ប្រជាពលរដ្ឋមានការព្រួយបារម្ភដោយឃើញច្រាំងទន្លេមេគង្គ បានបាក់ជាបន្តបន្ទាប់នៅភូមិពាមក្រៅ ឃុំពាមកោះស្នា ស្រុកស្ទឹងត្រង់ ។ ក្រោយពីទទួលដំណឹងនេះភ្លាម
ខេត្តកំពង់ចាម ៖ ប្រជាពលរដ្ឋមានការព្រួយបារម្ភដោយឃើញច្រាំងទន្លេមេគង្គ បានបាក់ជាបន្តបន្ទាប់នៅភូមិពាមក្រៅ ឃុំពាមកោះស្នា ស្រុកស្ទឹងត្រង់ ។ ក្រោយពីទទួលដំណឹងនេះភ្លាម ឯកឧត្តម អ៊ុន ចាន់ដា អភិបាលខេត្ត និងសហការី បានអញ្ជើញចុះទៅពិនិត្យដោយផ្ទាល់ ដើម្បីរកវិធានការទប់ស្កាត់កុំឲ្យបាក់បន្តទៀតដល់ផ្ទះប្រជាពលរដ្ឋ។
លោក ទុន ស៊ាង មេឃុំពាមកោះស្នា ប្រាប់ឲ្យដឹងថា ហេតុការណ៍បាក់ច្រាំងទន្លេនេះ បានកើតឡើងនៅវេលាម៉ោង៩យប់ ថ្ងៃទី៥ ខែវិច្ឆិកា ឆ្នាំ២០២២ នៅក្រោយផ្ទះរបស់ឈ្មោះឌី ប៊ីត ភេទប្រុស អាយុ៦៩ឆ្នាំ នៅភូមិពាមក្រៅ ហើយនៅព្រឹកព្រលឹមបន្ទាប់ពីទទួលបានព័ត៌មានពីមេភូមិ រូបលោកបានចុះទៅពិនិត្យមើលពីចម្ងាយឃើញថា ច្រាំងបាក់មានជម្រៅ២៥ម៉ែត្រ និងបណ្ដោយ៦០ម៉ែត្រ ភ្លាមៗនោះលោកបានរាយការណ៍ជូនលោកអភិបាលស្រុក ដើម្បីឲ្យបានដឹងផងដែរ។
លោកមេឃុំពាមកោះស្នា បានប្រាប់បន្តថា រហូតដល់វេលាម៉ោងជាង៩ព្រឹក ថ្ងៃទី៦ ខែវិច្ឆិកា ឆ្នាំ២០២២ ឯកឧត្តម អ៊ុន ចាន់ដា អភិបាលខេត្តបានអញ្ជើញចុះមកពិនិត្យទីតាំងបាក់ច្រាំងដោយផ្ទាល់តែម្ដង។ ជាមួយនោះ ក៏បានណែនាំឲ្យអាជ្ញាធរមូលដ្ឋានត្រូវរៀបចំខ្សែព័ទ្ធទីតាំងដើម្បីចៀសវាងកុំឲ្យក្មេងៗទៅក្បែរខ្លាចធ្លាក់ចូលទឹកទន្លេបង្កគ្រោះថ្នាក់។
ក្រោមកិច្ចសហការរវាងរដ្ឋបាលខេត្ត និងក្រសួងធនធានទឹក បានចុះពិនិត្យមើលជាបន្ទាន់ដើម្បីត្រៀមលក្ខណៈសម្បត្តិបូមខ្សាច់ច្រកបាវ ដើម្បីទប់ស្កាត់កុំឲ្យបាក់ដល់លំនៅដ្ឋានរបស់ពលរដ្ឋ។
សូមបញ្ជាក់ថា កន្លែងបាក់លើកនេះមានចម្ងាយពីកន្លែងបាក់លើកមុនប្រមាណជាង២០០ម៉ែត្រ មានទំហំប្រហាក់ប្រហែលគ្នា ហើយស្ថិតនៅគម្លាតពីផ្ទះរបស់ឈ្មោះប៊ីត ប្រមាណជាង ៣០ម៉ែត្រ ប្រសិនបើច្រាំងទន្លេបាក់នោះនឹងប៉ះពាល់ដល់លំនៅដ្ឋានចំនួន៥ខ្នង។
គួររំលឹកថា ហេតុការណ៍គ្រោះធម្មជាតិបានកើតឡើងលើកមុននៅវេលាម៉ោង១និង៣០នាទីយប់ ថ្ងៃទី២៤ ខែតុលា ឆ្នាំ២០២២ រំលងអធ្រាតឈានចូលព្រឹកថ្ងៃទី២៥ ខែតុលា ឆ្នាំ២០២២ ស្ថិតនៅភូមិពាមក្រៅដែរ។
អាជ្ញាធរមូលដ្ឋាន ក៏ដូចជាស្រុក ក្នុងនោះមានលោក អ៊ុម វិបុល ប្រធានមន្ទីរធនធានទឹក និងឧតុនិយម អញ្ជើញអមដំណើរឯកឧត្តម ម៉ៅ ហាក់ អនុប្រធានអាជ្ញាធរទន្លេសាប នៃក្រសួងធនធានទឹក និងឧតុនិយម បានចុះមកដល់ភូមិពាមក្រៅ ទីតាំងដែលបានកើតឡើងបាក់ស្រុតច្រាំងទន្លេខាងលិចពីផ្ទះសម្ដេចតេជោប្រហែល៥០ម៉ែត្រ ដែលបាក់ស្រុតបណ្ដោយប្រហែល៦០ម៉ែត្រ និងជម្រៅប្រវែង១០-១៥ម៉ែត្រ បាត់ម៉ូទ័របូមទឹកចំនួន១គ្រឿង ហើយមិនទាន់មានការប៉ះពាល់ដល់ផ្ទះសម្បែងប្រជាពលរដ្ឋឡើយ។
បើតាមការពិនិត្យដោយផ្ទាល់ពីទីតាំងដែលបាក់ច្រាំងមកដល់លំនៅដ្ឋាននៅចម្ងាយប្រមាណ២០ម៉ែត្រ ប្រសិនបើមិនមានវិធានការទប់ស្កាត់ឱ្យបានទាន់ពេលទេនោះ គឺប៉ះពាល់លំនៅឋានប្រជាពលរដ្ឋចំនួន៥ខ្នង ស្មើចំនួន៥ម្ចាស់។ ហើយក្រោមការយកចិត្តទុកដាក់ពីសំណាក់អាជ្ញាធរមូលដ្ឋាន ឯកឧត្តម អ៊ុន ចាន់ដា អភិបាលខេត្ត ក៏ដូចជាស្ថាប័នក្រសួងធនធានទឹកបានឲ្យសាឡង់បូមខ្សាច់មួយគ្រឿង ព្រមទាំងក្រុមជំនាញបច្ចេកទេស ដើម្បីចុះមកបូមខ្សាច់ទប់ស្កាត់ច្រាំងកុំឲ្យបាក់បន្តទៀត។
លោក ទុន ស៊ាង មេឃុំពាមកោះស្នា បានបញ្ជាក់ថា កាលពីប៉ុន្មានឆ្នាំមុន ហេតុការណ៍បាក់ច្រាំងទន្លេនេះ បានកើតឡើងចាប់ពីត្រង់ចំណុចមុខសាលាព្រះអណ្ដូង រហូតមកដល់ពាមកោះស្នា ហើយត្រូវបានក្រុមបច្ចេកទេសរបស់ក្រសួងធនធានទឹកសហការជាមួយនឹងខេត្តរៀបចំប៉ាវ ខ្សាច់ដាក់ទប់នៅតាមច្រាំងទន្លេតាមលក្ខណៈបច្ចេកទេស គឺមិនមានបាក់ទៀតនោះទេ។
តែមកដល់ឆ្នាំ២០២២នេះ ទឹកទន្លេមេគង្គបានឡើងប្លែកខុសពីឆ្នាំកន្លងទៅ លុះពេលស្រកទៅវិញជាហេតុបណ្ដាលឱ្យបាក់ស្រុតច្រាំងទន្លេនៅភូមិពាមក្រៅ ហើយអាជ្ញាធរមូលដ្ឋាន និងជំនាញគ្រប់លំដាប់ថ្នាក់ កំពុងតែញាប់ដៃជើងដឹកសម្ភារៈបច្ចេកទេសមកកាន់ឃុំពាមកោះស្នា ដើម្បីរៀបចំបូមខ្សាច់ ដើម្បីបូមទុកច្រាំងកុំឲ្យបាក់ដល់លំនៅដ្ឋានប្រជាពលរដ្ឋនៅតាមជួរដងទន្លេ។
ចែករំលែកព័តមាននេះ