ខេត្តប៉ៃលិន ៖ រហូតមកដល់ថ្ងៃទី០៨ ខែវិច្ឆិកា ឆ្នាំ២០២២នេះ គេសង្កេតឃើញភ្ញៀវទេសចរក្នុង ខេត្ត និងភ្ញៀវមកពីតាមបណ្តាខេត្តនានា បានចូលមកលេងកម្សាន្ត និងស្នាក់នៅក្នុងផ្ទះសំណាក់ និងសណ្ឋាគារ ព្រមទាំងនាំគ្នាទៅលេងជាលក្ខណៈគ្រួសារ នៅសួនកុមារ ទល់មុខសាលាខេត្តប៉ៃលិនយ៉ាងច្រើនកុំករ គួរឱ្យកត់សម្គាល់។
បើតាមប្រភពព័ត៌មានពីមន្ត្រីសាលាខេត្តប៉ៃលិន បានរៀបរាប់ឱ្យដឹងថា ៖ នាឱកាសបុណ្យអុំទូក អកអំបុក សំពះព្រះខែ នៅឆ្នាំ២០២២នេះ មានភ្ញៀវទេសចរចូលមកលេងកម្សាន្តក្នុងខេត្តប៉ៃលិន យ៉ាងច្រើន ដែលធ្វើឱ្យអ្នកលក់ដូរនៅតាមរមណីយដ្ឋាននានា ជាពិសេសអ្នកលក់នំចំណី ម្ហូបអាហារ និងគ្រឿងភេសជ្ជ:ផ្សេងៗ នៅលើសួនកុមារទល់មុខនឹងសាលាខេត្តប៉ៃលិនមមាញឹកយ៉ាងខ្លាំង។
ប្រភពដដែលបន្តថា នាពេលព្រឹករហូតដល់ពេលរសៀល ភ្ញៀវទេសចរនាំគ្នាដើរលេងកម្សាន្តតាមរមណីយដ្ឋានដូចជា ម្លប់សាវម៉ាវ ចំការខ្នុរ និងរមណីយដ្ឋានទឹកធ្លាក់ភ្នំខៀវ ហើយនាំគ្នាទទួលទានអាហារជួបជុំក្រុមគ្រួសារ។ រីឯនៅពេលយប់ ពួកគេនាំគ្នាដើរលេងកម្សាន្តនៅតាមវត្តអារាម ជាពិសេសនៅសួនកុមារទល់មុខនឹងសាលាខេត្តប៉ៃលិនតែម្តង។ ហើយអ្វីដែលគួរឱ្យចាប់អាម្មណ៍បំផុតនោះ នៅពេលយប់គេឃើញអាជ្ញាធរខេត្តប៉ៃលិន បានរៀបចំតុបតែងដាក់ភ្លើងបំភ្លឺតាមដងផ្លូវ បញ្ចេញជាផ្កាភ្ញីចម្រុះពណ៌គួរឱ្យចង់គយគន់ផងដែរ។
ចំណែកភ្ញៀវទេសចរម្នាក់ដែលមានឈ្មោះ សុខ សំ ភេទប្រុស អាយុ៥០ឆ្នាំ ធ្វើដំណើរមកពីខេត្តបាត់ដំបង បានប្រាប់ឱ្យដឹងថា «គាត់បាននាំក្រុមគ្រួសារមកលេងខេត្តប៉ៃលិន អស់រយៈពេល២ថ្ងៃមកហើយ ដោយពេលថ្ងៃដើរលេងនៅតាមរមណីយដ្ឋាននានាក្នុងខេត្ត លុះដល់ពេលរសៀលគាត់បានស្នាក់នៅផ្ទះបងប្អូន ដែលបន្ថយក្នុងការចំណាយលើថ្លៃផ្ទះសំណាក់ ហើយរហូតដល់ថ្ងៃទី០៩ ខែវិច្ឆិកា គាត់នឹងវិលត្រឡប់ទៅផ្ទះសម្បែងរបស់ខ្លួនវិញ»។
ភ្ញៀវទេសចររូបនេះបញ្ជាក់ថា «ការដើរលេង ពិតជាធ្វើឱ្យអាម្មណ៍ស្រស់ថ្លា និងធូរស្បើយអំពីបញ្ហាស្ត្រេស និងទុក្ខកង្វល់ ជាពិសេសធ្វើឱ្យគាត់រីករាយ និងបង្កើតអនុស្សាវរីយ៍ជាមួយកូន ចៅថែមទៀតផង»៕
ចែករំលែកព័តមាននេះ