ខេត្តបាត់ដំបង ៖ ស្របពេលជីកសិកម្មគ្រប់ប្រភេទបានហក់ឡើងថ្លៃខ្ពស់កប់ពពកជាងមួយឆ្នាំកន្លងទៅនេះ កសិករមួយចំនួននៅក្នុងខេត្តបាត់ដំបង ក៏ដូចកសិករនៅតាមបណ្ដាខេត្តដទៃទៀត បានកាត់បន្ថយយ៉ាងច្រើនក្នុងការប្រើប្រាស់ «ជីគីមី» ដាក់ដំណាំ ដោយពួកគេងាយទៅប្រើប្រាស់
«ជីអាចម៍កសិកម្ម»ជំនួសវិញ រហូតឈ្មួញលក់អាចម៍មាន់ប្រមូលលក់ស្ទើរមិនទាន់តម្រូវការកសិ
ករ ។ នេះបើតាមការកត់សម្គាល់ពីអ្នកជំនួញអាចម៍មាន់កសិកម្មដ៏ធំម្នាក់នៅបាត់ដំបង។
អ្នកស្រី ណុប សុភ័ណ្ឌ អ្នកធ្វើជំនួញអាចម៍មាន់ដ៏ធំម្នាក់បាននិយាយថា «ជីអាចម៍មាន់ចាប់ផ្ដើមត្រូវប៉ាន់នៅដើមឆ្នាំ២០២១ ។ ហើយរហូតមលដល់ពេលនេះ ខ្ញុំប្រមូលអាចម៍មាន់លក់ស្ទើរមិនទាន់ឲ្យអតិថិជនទេ ព្រោះការដឹកជញ្ជូនដាក់ឲ្យកសិករច្រើនទីតាំងពេក» ។ អ្នកស្រីបានបញ្ជាក់ថា បើតាមការកត់សម្គាល់ ជាងមួយឆ្នាំកន្លងទៅនេះ កសិករមួយចំនួនហាក់ងាយមកប្រើប្រាស់ជីអាចម៍មាន់ ជំនួសជីគីមីវិញ ។ ពីព្រោះការប្រើជីអាចម៍មាន់ដាក់ដំណាំទទួលបានទិញផលច្រើនជាងការប្រើជីគីមី ហើយធ្វើឲ្យដីធានាគុណល្អបានយូរអង្វែងទៀតផង ។
អ្នកស្រីបានប្រមូលអាចម៍មាន់កសិកម្មនេះ ដឹកលក់ឲ្យកសិករគ្រប់ទិសទី ទាំងនៅក្នុងខេត្ត និង ក្រៅខេត្តផងដែរ។ កសិករដាំឪឡឹកម្នាក់នៅស្រុកឯកភ្នំ បាននិយាយថា ឆ្នាំទៅមិញ គាត់បានកាត់បន្ថយការប្រើជីគីមីដាក់ដំណាំឪឡឹក ដោយដាក់ជំនួសវិញនូវជីអាចម៍កសិកម្ម ហើយឃើញថា ដំណាំឪឡឹកដើមល្អ ហើយទទួលបានផលច្រើនជាងការប្រើជីគីមី ។ បើតាមកសិកររូបនេះ ការប្រើជីអាចម៍មិនត្រឹមតែធ្វើឲ្យដំណាំលូតលាស់ល្អ ទទួលបានផលច្រើនប៉ុណ្ណោះទេ ថែមទាំងធ្វើឲ្យដីរក្សានូវគុណភាពល្អទៀតផង ។
ពោលគឺ ធ្វើឲ្យដីផុសល្អ មិនធ្វើឲ្យដីក្ដាំងទេ។ ដោយឡែក កសិករដាំដំឡូងមីនៅស្រុកភ្នំព្រឹកវិញ គឺ លោក មាន ចាន់ បានប្រាប់កោះសន្តិភាពថា រាប់សិបឆ្នាំកន្លងមកហើយ លោកធ្លាប់តែប្រើប្រាស់ជីគីមីដាក់ដំណាំដំឡូងមី ហើយទទួលបានផលច្រើនបំផុតត្រឹមជិត៣០តោនក្នុងមួយហិកតា។ ប៉ុន្តែនៅឆ្នាំទៅមិញនេះ គាត់បានសាកល្បងប្រើប្រាស់ជីអាចម៍មាន់កសិកម្មជំនួសវិញ ស្រាប់តែដំឡូងមីគាត់ឡើងគល់ល្អ ទទូលបានទិន្នផលខ្ពស់ជាងការប្រើជីគីមី ក្នុងមួយហិកតាទទូលបានទិន្នផលចន្លោះពី៤០ទៅ៤៥តោនឯណោះ។
លោក ចាន់ បានបញ្ជាក់ថា ដោយសារតែការប្រើជីអាចម៍ទទួលបានទិន្នផលខ្ពស់ជាងប្រើជីគីមី ឥឡូវលោកកាត់បន្ថយក្នុងការប្រើជីគីមីហើយ។ លោកបានកុម្ម៉ង់ទិញជីអាចម៍មាន់ម្ដងជាង៥០តោនទុកដាច់ដំណាំដំឡូង និងដំណាំដទៃទៀត។ ម្យ៉ាងទៀត ប្រើជីអាចម៍មាន់ចំណាយសោហ៊ុយតិចជាង ប្រើជីគីមី ហើយថែមទាំងទទូលបានផលច្រើនទៀត។ បើតាមលោកដឹងមួយរយៈនេះ មានកសិករច្រើនណាស់បានងាកទៅទិញជីកសិកម្មដាក់ដំណាំ តែនៅបន្តប្រើជីគីមីតិចតួចដែរ។ អ្នកធ្វើជំនូញជីអាចម៍មាន់ អ្នកស្រី ណុប សុភ័ណ្ឌ បាននិយាយថា កសិករបានប្រើប្រាសជីអាចម៍មាន់កសិកម្មនេះ ដាក់ទៅលើដំណាំច្រើនប្រភេទណាស់។
ដូចជាដំណាំស្រូវ ដំឡូងមី ដំណាំតាង៉ែន ដំណាំដូង និងដំណាំកសិកម្មផ្សេងៗទៀត ។ល។ អ្នកស្រីបានប្រាប់ថា អ្នកស្រីបានលក់ជីអាចម៍កសិកម្មនេះរយៈពេលបួនឆ្នាំកន្លងមកហើយ តែកាលនោះពុំសូវមានកសិករចាប់អារម្មណ៍ទិញដាក់ដំណាំទេ ទើបតែជាងមួយឆ្នាំចុងក្រោយនេះទេ ដែលកសិករសម្រុកទិញអាចម៍មាន់ដាក់ដំណាំ ដោយសារគេឃើញទទួលបានផលល្អ ។ ដង្ខៅអាចម៍មាន់រូបនេះ បានបញ្ជាក់ថា អាចម៍មាន់ដែលអ្នកស្រីលក់ឲ្យកសិករនេះ គឺប្រមូលពីតាមកសិដ្ឋានចិញ្ចឹមមាន់ធំៗរបស់ក្រុមហ៊ុននានា នៅខេត្តបាត់ដំបង និងខេត្តប៉ៃលិន។
បើនិយាយពីទីផ្សារអាចម៍មាន់វិញ អ្នកស្រី សុភ័ណ្ឌ បានឲ្យដឹងថា សព្វថ្ងៃតម្ឡៃជីអាចម៍មាន់ ក្នុង១តោនលក់ចេញតំលៃ២៥ម៉ឺនរៀល ។ អ្នកស្រីប្រមូលដឹកចេញយកទៅឲ្យម៉ូយស្ទើររាល់ថ្ងៃ តែមិនទាន់តម្រូវការម៉ូយកុម្ម៉ងទិញទេ ព្រោះការដឹកជញ្ជូនមានកំរិត មិនអាចដឹកឲ្យម៉ូយមួយកន្លែងឲ្យគ្រប់ចំនួនតែម្ដងតាមការកុម្ម៉ង់ទិញបានទេ គឺដឹកឆ្លាស់គ្នា ទើបអាចទៅរួច ។
អ្នកស្រីបានបញ្ជាក់ដែរថា បើតាមអ្នកស្រីដឹង សព្វថ្ងៃកសិករហាក់ចាប់អារម្មណ៍ច្រើនទៅលើការប្រើប្រាស់ជីអាចម៍មាន់កសិកម្ម ព្រោះចំណាយលុយតិចជាងប្រើជាជីគីមី ហើយទទួលផលច្រើន ។ អ្នកស្រីថា ក្នុងមួយថ្ងៃអ្នកស្រីអាចប្រមូលអាចម៍មាន់យ៉ាងតិចក៏បាន១០០តោនដែរ តែមានការយឿតយ៉ាងបន្តិចក្នុងការដឹកជញ្ជូន ដោយសារម៉ូយកុម្ម៉ងច្រើន។ សព្វថ្ងៃ ដឹកមិនទាន់ឲ្យម៉ូតូទេ ព្រោះអតិថិជនកុម្ម៉ង់ទិញច្រើនពេក ៕
ចែករំលែកព័តមាននេះ