ពលករខ្មែរជាង5ម៉ឺននាក់ មិនមានការបារម្ភពីសង្គ្រាម ខណៈឧបទ្វីបកូរ៉េឡើងកម្តៅ
រាជធានីភ្នំពេញ ៖ ទោះបីជាស្ថានការណ៍នៅឧបទ្វីបកូរ៉េកំពុងជួបបញ្ហាតានតឹងយ៉ាងណាក្តី ក៏ពលករខ្មែរដែលបម្រើការងារនៅសាធារណរដ្ឋកូរ៉េ
រាជធានីភ្នំពេញ ៖ ទោះបីជាស្ថានការណ៍នៅឧបទ្វីបកូរ៉េកំពុងជួបបញ្ហាតានតឹងយ៉ាងណាក្តី ក៏ពលករខ្មែរដែលបម្រើការងារនៅសាធារណរដ្ឋកូរ៉េ
រាជធានីភ្នំពេញ ៖ ទោះបីជាស្ថានការណ៍នៅឧបទ្វីបកូរ៉េកំពុងជួបបញ្ហាតានតឹងយ៉ាងណាក្តី ក៏ពលករខ្មែរដែលបម្រើការងារនៅសាធារណរដ្ឋកូរ៉េ បានសម្តែងនូវអារម្មណ៍ធម្មតា ។ នេះបើតាមការថ្លែង របស់លោកឯកអគ្គរាជទូតកម្ពុជា ប្រចាំនៅសាធារណរដ្ឋកូរ៉េ(កូរ៉េខាងត្បូង) ។
លោក ឡុង ឌីម៉ង់ ឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ(កូរ៉េខាងត្បូង) បានឲ្យដឹងនៅថ្ងៃទី២៤ ខែមេសាថា ទោះបីជាស្ថានការណ៍កូរ៉េខាងត្បូងនិងកូរ៉េខាងជើងកំពុងឡើងកម្តៅឬផ្ទុះសង្គ្រាមដាក់គ្នាយ៉ាងណាក្តី ក៏ពលរដ្ឋខ្មែរកំពុងបម្រើការនៅតាមបណ្តារោងចក្រ សហគ្រាស នៅតែសម្តែងអារម្មណ៍ធម្មតាមិនតក់ស្លុតនោះទេ ។
លោក ឡុង ឌីម៉ង់ បានថ្លែងប្រាប់កោះសន្តិភាពតាមប្រព័ន្ធតេឡេក្រាមថា «ទាក់ទងនឹងពលករេដែលបម្រើការងារនៅកូរ៉េខាងត្បូងនោះ គាត់អត់មានអារម្មណ៍អ្វីដែលមានការភ័យខ្លាច បារម្ភទាំងអស់ ព្រោះថាស្ថានភាពជាក់ស្តែងនៅកូរ៉េខាងត្បូងនេះ សូម្បីប្រជាពលរដ្ឋកូរ៉េក៏ដូចជាជនជាតិដទៃទៀត អ្នកទេសចរ អ្នករកស៊ីធ្វើការមិនមានការភ័យព្រួយទេ!» ។
លោកបន្តថា បងប្អូនពលករខ្មែរយើងប៉ុន្មានថ្ងៃនេះ គាត់អត់មានភ័យអ្វីទាំងអស់ ដោយពួកគាត់បានរៀបចំបុណ្យចូលឆ្នាំទទួលទេវតាឆ្នាំថ្មីស្ទើរតែរាល់សប្តាហ៍ ។ ដូច្នេះ សតិអារម្មណ៍របស់គាត់គ្មានការបារម្ភ ។ ពិតណាស់ ទោះបីជាមានការសួរនាំពីស្ថានការណ៍នៅកូរ៉េយ៉ាងណាក្តី តែស្ថានការណ៍ជាក់ស្តែងមិនមានការព្រួយបារម្ភនោះទេ ។
លោកឯកអគ្គរាជទូតបញ្ជាក់ថា «យើងខ្ញុំជាស្ថានទូតនេះ បើមានបញ្ហាអ្វីនឹងដឹង ព្រោះថាយើងធ្វើការជាមួយបណ្តាស្ថានទូតទាំងអស់ និងជាមួយរដ្ឋាភិបាលសាធារណរដ្ឋកូរ៉េ ពិសេសតាមរយៈក្រសួងការបរទេសកូរ៉េ យើងកំពុងធ្វើការតាមដានសភាពការណ៍នៃការវិវត្តន៍ស្ថានការណ៍កូរ៉េនេះណាស់ ។ ដូច្នេះពេលមានបញ្ហាអ្វីខាងកូរ៉េនឹងទាក់ទងមកយើង អ៊ីចឹង រហូតមកដល់ពេលនេះយើងគ្មានអ្វីដែលត្រូវការត្រៀមលក្ខណៈនោះទេ ។ បងប្អូនខ្មែរនៅមានលក្ខណៈធម្មតា» ។
ទោះបីស្ថានការណ៍នៅកូរ៉េកំពុងមានភាពតានតឹងយ៉ាងណាក្តី បើតាមមន្ត្រីការទូតកម្ពុជារូបនេះអះអាងថា រហូតមកដល់ពេលនេះគ្មានពលករខ្មែរម្នាក់ណាសុំទៅស្ថានទូតដើម្បីជួយ អន្តរាគមន៍មកស្រុកខ្មែរវិញទេ គឺលើកលែងតែពួកគាត់ចប់អាណត្តិ ឬបាត់លិខិតឆ្លងដែន ឬសុំទៅលេងស្រុក ឬទៅបុណ្យទាន ។ ផ្ទុយទៅវិញ ក្នុងករណីសុំដើម្បីមកស្រុកដោយសារខ្លាចសង្គ្រាមគឺអត់មានទេ។
ជាមួយគ្នានេះ លោក ឡុង ឌីម៉ង់ បានឲ្យដឹងថា ពលករដែលទៅបម្រើការងារនៅកូរ៉េ ខាងត្បូងមានជាង៥ម៉ឺន៣ពាន់នាក់ ។ ស្ត្រីដែលរៀបការជាមួយប្តីកូរ៉េជាង១ម៉ីននាក់ និងសិស្ស-និស្សិតជាង៤០០នាក់ ។
លោកបានឲ្យដឹងទៀតថា នៅក្នុងប្រទេសកូរ៉េខាងត្បូង មានពលករបម្រើការងារតាមរោងចក្រ សហគ្រាសចំនួន១៦ប្រទេស បូកទាំងប្រទេសកម្ពុជាផង ។ ក្នុងនោះប្រទេសជាសមាជិកអាស៊ានមានចំនួន៧គឺ កម្ពុជា វៀតណាម ឡាវ ថៃ មីយ៉ាន់ម៉ា ហ្វ៊ីលីពីន និងឥណ្ឌូណេស៊ី។ ក្រៅពីនេះមានពលករពីប្រទេសផ្សេងទៀតដូចជា នេប៉ាល់ ស្រីលង្កា ប៉ាគីស្ថាន ជាដើម ។
ចំពោះចំនួនពលករដែលកំពុងបម្រើការងារនៅកូរ៉េខាងត្បូងនេះដែរ លោក ឡុង ឌីម៉ង់ បានឲ្យដឹងថា មានប្រទេសខ្លះច្រើនជាងប្រទេសកម្ពុជា និងប្រទេសខ្លះតិចជាងកម្ពុជា ។ លោកបញ្ជាក់ថា «កម្ពុជាមានពលករនៅកូរ៉េជាង៥ម៉ឺន៣ពាន់នាក់ ដែលជាកម្រិតខ្ពស់ ខណៈប្រទេស ថៃមានពលករទៅបម្រើការងារនៅកូរ៉េជាង៩ម៉ឺននាក់» ។
ស្ថានការណ៍នៅកូរ៉េខាងត្បូងកំពុងតែក្តៅ ដោយសារតែកូរ៉េខាងជើងបានប្រកាសនឹងធ្វើសង្គ្រាមជាមួយបណ្តាប្រទេសដែលគាំទ្រកូរ៉េខាងត្បូង ។ បន្ទាប់ពីឃើញស្ថានការណ៍នៅឧបទ្វីបកូរ៉េមានភាពតានតឹងនោះ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ លោក អ៊ិត សំហេង ព្រមទាំងមន្ត្រីក្រោមឱវាទជាច្រើនរូបទៀត បានធ្វើទស្សនកិច្ចនៅប្រទេសកូរ៉េខាងត្បូងមួយរយៈ ដើម្បីចង់ដឹងពីស្ថានការណ៍របស់ពលករកម្ពុជានៅទីនោះ ។
ក្នុងដំណើរទស្សនកិច្ចនេះដែរ លោករដ្ឋមន្ត្រីបានជួបជាមួយមន្ត្រីជាន់ខ្ពស់កូរ៉េ ព្រមទាំប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរនៅទីនោះ ដោយមានការរាំលេងយ៉ាងសប្បាយរីករាយជាមួយពលករខ្មែរ ដែលកំពុងបម្រើការងារនៅកូរ៉េខាងត្បូងនោះផង ៕
ចែករំលែកព័តមាននេះ