រយៈពេលប៉ុន្មានថ្ងៃចុងក្រោយនេះ សមាជិកគណបក្សភ្លើងទៀនក៏ដូចជាគណបក្សភ្លើងទៀនផ្ទាល់បានចេញសេចក្តីថ្លែងការណ៍ជាបន្តបន្ទាប់ ដោយបានថ្កោលទោសលោក សម រង្ស៊ី អ្នកនយោបាយខ្មែរមួយរូប ដែលបានប្រមាថព្រះមហាក្សត្រជាបន្តបន្ទាប់។
អ្វីដែលគួរឱ្យចាប់អារម្មណ៍បំផុតនោះ នារីរូបស្រស់មួយរូបដែលគេស្គាល់ថា ជាប្រធានគណបក្សភ្លើងទៀន សង្កាត់បឹងកេងកងទី១ ខណ្ឌបឹងកេងកង និងមានតួនាទីជាចៅសង្កាត់រងទី២ នៅសង្កាត់បឹងកេងកងទី១ បានចេញវីដេអូអានសារថ្កោលទោស លោក សម រង្ស៊ី ដែលបន្តធ្វើការប្រមាថព្រះចេស្តាព្រះមហាក្សត្រ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាយ៉ាងធ្ងន់ធ្ងរនោះ។
សេចក្តីថ្លែងការណ៍របស់អ្នកស្រី កែប សុជាតិតា ចៅសង្កាត់រងទី២ សង្កាត់បឹងកេងកងទី១ មានខ្លឹមសារថា «ការប្រើប្រាស់ពាក្យអសុរស មកលើអង្គព្រះមហាក្សត្ររបស់ទណ្ឌិត សម រង្ស៊ី បានបង្ហាញឲ្យឃើញសារជាថ្មីម្តងទៀតអំពីសារជាតិជាជនក្បត់ជាតិ៣ជំនាន់ដែលហ៊ានពោលពាក្យប្រមាថយ៉ាងគគ្លើនធ្វើឲ្យប៉ះពាល់យ៉ាងធ្ងន់ធ្ងរដល់ព្រះកិត្តិនាមរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ដែលកំពង់គង់ប្រថាប់ជាម្លប់ដ៏ត្រជាក់ដល់ប្រជារាស្ត្រខ្មែរគ្រប់មជ្ឈដ្ឋាន និងកំពុងបំពេញព្រះរាជតួនាទីដ៏ឧត្តុងឧត្តមជាទីបំផុត ក្នុងឋានៈទ្រង់ជាព្រះប្រមុខរដ្ឋនៃព្រះរាជាណាចក្រកម្ពុជា និងជានិមិត្តរូប នៃឯកភាពជាតិ និងបូរណភាពទឹកដីនៃមាតុភូមិកម្ពុជា ហើយក៏ជាការបំពានយ៉ាងធ្ងន់ធ្ងរចំពោះមាត្រា៧ នៃរដ្ឋធម្មនុញ្ញជាច្បាប់កំពូលរបស់ប្រទេសដែលនេះ គឺជាសារធាតុដ៏ពិសពុលប្រកបដោយភាពទុច្ចរិត របស់ជនក្បត់ជាតិ៣ជំនាន់ ដែលមិនអាចលើកលែងបានឡើយ»។
ជាមួយគ្នានោះផងដែរ សម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី ២៧ ខែតុលា ម្សិលមិញនេះក៏បានបង្ហោះសារជុំវិញការចេញសេចក្តីថ្លែងការណ៍របស់គណបក្សភ្លើងទៀន ដែលមានខ្លឹមសារថា « ខ្ញុំសូមកោតសរសើរ និងថ្លែងអំណរគុណចំពោះថ្នាក់ដឹកនាំគណបក្សភ្លើងទៀនដែលបានចេញសេចក្តីថ្លែងការណ៍ថ្កោលទោសអ្នកទាំងឡាយណាដែលមានចេតនាប្រមាថព្រះមហាក្សត្រតាមការស្នើសុំរបស់ខ្ញុំ កាលពីម្សិលមិញថ្ងៃ២៦ តុលា ២០២២ នៅខេត្តកំពង់ឆ្នាំង»។
ក្រឡេកទៅមើលសេចក្តីថ្លែងការណ៍របស់គណបក្សភ្លើងទៀនវិញ បានសរសេរថា សេចក្តីថ្លែងការណ៍ «គណបក្សភ្លើងទៀន សូមប្រកាសបដិសេធចំពោះការចោទប្រកាន់នានាអំពីទំនាក់ទំនងរវាងគណបក្សភ្លើងទៀន និងលោក សម រង្ស៊ី»។
សេចក្តីថ្លែងការណ៍របស់គណបក្សភ្លើងទៀនបានបន្តថា គណបក្សភ្លើងទៀន សូមបញ្ជាក់នូវជំហររបស់ខ្លួនជាសាធារណៈថា «គណបក្សភ្លើងទៀន គោរពនូវព្រះរាជតួនាទីដ៏ខ្ពង់ខ្ពស់នៃអង្គព្រះមហាក្សត្រដែលមានចែងក្នុងរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា»។សេចក្តីថ្លែងការណ៍របស់គណបក្សភ្លើងទៀនដដែលបានបន្តថា «គណបក្សភ្លើងទៀនថ្កោលទោសចំពោះបុគ្គលទាំងឡាយណា ដែលមានចេតនាប្រមាថ ឬរំលោ.ភបំពានដល់អង្គព្រះមហាក្សត្រ និងរបបរាជានិយមអាស្រ័យរដ្ឋធម្មនុញ្ញដែលត្រូវបានការពារដោយរដ្ឋធម្មនុញ្ញនៃព្រះរាជាណាចក្រកម្ពុជា»។
«គណបក្សភ្លើងទៀន គោរព និងអនុវត្តយ៉ាងខ្ជាប់ខ្ជួន នូវរដ្ឋធម្មនុញ្ញ ច្បាប់ស្តីពីគណបក្សនយោបាយ និងច្បាប់ជាធរមាននានានៃព្រះរាជាណាចក្រកម្ពុជា ព្រមទាំងលក្ខន្តិកៈគណបក្សដែលបានតម្កល់នៅក្រសួងមហាផ្ទៃ»។ នេះជាការបញ្ជាក់ជំហររបស់គណបក្សភ្លើងទៀន និងបន្តថា «គណបក្សភ្លើងទៀន បានដំណើរការការងារ និងធ្វើសេចក្តីសម្រេចចិត្តនានា ដោយមានការទទួលខុសត្រូវក្នុងអធិបតេយ្យភាពពេញលេញរបស់ខ្លួន ស្របតាមលក្ខន្តិកៈគណបក្ស ដោយមិនស្ថិតនៅក្រោមការបង្គាប់បញ្ហាដោយផ្ទាល់ ឬប្រយោល ពីបុគ្គល ឬគណបក្សនយោបាយណាមួយឡើយ»។
បន្ថែមពីលើនេះគណបក្សភ្លើងទៀន សូមអំពាវនាវដល់ប្រជាពលរដ្ឋគ្រប់រូប ដែលមិនទាន់មានឈ្មោះក្នុងបញ្ជីឈ្មោះបោះឆ្នោតផ្លូវការរបស់គណៈកម្មាធិការជាតិរៀបចំការបោះឆ្នោត សូមអញ្ជើញទៅចុះឈ្មោះបោះឆ្នោតឲ្យបានគ្រប់ៗគ្នា ចាប់ពីថ្ងៃទី២០ ខែតុលា រហូតដល់ថ្ងៃទី០៨ ខែធ្នូ ឆ្នាំ២០២២ នៅតាមសាលាឃុំ-សង្កាត់សាម៉ី ឬនៅតាមបណ្តាភូមិសាម៉ី ដើម្បីមានសិទ្ធិបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ៕
ចែករំលែកព័តមាននេះ