកម្មវិធីកៀងគរនូវថវិកា និងការដាក់បង្ហាញពីការងារដែលពោរពេញទៅដោយភាពច្នៃប្រឌិតរបស់យើងតាមប្រព័ន្ធអ៊ីនធើរណិតនៅលើ ៖ http://bit.ly/fightforlight2022 ។ សូមចូលរួមទាំងអស់គ្នា! ហើយសូមជួយផ្សព្វផ្សាយអំពីសមិទ្ធផលនៃប្រវត្តិសាស្ត្ររបស់អង្គការមិនរកប្រាក់ចំណេញដ៏តូចមួយនេះនៅកម្ពុជា។
ដោយឡែកសម្រាប់ក្រសួងវប្បធម៌ និងវិចិត្រសិល្បៈ ក៏បានចូលរួមសម្តែងការអបអរសាទរ នូវសមិទ្ធផលដ៏អស្ចារ្យដែលសម្រេចបានដោយអង្គការហ្វាពន្លឺសិល្បៈ នាពេលនេះដែរ។ តាមរយៈផេកផ្លូវការរបស់ក្រសួងបានបង្ហោះសារថា ក្រសួងវប្បធម៌ និងវិចិត្រសិល្ប: សូមចូលរួមអបអរសាទរ ក្រុមសៀកអង្គការហ្វារពន្លឺសិល្បៈ ដែលត្រូវបានកត់ក្នុងកំណត់ត្រាពិភពលោកហ្គីណេស (Guinness World Records) ចំពោះការសម្តែងសៀកជាប់គ្នារយៈពេល ២៤ម៉ោង ១០នាទី និង៣០វិនាទី ។
ជាការកត់សម្គាល់ អង្គការហ្វារពន្លឺសិល្បៈ ត្រូវបានបង្កើតឡើងនៅក្នុងខេត្តបាត់ដំបង នៅចុងឆ្នាំ១៩៩៤ ដោយស្ថាបនិកសាស្ត្រចារ្យលោកស្រី បណ្តូល ។ អង្គការនេះ បានចាប់ផ្តើមដំណើរការនៅឆ្នាំ១៩៩៥។ អង្គការនេះ បានជួយកុមារដែលមានការលំបាកនៅក្នុងជីវិតឲ្យបានរៀនសូត្រ មានការងារធ្វើ និងបានផ្តល់ឱកាសឲ្យកុមារក្រីក្រ កុមារដែលរងគ្រោះពីការរំលោ.ភបំពាន អំពើកេងប្រវ័ញ្ច អំពើហិ.ង្សាក្នុងគ្រួសារ និងតាមផ្លូវ និងកុមារដែលមានការប្រឡូកនឹងគ្រឿងញៀ.នឲ្យបានចូលរៀនផងដែរ។
ចាប់តាំងពីឆ្នាំ១៩៩៤ មក អង្គការហ្វារ បានរៀបរៀងកម្មវិធីសិក្សារបស់ខ្លួននានា និងថែមទាំងបានពង្រីកខ្លួនទៅខេត្តសៀមរាបនៅឆ្នាំ២០១៣។ សិស្សក្នុងសាលានេះ អាចជ្រើសរើសជំនាញសិល្បៈដូចជា គូរគំនូរ គំនូរជីវចល សូនរូប តន្ត្រី របាំ សៀក និងសិល្បៈផ្នែកកាយសម្ព័ន្ធផ្សេងៗទៀត៕
ចែករំលែកព័តមាននេះ