រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ថាចាប់ពីថ្ងៃទី២ ដល់៤វិច្ឆិកា តំបន់មួយចំនួនរបស់កម្ពុជានឹងចុះត្រជាក់រហូតដល់១៧អង្សាសេ គ្មានភ្លៀងធ្លាក់ តែបើមានភ្លៀងតិចតួច។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមស្ដីពីស្ថានភាពធាតុអាកាស ចាប់ពីថ្ងៃទី២ ដល់ថ្ងៃទី៨ ខែវិច្ឆិកា ឆ្នាំ២០២២ បានលើកឡើងថា ក្នុងអំឡុងមួយសប្តាហ៍ខាងមុខនេះព្រះរាជាណាចក្រកម្ពុជានឹងទទួលឥទ្ធិពលពីទ្រនុងសម្ពាធខ្ពស់(ប្រទេសចិន) និងខ្យល់បក់មកពីទិសឦសាន។
ក្រសួងធនធានទឹក បានបន្តថា ស្ថានភាពបែបនេះនឹងធ្វើឲ្យតំបន់ទំនាបកណ្តាលមាន សីតុណ្ហភាពអប្បបរមាមានពី ២១-២៣អង្សាសេ និងសីតុណ្ហភាពអតិបរមា មានពី៣១-៣៣ អង្សាសេ មិនមានភ្លៀងធ្លាក់។ បើមានក៏តិចតួចតែប៉ុណ្ណោះ។
ចំណែកតំបន់ខ្ពង់រាបសីតុណ្ហភាពអប្បបរមាមានពី ២០-២២ អង្សាសេ និងសីតុណ្ហភាពអតិបរមា មានពី ៣០-៣២អង្សាសេ មិនមានភ្លៀងធ្លាក់។
ក្រសួងបានបញ្ជាក់ថា ៖«ចាប់ពីថ្ងៃទី២-៤ ខែវិច្ឆិកា ធាតុអាកាសនឹងអាចចុះត្រជាក់នៅពេលព្រឹក នៅបណ្តាខេត្តមួយចំនួនមាន ៖ ខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ ដោយសីតុណ្ហភាពអប្បបរមាមានពី១៧-១៨អង្សាសេ»។
ដោយឡែកតំបន់មាត់សមុទ្រមានសីតុណ្ហភាពអប្បបរមា មានពី២១-២៣ អង្សាសេ និងសីតុណ្ហភាពអតិបរមាមានពី៣១-៣៣អង្សាសេ មិនមានភ្លៀងធ្លាក់។បើមានក៏តិចតួចតែប៉ុណ្ណោះ៕
ចែករំលែកព័តមាននេះ