ឈានដល់រដូវធ្លាក់ភ្លៀង លោកអ្នកអាចនឹងកើតមានជំងឺជាច្រើនប្រភេទ ពិសេសជំងឺផ្តាសាយ និងជំងឺគ្រុនឈាម ។ ជំងឺទាំងនេះអាចបណ្តាលឲ្យលោកអ្នកមានគ្រោះថ្នាក់ដល់ជីវិតគ្រប់ពេលវេលា បើសិនជាធ្វេសប្រហេស ។
ជាទូទៅជំងឺដែលតែងតែកើតមានក្នុងរដូវធ្លាក់ភ្លៀងនេះមានដូចជា៖
១-ជំងឺគ្រុនឈាម៖ ជាជំងឺដែលបណ្តាលមកពីមូសខ្លាខាំ និងបានស្តែងឱ្យដឹងដោយអាការក្តៅខ្លួនខ្លាំងរហូតដល់៤១អង្សាសេ ឈឺក្បាល ឈឺសាច់ដុំ, ឆ្អឹង និងសន្លាក់ ឈឺនៅខាងក្រោយភ្នែក និងកន្ទួលពេញស្បែកជាដើម ។
២-ជំងឺគ្រុនចាញ់៖ ជំងឺនេះបានស្តែងឱ្យដឹងតាមរោគសញ្ញាមួយចំនួនដូចជា គ្រុនញាក់ពីកម្រិតមធ្យមទៅធ្ងន់ ក្តៅខ្លួនខ្លាំង បែកញើសពេញខ្លួន នៅពេលសីតុណ្ហភាពរាងកាយធ្លាក់ចុះអាចឈឺក្បាល ក្អួក និងរាកជាដើម ។
៣-ជំងឺគ្រុនក្តៅ៖ សញ្ញាគ្រុនក្តៅ គឺមានអាការក្អក កណ្តាស ចុករួយខ្លួនប្រាណ ឈឺក្បាល គឺជាជំងឺផ្តាសាយ ។
៤-ជំងឺចម្លងពីចំណីអាហារ៖ អាចបណ្តាលឲ្យមានការរាករូស ពុល និងអាចមានសត្វល្អិតមួយចំនួនទៀតនៅក្នុងអាហារ ពិសេសបន្លែឆៅ ដែលទាមទារឲ្យលោកអ្នកមានការអនាម័យខ្ពស់ចំពោះចំណីអាហារមុនពេលបរិភោគ ។
៥-ជំងឺចម្លងពីទឹក៖ ដើម្បីការពារជំងឺចម្លងពីទឹក ការទទួលទានទឹកត្រូវតែជាទឹកស្អាតនិងដាំឱ្យពុះ។
៦-ជំងឺអាសន្នរោគ៖ មូលហេតុនៃជំងឺនេះគឺបណ្តាមកពីបាក់តេរី Vibrio Cholerae គឺជាអ្នកបង្កឱ្យមានជម្ងឺអាសន្នរោគ ដែលវាជាធម្មតាច្រើនរស់នៅក្នុងចំណីអាហារ ឬទឹកដែលមានមេរោគ ។ នៅពេលឆ្លងជំងឺនេះអាចបណ្តាលអ្នកជំងឺពុលនិងមានជំងឺរាករូសយ៉ាងធ្ងន់ ។
៧-ជំងឺលិតូ៖ ជាជំងឺដែលតែងតែកើតមានពេលលិចទឹកដែលបណ្តាលមកពីទឹកនោមសត្វកណ្តុរ និងមានរោគសញ្ញាដូចជា គ្រុនក្តៅ ឈឺក្បាល ឈឺសាច់ដុំ ក្អួត លឿងស្បែក ក្រហមភ្នែក ឈឺពោះ កន្ទួលលើស្បែក ។ ជំងឺនេះបើមិនបានព្យាបាលឲ្យបានត្រឹមត្រូវទេនោះ អាចបណ្តាលឲ្យខូចតម្រងនោម ថ្លើម រលាកស្រោមខួរ និងវិបត្តិផ្លូវដង្ហើម ។
ដើម្បីការពារជំងឺទាំងនេះលោកអ្នកគប្បីអនុវត្តតាមវិធីខាក្រោមនេះ៖
-រក្សាអាវភ្លៀង ឆត្រ និងស្បែកជើងលុយទឹក ជាមួយអ្នកជានិច្ច ។
-ត្រូវងូតទឹកក្រោយពីត្រូវទឹកភ្លៀង ។
-ផឹកទឹកក្តៅ ទឹកស៊ុប ទឹកដោះគោក្តៅ ។
-អនាម័យខ្លួនប្រាណ និងឧស្សាហ៍លាងដៃនឹងសាប៊ូ និងបំបាត់ដង្កូវទឹក និងជម្រកមូស ។
-ផឹកទឹកឱ្យបានច្រើនយ៉ាងតិច២លីត្រក្នុង១ថ្ងៃ មិនត្រូវរង់ចាំរហូតស្រេកទឹកទេ ។
-បរិភោគអាហារប្រកបដោយជីវជាតិនិងអនាម័យ និងចៀសវាងបរិភោគក្រោមតំណក់ទឹកភ្លៀង ។
-បរិភោគអាហារសំបូរវីតាមីនសេ(C) ត្របែក ល្ហុងទុំ ចេកទុំ ក្រូចពោធិសាត់ ស្ត្រូប៊ើរី បន្លែបែតងចាស់ដូចជាផ្ទី ស្លឹកងប់ ស្លឹកបាស ខាត់ណា សណ្តែកកួរ និងប៉េងប៉ោះជាដើម ៕
ចែករំលែកព័តមាននេះ