រាជធានីភ្នំពេញ ៖ ការសិក្សាថ្មីមួយរកឃើញថា តម្រូវការប្រើប្រាស់ផ្សារទំនើបនានានៅរាជធានីភ្នំពេញបានកើនឡើង៣%ក្នុងត្រីមាសទី១ឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ។
យោងតាមលទ្ធផលនៃការសិក្សាបឋមបង្ហាញថា តម្រូវការប្រើប្រាស់ផ្សារទំនើបបានកើនឡើងពី៧៩%កាលពីត្រីមាសទី១ឆ្នាំមុន ដល់៨២%នៅដំណាច់ត្រីមាសទី១ឆ្នាំនេះ ។ ផ្ទុយទៅវិញ ទំហំផ្សារទំនើបនៅសល់បានកើនឡើងពី២១ដល់២៦% ក្នុងរយៈពេលដូចគ្នានេះ ។
ការសិក្សាដដែលរកឃើញថា ផ្សារទំនើបនៅរាជធានីភ្នំពេញមានចំនួន៣៤គម្រោង ក្នុងនោះកម្រិត A មាន១២គម្រោង, កម្រិត B ១០គម្រោង និងកម្រិត C ២គម្រោង ។
លោក ប៉ែន សុខគា នាយកផ្នែកវាយតម្លៃនៃក្រុមហ៊ុនប៊ុណ្ណា រៀលធីគ្រុប បានថ្លែងតាមទូរស័ព្ទនាព្រឹកថ្ងៃទី២៨ មេសា ម្សិលមិញថា៖ « កំណើននៃតម្រូវការប្រើប្រាស់ផ្សារទំនើបដោយសារកត្តាមួយចំនួនដូចជា កំណើនប្រជាសាស្ត្រ កំណើនប្រាក់ចំណូលរបស់ប្រជាពលរដ្ឋ លក្ខខណ្ឌនៃការទិញទំនិញ និងការបញ្ចុះអត្រាការប្រាក់របស់មីក្រូហិរញ្ញវត្ថុកំពុងជះឥទ្ធិពលដល់ដំណើរការនេះ»។
លោកបន្តថា ៖ « ការបន្ថយអត្រាការប្រាក់របស់រាជរដ្ឋាភិបាលអាចជួយឲ្យប្រជាពលរដ្ឋលៃលករកប្រាក់ចំណាយបាន ហើយការទិញបង់រំលស់កាន់តែងាយស្រួល ក៏កំពុងជំរុញកំណើននៃការលក់ផងដែរ » ។
តាមគម្រោង ផ្សារទំនើបធំៗចំនួនពីរទៀតនឹងបើកដំណើរការនៅឆ្នាំនេះ គឺផ្សារទំនើបParkson Mall ស្ថិតនៅតាមមហាវិថីសហព័ន្ធរុស្ស៊ី និងផ្សារទំនើបក្នុងគម្រោង Exchange Square ដែលវិនិយោគដោយក្រុមហ៊ុន Hong Kong Land ។
លោក ជ សាំង នាយកប្រតិបត្តិផ្សារទំនើបរតនាផ្លាហ្សា ឲ្យដឹងថា តម្រូវការប្រើប្រាស់បានកើនឡើងនៅឆ្នាំនេះ ដោយអត្រាប្រើប្រាស់សរុបបានកើនឡើងរហូតដល់៩៥% ដោយសារកំណើនអតិថិជននៅរាជធានីភ្នំពេញ ដែលនិយមមកលេងកម្សាន្ត និងញ៉ាំអាហារនៅតាមភោជនីយដ្ឋាននានាក្នុងផ្សារទំនើប ។
លោកបន្តថា ៖ « ខ្ញុំសង្កេតឃើញកម្លាំងទិញ ពីប្រជាពលរដ្ឋនៅតែរក្សាសភាពទ្រឹង ព្រោះផ្សារទំនើបភាគច្រើនលក់ដាច់ជាងគេលើផ្នែកចំណីអាហារ និងការកម្សាន្ត » ៕
ចែករំលែកព័តមាននេះ