រាជធានីភ្នំពេញ ៖ រហូតមកទល់នាពេលនេះ អតីតតារាសម្តែងអ្នកនាង អ៊ុំ សុវណ្ណនី នៅបន្តការស្ងៀមស្ងាត់ ដោយមិនទាន់ចេញមុខឆ្លើយតបណាមួយនៅឡើយទេ ខណៈពេលដែលលោក មិន សារិន ហៅ ម៉ែន ដែលជាឪពុកនៅតែទទូចចង់ជួបមុខ និងសម្លេងរបស់កូនស្រីក្នុងជីវិតចុងក្រោយ។
ក្នុងនាមជាឪពុកដែលកំពុងមានជំងឺ ជាមួយនឹងភាពចាស់ជរាផងនោះ លោក មិន សារិន ហៅ ម៉ែន បានចេញមុខរំលឹកឈ្មោះកូនស្រី គឺអតីតារាសម្តែងដ៏ល្បីអ្នកនាង អ៊ុំ សុវណ្ណនី ដើម្បីលោកបានជួបមុខកូនជាលើកចុងក្រោយ ក្នុងពេលដែលកូនស្រីកំពុងសាងគ្រួសារនៅលើទឹកដីអាមេរិក។
ជុំវិញការអំពាវនាវពីសំណាក់លោក មិន សារិន តាមរយៈបណ្តាញសង្គមនាពេលនេះ គេនៅមិនទាន់ឃើញមានការឆ្លើយតបណាមួយជាវិជ្ជមានពីអ្នកនាង អ៊ុំ សុវណ្ណនី នៅឡើយទេ ហើយគេនៅមិនទាន់ដឹងថា តើអតីតតារាសម្តែងរូបនេះបានទទួលដំណឹងនេះហើយឬនៅ?។
យ៉ាងណា ជុំវិញការរំលឹកឈ្មោះអ្នកនាង អ៊ុំ សុវណ្ណនី ពីសំណាក់លោក មិន សារិន នាពេលនេះដែរ គេក៏ឃើញមានសាច់ញាតិរបស់អ្នកនាង អ៊ុំ សុវណ្ណនី បានចេញមុខបកស្រាយខ្លះៗពីប្រវត្តិ និងទំនាក់ទំនងរវាងលោកតា ម៉ែន និងអ្នកនាងកាលពីអតីតកាល។
តាមរយៈការបកស្រាយបង្ហាញថា ទំនាក់ទំនងរវាងលោក មិន សារិន និងអ្នកនាង អ៊ុំ សុវណ្ណនី ហាក់ត្រូវបានកាត់ផ្តាច់ទាំងស្រុង ក្រោយពីអ្នកនាងបានចេញទៅសាងគ្រួសារនៅលើទឹកដីអាមេរិកអស់រយៈពេលជាច្រើនឆ្នាំមកនេះ។ ការលើកឡើងនេះ ក៏បានបញ្ជាក់ពីការមិនអើពើរបស់លោក មិន សារិន ចំពោះកូនស្រីម្នាក់នេះដែរ បន្ទាប់ពីលោកមានភរិយាទី២ និងមានកូនប្រុសស្រីថ្មីទៀត ដែលកត្តានោះជាដើមចមធ្វើឲ្យទំនាក់ទំនងរវាងឪពុកកូនអ្នកទាំងពីរកាន់តែឃ្លាតឆ្ងាយស្ទើរហៅមិនលឺ។
ទោះជាបែបណា ការបកស្រាយខាងលើនេះ លោក មិន សារិន ហៅ ម៉ែន បានកើតទុក្ខមិនសុខចិត្តក៏បានចេញមុខបញ្ជាក់រឿងរ៉ាវខាងលើនេះជាថ្មី ត្បិតលោកគិតថា ការលើកឡើងខាងលើនេះ គឺមិនមែនជាការពិតឡើយ។
តាមរយៈបទសម្ភាសន៍ជាមួយលោក សាវិន ហ្វីលីព អ្នកសិល្បៈមួយរូប កាលពីពេលថ្មីនេះ អតីតតារាសម្តែងតួអង្គមេខ្មែរក្រហមក្នុងរឿង «នរក៩ជាន់» លោក មិន សារិន បានអះអាងថា «អ្នកនាង អ៊ុំ សុវណ្ណនី ពិតជាកូនរបស់លោកពិតប្រាកដមែន ប៉ុន្តែលោក និងកូនស្រីបានបែកគ្នារហូតមកដល់ពេលនេះ មិនដែលបានជួបមុខគ្នាឡើយ»។
លោកបញ្ជាក់ថា «ក្រោយបែកសម័យប៉ុល ពត លោកក៏បានដំណឹងពីភរិយា (ភរិយាទី១) របស់លោកដែលនៅរស់នោះ លោកក៏បានតាមស្វែងរក ដើម្បីបានជួបមុខប្រពន្ធ និងកូន ហើយការស្វះស្វែងរកនោះក៏បានជួបដូចបំណងដែរ»។ លោកបន្តថា «ពេលជួបគ្នានោះ លោកក៏បានសួរទៅភរិយាថា កូន (អុ្នកនាង អ៊ុំ សុវណ្ណនី) មានការងារធ្វើដែរទេ បើអត់ទេ លោកនឹងនាំចូលសិល្បៈ ហើយមុននឹងទៅនោះ កូនស្រីនឹងមានកូនដែលជាចៅរបស់លោក២នាក់ហើយ ប៉ុន្តែបានបែកបាក់គ្នា។ ដោយសារឃើញកូនកំសត់ លោកក៏បានសុំភរិយា ដើម្បីយកកូនចូលសិល្បៈ ហើយភរិយារបស់លោកក៏បានយល់ព្រម ដោយពេលនោះលោកក៏បានយករូបថតកូនស្រី អ៊ុំ សុវណ្ណនី មកអោយនាយកដ្ឋានភាពយន្តតែម្តង»។
លោកបន្ថែមថា «អំឡុងពេលនោះ គឺមានប្រទេសឆេកូស្លូវ៉ាគី បានចូលមកសហការផលិតភាពយន្តជាមួយនាយកដ្ឋានរឿង «នរក៩ជាន់» ហើយលោកក៏បាននាំកូនស្រីមកអោយគេមើលផ្ទាល់ទាំងម្តាយផង ដោយពេលនោះគេក៏ពេញចិត្ត។ ក្រោយផលិតករពេញចិត្តកូនស្រីនោះ លោករំភើបរីករាយយ៉ាងខ្លាំង ដោយគេសម្រេចយកកូនទៅសម្តែងជាតួឯកនៅក្នុងរឿងនេះ ខណៈពេលដែលលោកក៏ត្រូវបានជ្រើសរើសជាតួប៉ុលពតផងដែរ»។
លោក មិន សារិន បានលើកឡើងបន្ថែមទៀតថា «កូនស្រី អ៊ុំ សុវណ្ណនី ក៏ត្រូវបានបណ្តុះបណ្តាលបន្ថែមលើផ្នែករបាំបុរាណ ហើយបានមកស្នាក់នៅនាយកដ្ឋានភាពយន្តក្នុងអំឡុងពេលថតភាពយន្តរឿង «នរក៩ជាន់» នេះ»។ លោកបញ្ជាក់ថា «ក្នុងពេលនោះលោកមិនបានបោះបង់កូនចោលដូចការលើកឡើងនោះឡើយ ដោយសារលោកធ្វើការនៅនាយកដ្ឋានភាពយន្ត ហើយកូនស្នាក់នៅទីនេះ ហេតុនេះលោកចេញចូលមើលកូនស្រីរហូត បើទោះបីជាលោកបានមានភរិយាទី២ក៏ពិតមែន ប៉ុន្តែលោកនៅតែទទួលស្គាល់ដដែល»។
លោកបន្ថែមថា «លុះពេលថតរឿងខាងលើនេះចប់ គេក៏បាននាំរឿង និងតួអង្គទៅបង្ហាញខ្លួននៅស្រុកគេអស់រយៈពេលជាច្រើនខែ ដែលពេលនោះហើយ លោកបានបែកពីកូនស្រី អ៊ុំ សុវណ្ណនី តែម្តង។ យ៉ាងណាអស់ពេលជាច្រើនឆ្នាំ អ៊ុំ សុវណ្ណនី ក៏បានវិលចូលស្រុកខ្មែរវិញ ហើយពេលនោះក៏មានម្ចាស់ផលិតជាច្រើនបានហៅនាងថតភាពយន្តជាបន្តបន្ទាប់ រហូតធ្វើឲ្យនាងមានឈ្មោះល្បី»។
លោកបន្តថា «ចាប់ពីពេលនោះមក អ្នកនាង អ៊ុំ សុវណ្ណនី ហាក់មិនសូវបានទាក់ទងមកលោកឡើយ ប៉ុន្តែម្តាយរបស់នាងដែលជាភរិយាទី១ របស់លោក គឺបានមកលេងលោក និងភរិយាទី២ នៅច្បារអំពៅនេះដដែល»។
យ៉ាងណា បើតាមលោក មិន សារិន ហៅ ម៉ែន ថា «ក្នុងអំឡុងពេលនេះ លោកនៅតែនឹករលឹកកូនស្រី អ៊ុំ សុវណ្ណនី ដដែល ហើយលោករំលឹកឈ្មោះកូននាពេលនេះ គឺលោកមិនមានបំណងចង់បានអ្វី មានបានពីកូនស្រីឡើយ គ្រាន់តែចង់ជួបមុខកូន និងលឺសំដីចេញពីមាត់កូនថា កូនសុខសប្បាយ ឬនៅនឹកឪពុកម្នាក់នេះឬក៏អត់?»។
ជុំវិញបញ្ហាខាងលើ កោះសន្តិភាពនៅមិនទាន់អាចស្វែងរកការស្រាយបំភ្លឺពីអ្នកនាង អ៊ុំ សុវណ្ណនី ក៏ដូចជាកូនប្រុសរបស់នាងបាននៅឡើយទេ គិតមកដល់ថ្ងៃទី១ ខែវិច្ឆិកា ឆ្នាំ២០២២នេះ ខណៈពេលការសាកសួរតាមរយៈបណ្តាញសង្គមនោះ មិនមានការឆ្លើយតប។ យ៉ាងណា បើតាមការបញ្ជាក់របស់ក្មួយប្រុសរបស់អ្នកនាង អ៊ុំ សុវណ្ណនី គឺតារាសម្តែងលោក អ៊ុំ សុវណ្ណគីរី បានឲ្យដឹងថា ម្តាយមីង (អ៊ុំ សុវណ្ណនី) មិនសូវជាលេងហ្វេសប៊ុកឡើយ ហើយជាទូទៅសាច់ញាតិគាត់នៅអាមេរិក ដែលចង់ផ្ញើអ្វីទៅគាត់នោះ គឺទាក់ទងតាមរយៈអ៊ីម៉ែលប៉ុណ្ណោះ។
គួររំលឹកថា ៖ ប្រភពមួយទម្លាយអាថ៌កំបាំងនៅពីក្រោយទំនាក់ទំនងរវាងលោក មិន សារិន និងអ្នកនាង អ៊ុំ សុវណ្ណនី ៕
ចែករំលែកព័តមាននេះ