រាជធានីភ្នំពេញ ៖ អ្នកជំនាញអចលនវត្ថុអន្តរជាតិនានាលើកឡើងថា ប្រទេសកម្ពុជាកំពុងទទួលបានការចាប់អារម្មណ៍ពីវិនិយោគិនអចលនទ្រព្យលំដាប់អន្តរជាតិជាទូទៅក្នុងអាស៊ាន ប្រទេសចិន និងពិភពលោក ។
រាជធានីភ្នំពេញ ៖ អ្នកជំនាញអចលនវត្ថុអន្តរជាតិនានាលើកឡើងថា ប្រទេសកម្ពុជាកំពុងទទួលបានការចាប់អារម្មណ៍ពីវិនិយោគិនអចលនទ្រព្យលំដាប់អន្តរជាតិជាទូទៅក្នុងអាស៊ាន ប្រទេសចិន និងពិភពលោក ។
លោក Tom OSullivan អគ្គនាយកគេហទំព័រ realestate.com.kh ដែលបាននិងកំពុងវិនិយោគនៅកម្ពុជា បានថ្លែងក្នុងសន្និសីទសារព័ត៌មានពិព័រណ៍អចលនទ្រព្យ ដែលនឹងរៀបចំឡើងនៅរាជធានីភ្នំពេញ ក្នុងសប្តាហ៍ទី១នាខែឧសភាខាងមុខនេះថា ប្រសិនបើធៀបនឹងប្រទេសជិតខាងក្នុងតំបន់ កម្ពុជាបានទទួលនូវកម្មសិទ្ធិស្របច្បាប់សម្រាប់ជនបរទេស និងមានកំណើនវិនិយោគយ៉ាងខ្លាំងក្លា ។
លោកបន្តថា ៖ « វិស័យអចលនទ្រព្យ និងសំណង់ និងការអភិវឌ្ឍហេដ្ឋារចនាសម្ព័ន្ធនៅតាមទីក្រុងធំៗដូចជា រាជធានីភ្នំពេញ ខេត្តព្រះសីហនុ និងខេត្តសៀមរាបកំពុងក្លាយជាសក្តានុពលសម្រាប់ការវិនិយោគ » ។
ទាក់ទងនឹងការរៀបចំពិព័រណ៍នេះ លោកTom Osullivan ថ្លែងថា ការរៀបចំពិព័រណ៍លំដាប់អន្តរជាតិនេះ នឹងធ្វើឡើងនៅសណ្ឋាគារ កាស៊ីណូណាហ្គាវើលដ៍រាជធានីភ្នំពេញ ដែលនឹងមានអ្នករកទទួលទានក្នុងវិស័យនេះប្រមាណ២ទៅ៣ពាន់នាក់ចូលរួមសិក្សាឈ្វេងយល់ ស្វែងរកដៃគូ ក៏ដូចជាព័ត៌មានជាក់លាក់ដើម្បីសម្រេចចិត្តវិនិយោគនៅកម្ពុជា ។ ពិព័រណ៍នេះនឹងមានស្តង់សរុបចំនួន៥០ ដែលត្រូវបានជួលឲ្យក្រុមហ៊ុនភ្នាក់ងារ និងក្រុមហ៊ុនវិនិយោគលើវិស័យអចលនវត្ថុនៅកម្ពុជា និងអន្តរជាតិ ។
លោកបន្ថែមថា ៖ « អ្វីដែលពិសេសសម្រាប់ព្រឹត្តិការណ៍នេះ គឺធ្វើយ៉ាងណា ទាក់ទាញអ្នកវិនិយោគអន្តរជាតិមកចូលរួមកាន់តែច្រើនដើម្បីសិក្សាឈ្វេងយល់ និងស្វែងរកឱកាសចាប់ដៃគូវិនិយោគនៅកម្ពុជា ព្រោះវិស័យអចលនវត្ថុនៅកម្ពុជានៅតែមានភាពល្អប្រសើរ ។ ប្រទេសកម្ពុជាកំពុងទទួលបានការចាប់អារម្មណ៍យ៉ាងខ្លាំងពីវិនិយោគិនអចលនទ្រព្យអន្តរជាតិជាទូទៅក្នុងតំបន់អាស៊ាន ប្រទេសចិន និងបណ្តាប្រទេសជាច្រើននៅលើពិភពលោក » ។
លោកបន្តថា គោលបំណងនៃការបង្កើតព្រឹត្តិការណ៍នេះ គឺដើម្បីបង្ហាញពីកម្ពុជា និងសក្តានុពលទីផ្សារអចលនទ្រព្យនៅកម្ពុជាទៅកាន់អ្នកក្នុងស្រុក និងអន្តរជាតិ ហើយយើងនឹងនាំមកនូវគម្រោងថ្មីមានគុណភាពខ្ពស់ អាជីវកម្មផ្សេងៗដែលមានឥទ្ធិពល និងដើរតួនាទីសំខាន់ក្នុងទីផ្សារ ។
អ្នកនាង Patricia នាយកផ្នែកទីផ្សារនៃក្រុមហ៊ុនវិនិយោគអចលនវត្ថុមានមូលដ្ឋាននៅប្រទេសសិង្ហបុរី ដែលបាននិងកំពុងវិនិយោគគម្រោងលំនៅឋាន Camhome នៅខេត្តព្រះសីហនុ ហើយក្រុមហ៊ុននេះគាំទ្រការរៀបចំពិព័រណ៍អចលនវត្ថុលំដាប់អន្តរជាតិនៅពេលខាងមុខថ្លែងថា ក្រុមហ៊ុនរបស់យើងបានមកវិនិយោគនៅកម្ពុជា តាមរយៈអចលនទ្រព្យមានតម្លៃសមរម្យសម្រាប់ទីផ្សារនេះ ដែលអាចឲ្យប្រជាពលរដ្ឋគ្រប់រូបអាចមានលទ្ធភាពទិញបាន។ អ្នកនាងបន្តថា ៖ « ទីផ្សារអចលនទ្រព្យនៅកម្ពុជានៅតែមានសក្តានុពល និងឱកាសជាច្រើនទៀតដើម្បីធ្វើការវិនិយោគ » ។
លោក ជែកគី អេង (Jackie Eng) ស្ថាបនិក និងជានាយកប្រតិបត្តិក្រុមហ៊ុន SC Capital ថ្លែងថា វិស័យអចលនទ្រព្យនៅកម្ពុជានៅតែមានភាពល្អប្រសើរ បើទោះបីជាការលក់ខុនដូ និងបុរីនានាថមថយល្បឿនក្តី ប៉ុន្តែនេះជានិន្នាការកើតមានជាទូទៅនៅតាមបណ្តាប្រទេសនានាក្នុងពិភពលោក ដែលវិស័យនេះតែងឡើងចុះដូចជាវដ្តមួយអីចឹង ហេតុនេះ ស្ថានភាពនេះគ្មានអ្វីគួរឲ្យព្រួយបារម្ភទេ ៕
ចែករំលែកព័តមាននេះ