រាជធានីភ្នំពេញ ៖ មិនទាន់ដល់ថ្ងៃទៅអូស្ត្រាលីវិញផង តែដោយសារកូនស្រីតូចពិបាកទ្រាំអាកាសធាតុស្រុកខ្មែរបាន អ្នកនាង គឹម រ៉ូហ្សា ត្រឡប់ទៅវិញមុនកំណត់ ។
តារាចម្រៀង និងសម្តែងអ្នកនាងគឹម រ៉ូហ្សាដែលមានស្វាមីនៅអូស្ត្រាលី និងទៅរស់នៅទីនោះ បានមកលេងស្រុកកំណើតច្រើនសប្តាហ៍កន្លងមកហើយ ។ រ៉ូហ្សាធ្លាប់សាងកេរ្តិ៍ឈ្មោះក្នុងពិភពសិល្បៈកាលពីប៉ុន្មានឆ្នាំមុន ។ រយៈពេលប៉ុន្មានខែមកហើយដែលនាងនាំកូនស្រីមកប្រទេសកម្ពុជាជួបជុំឪពុកម្តាយបងប្អូន និងដើរលេងកម្សាន្តនៅតំបន់នានាជុំវិញប្រទេសកម្ពុជា ។ ស្វាមីមិនបានមកជាមួយនាងទេ ព្រោះមមាញឹកការងារ ។
អតីតតារាសម្តែង និងចម្រៀងគឹម រ៉ូហ្សា មិនអាចនៅកម្ពុជាបន្តទៀតបាន ព្រោះកូនស្រីរបស់នាងនៅតូចពេកពិបាកទ្រាំអាកាសធាតុស្រុកខ្មែរបណ្តាលឱ្យឈឺជាប់រហូត ។
បញ្ជាក់ប្រាប់អ្នកយកព័ត៌មានកាលពីពេលថ្មីៗកន្លងមកអ្នកនាង គឹម រ៉ូហ្សាប្រាប់ថា នាងជិតឡើងយន្តហោះទៅអូស្ត្រាលីវិញហើយ បន្ទាប់ពីចំណាយពេលជាច្រើនអាទិត្យមកលេងប្រទេសកម្ពុជាជាមួយកូនស្រីតូច ដោយមិនមានវត្តមានស្វាមីមកជាមួយទេ ។ នេះជាលើកទី២ដែលនាងមកស្រុកកំណើតជាកន្លែងដិតដាមអនុស្សាវរីយ៍ជាច្រើន ។ នាងចាកចេញទៅរស់នៅអូស្ត្រាលី១០ឆ្នាំមកហើយ ។ នៅទីនោះក្រៅពីបំពេញតួនាទីជាស្ត្រីមេផ្ទះ នាងឆ្លៀតពេលសម្តែង ខ្លះៗដែរ ពិសេសក្នុងកម្មវិធីបុណ្យ ធំៗ ។ «ខ្ញុំមិនអាចចោលការងារសិល្បៈបានឡើយ ព្រោះខ្ញុំស្រឡាញ់ណាស់ ។
ចិត្តអត់ចង់ទៅអូស្ត្រាលីវិញទេព្រោះ១០ឆ្នាំនៅស្រុកគេ នាងខ្ញុំតែងតែនឹកស្រុកខ្មែរជានិច្ច នឹកការងារសិល្បៈដែលខំហែលឆ្លងគ្រប់រូបភាពទំរាំបានគេស្គាល់ ទើបចេះតែដក់ក្នុងចិត្តរហូតមក ។ ទៅដល់ណា ក៏នឹកប្រទេសខ្លួនដែរ» ។ អ្នកនាងគឹម រ៉ូហ្សា តាំងចិត្តត្រឡប់មកប្រទេសកម្ពុជាវិញនៅរយៈពេល២ឆ្នាំទៀត ៕
ចែករំលែកព័តមាននេះ