កង់បីដឹកយុវជនម្នាក់ទម្លាក់មុខផ្សារទួលពង្រ រួចដេកស្រែកថ្ងូរ«អូយចុកណាស់ៗ ជួយផង»
- ភ្នំពេញ
រាជធានីភ្នំពេញ ៖ យុវជនមិនស្គាល់អត្តសញ្ញាណម្នាក់មានស្នាមរបួសក្បាលនិងរាងកាយស្ទើរគ្រប់
រាជធានីភ្នំពេញ ៖ យុវជនមិនស្គាល់អត្តសញ្ញាណម្នាក់មានស្នាមរបួសក្បាលនិងរាងកាយស្ទើរគ្រប់កន្លែង ត្រូវបានគេដឹកតាមម៉ូតូកង់បី១គ្រឿងយកមកទម្លាក់ចោលនៅតាមផ្លូវបេតុងមួយកន្លែង ។ ចំណែកយុវជនរងគ្រោះខាងលើបានដេកស្រែកថ្ងូរថា«អូយចុកណាស់ៗ» លុះមួយសន្ទុះក្រោយមកក៏បានស្លា.ប់បាត់បងជីវិតតែម្តង ដោយពុំដឹងថាស្នាមរបួសលើរាងកាយយុវជនរងគ្រោះរូបនេះបណ្ដាលមកពីអ្វីឡើយ។
ហេតុការណ៍ខាងលើបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង៦ព្រឹក ថ្ងៃទី១១ ខែវិច្ឆិកា ឆ្នាំ២០២២ នៅតាមផ្លូវបេតុង ជាប់របងរោងចក្រកាត់ដេរហុងវ៉ា ទល់មុខផ្សារទួលពង្រ ស្ថិតនៅក្នុងភូមិត្រពាំងរំចេក សង្កាត់ចោមចៅទី១ ខណ្ឌពោធិសែនជ័យ រាជធានីភ្នំពេញ។
យុវជរងគ្រោះមានអាយុប្រមាណជាង២០ឆ្នាំស្លៀកខោជើងខ្លី ពណ៌ខ្មៅ ពាក់អាវយឺតដៃវែង ពណ៌ខ្មៅ និងមិនត្រូវបានស្គាល់អត្តសញ្ញាណនិងទំលំនៅនោះទេ ជនរងគ្រោះមានស្នាមរបួសដៃជើង និងបែ.កក្បាលដោយមានកន្សែងរុំរបួសក្បាលទៀតផង។
តែបើតាមស្ត្រីម្នាក់បាននិយាយថា នៅវេលាព្រឹកថ្ងៃកើតហេតុនោះ ខណៈដែលគាត់ដើរឆ្លងកាត់ចំណុចខាងលើ ស្រាប់តែមានម៉ូតូកង់បីមួយគ្រឿងបើកទៅឈប់ទីនោះ រួចអ្នកបើកបរបានលើកយុវជនរងគ្រោះដាក់ចុះឲ្យដេកនៅលើផ្លូវ ។ បន្ទាប់មកបានបើកម៉ូតូកង់បីគេចខ្លួនយ៉ាងប្រញាប់ប្រញាល់ទៅបាត់ ប៉ុន្តែមុននិងចាកចេញទៅ អ្នកបើកម៉ូតូកង់បីនោះបាននិយាយថា «យុវជនម្នាក់នេះសុំគាត់ជិះមក»។
តាមប្រភពដដែលបានប្រាប់ឲ្យដឹងបន្តទៀតថា ក្រោយពីម៉ូតូកង់បីចាកចេញទៅបាត់ យុវជនរងគ្រោះបានស្រែកថ្ងូរថា«ចុកណាស់ៗ» ព្រមទាំងស្រែកឲ្យគេឯងជួយផង ខណៈនោះបង្កឲ្យមានការភ្ញាក់ផ្អើលដល់អ្នកភូមិនាំគ្នាទៅជួយលើកឲ្យអង្គុយ ។ ប៉ុន្តែយុវជននេះអង្គុយមិនកើតឡើយ និងបាននិយាយថា«៥ពេទ្យហើយ គេមិនជួយខ្ញុំឡើយ» ហើយពេលនោះមិនទាន់សួរឈ្មោះនិងទីលំនៅផង យុវជនខាងលើក៏បានស្លា.ប់តែម្ដង។
បន្ទាប់មកប្រជាពលរដ្ឋបានរាយការណ៍ជូនអាជ្ញាធរនិង នគរបាលប៉ុស្តិ៍ចោមចៅទី១ ឲ្យចុះទៅពិនិត្យនិងផ្ដល់ដំណឹងជូននគរបាលការិយាល័យបច្ចេកទេសវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញចុះទៅធ្វើ កោសល្យវិច័យ និងបន្តស្រាវជ្រាវរកមូលហេតុនៃការស្លា.ប់ របស់យុវជនខាងលើព្រមទាំងសាច់ញាតិទៅទួលយកស.ពធ្វើបុណ្យតាមប្រពៃណី៕
ចែករំលែកព័តមាននេះ