តារាសម្ដែងស្រីដ៏មានប្រជាប្រិយភាព និងជាតួអង្គសម្ដែងស្រីមួយរូបក្នុងរឿង «ជីវិតក្មេងវត្ត» បានទម្លាយពីតម្លៃខ្លួនលើទីផ្សារការងារសិល្បៈក្នុងការថតខ្សែភាពយន្តមួយរឿងៗ និងរយៈពេលនៃការថតរឿង ត្រូវចំណាយពេលថតប៉ុន្មានអាទិត្យ ប៉ុន្មានខែ ឬប៉ុន្មានថ្ងៃ ទើប
រាជធានីភ្នំពេញ ៖ តារាសម្ដែងស្រីដ៏មានប្រជាប្រិយភាព និងជាតួអង្គសម្ដែងស្រីមួយរូបក្នុងរឿង «ជីវិតក្មេងវត្ត» បានទម្លាយពីតម្លៃខ្លួនលើទីផ្សារការងារសិល្បៈក្នុងការថតខ្សែភាពយន្តមួយរឿងៗ និងរយៈពេលនៃការថតរឿង ត្រូវចំណាយពេលថតប៉ុន្មានអាទិត្យ ប៉ុន្មានខែ ឬប៉ុន្មានថ្ងៃ ទើបចប់មួយរឿង។
បើយោងតាមបទសម្ភាសន៍ តារាសម្ដែងស្រី នីតា វរវង្ស បានថ្លែងប្រាប់មកកាន់សារព័ត៌មានកោះសន្តិភាព នៃកម្មវិធី60Buzz តាមរយៈសារប្រព័ន្ធអេឡិចត្រូនិច ឲ្យដឹងថា «តម្លៃខ្លួនក្នុងការសម្ដែងផលិតចេញជាភាពយន្ត ក្នុងមួយរឿងៗតម្លៃខ្លួនមិនប្រាកដ ឬហៅថាមិនទៀងនោះឡើយ គឺទៅតាមសាច់រឿងដែរ ប្រសិនបើរឿងខ្លះខ្លីថតត្រឹមមួយថ្ងៃទៅ២ថ្ងៃ ចំណាយពេលត្រឹមតែ១ម៉ោងទៅ២ម៉ោងនោះ គឺមួយរឿងកញ្ញាទទួលបានតម្លៃខ្លួន200$ ទៅ 300$ ឬអាចឈានដល់ 400$ ដែលគិតជាលុយខ្មែរ ៨០ម៉ឺនរៀល ទៅ១លាន២សែនរៀល ឬ១លាន៦សែនរៀន។
ដោយឡែក ប្រសិនបើថតរឿងវែង ដែលចំណាយពេលទៅដល់អាទិត្យ ឬខែនោះ កញ្ញា នីតា វរវង្ស បានប្រាប់ថា តម្លៃខ្លួននាងបានហក់ខ្លួនខ្ពស់បំផុត គឺខ្ទង់ពាន់ដុល្លារ។ ដោយក្នុងបទសម្ភាសន៍ កញ្ញា នីតា សូមមិនបញ្ជាក់ថា ខ្ទង់ពាន់ដុល្លារនោះ មានចំនួនប៉ុន្មានឡើយ។ តែកញ្ញាបន្តថា មួយទៀតនោះ តម្លៃខ្លួនក៏បានទៅតាមតួអង្គផងដែរ តែជារឿយៗភាគច្រើន គឺនាងដើរជាតួអង្គកាចឆ្នាស់ ច្រណែនឈ្នានីស បន្ទាប់ពីតួអង្គឯក ដែលជាតួអង្គសាកសមនឹងសមត្ថភាពទេព្យកោសល្យនាង ក៏ដូចជា ការស្រលាញ់ចូលចិត្តរបស់ខ្លួនផ្ទាល់តែម្ដង។
ថ្លែងក្នុងបទសម្ភាសន៍ តារាសម្ដែងស្រីដែលក្ដោបក្ដាប់ទីផ្សារការងារសិល្បៈក្នុងប្រទេសកម្ពុជាបានយ៉ាងច្រើន និងបានតម្លៃខ្លួនខ្ពស់មិនធម្មតារូបនេះ បានប្រាប់បន្តថា រូបនាងបានចូលប្រឡូកក្នុងវិស័យសិល្បៈអស់រយៈពេលជា១០ឆ្នាំមកហើយ តាំងពីងនាងមានអាយុខ្ទង់១០ទៅ១១ឆ្នាំមកម្ល៉េះ ហើយសាច់រឿងដែលនាងសម្ដែងដំបូងគេបង្អស់នោះ គឺរឿង «នាងផ្កាថ្កុលមាស» ដែលដើរជាតួអង្គឆ្នាស់ ឈ្មោះនាង «ឆការ» ដែលជាកូនអ្នកមីង ស្វ័យ សុជាតា ។
តារាសម្ដែងស្រី នីតា វរវង្ស តួអង្គក្នុងរឿង «ជីវិតក្មេងវត្ត» ក៏បានទម្លាយពីឧបសគ្គ និងផលវិបាក ក៏ដូចជារឿងគួរឲ្យខ្លាចមួយចំនួន ចាប់តាំងពីប្រឡូកចូលក្នុងវិថីសិល្បៈផងដែរថា «ចំពោះឧបសគ្គ និងផលវិបាក ក៏ដូចជារឿងគួរឲ្យខ្លាចដែលនាងជួប ទី១- គឺការថតរឿងខ្មោច ដែលមានគ្រប់រូបភាព មានទាំងភាពភ័យខ្លាច និងអាចប្រឈមនូវរឿងរ៉ាងផ្លូវងងឹត ឬហៅថាជំនឿ.តៗគ្នាតាំងពីបុរាណកាលមក។ ទី២- គឺការចុះថតរឿងនៅតាមខេត្ត និងត្រូវត្រឡប់មកភ្នំពេញវិញទាំងយប់ កត្តានេះព្រោះកញ្ញាជាស្រី ហើយត្រូវថតដល់យប់ៗជ្រៅម៉ោង១១ទៅ១២យប់ ទើបបានត្រឡប់មកភ្នំពេញវិញ ខណៈជិះមកក្នុងកាលៈទេសៈនោះ វាពិតជាមានទាំងឧបសគ្គ និងភាពភ័យខ្លាច ឬខ្លាចជួបនៅរឿងមិនល្អអ្វីមួយនៅតាមផ្លូវជាដើម។
តែទោះជាយ៉ាងណា កញ្ញានីតា បានប្រាប់ថា ចំពោះឧបសគ្គ និងរឿងរ៉ាវដែលធ្លាប់ជួបកន្លងមកនេះ មិនមានផលវិបាក ឬប៉ះពាល់ដល់ខ្លួនកញ្ញាខ្លាំងក្លានោះឡើយ ហើយកញ្ញាក៏មិនយកវាមកធ្វើជាឧបសគ្គ ដែលធ្វើឲ្យនាងមិនហានតស៊ូទៅមុខទៀតឡើយ។
កញ្ញាថា រឿងទាំងនេះ គឺជាហានីភ័យតិចតួចបំផុតសម្រាប់នាងជាមនុស្សស្រីមួយរូប ដែលមានការតស៊ូខ្ពស់។ មួយវិញទៀត បច្ចុប្បន្ននេះកញ្ញាក៏បានលើកឡើងបញ្ជាក់ថា ឥឡូវមានភាពងាយស្រួល និងសុវត្ថិភាពជាមុនឆ្ងាយណាស់ ហើយក៏មិនមានឧបសគ្គ ឬបញ្ហាអ្វីមួយមករារាំងដូចមុនៗឡើយ។
គួរបញ្ជាក់ផងដែរថា គិតមកទល់នឹងបច្ចុប្បន្ននេះ ក្នុងវ័យ២៥ឆ្នាំទៅហើយ តារាសម្ដែងស្រី កញ្ញា នីតា វរវង្ស ហាក់មិនអើពើរឿងគូអនាគត ឬលេចលឺដំណឹងមានគូស្នេហ៍ណាម្នាក់ក្នុងជីវិតឡើយ ខណៈក្នុងចំណោមវ័យ២០ក្រាសនេះ អ្នកសិល្បៈមួយចំនួនធំ ខ្លះភ្ជាប់ពាក្យ ខ្លះរៀបការ រីឯខ្លះទៀតឈានទៅដល់មានកូនៗអស់បាត់ទៅហើយ តែកញ្ញាវិញនូវលីវតែម្ដង។
កញ្ញា នីតា ក៏លើកឡើងយ៉ាងខ្លីថា «ក្នុងមួយជាតិ មួយជីវិត ការបានតែម្តងទេ ដូច្នេះនាងត្រូវតែជ្រើសរើសគូអនាគតដោយហ្មត់ចត់ និងឲ្យបានត្រឹមត្រូវ ដើម្បីចូលក្នុងជីវិត ក្នុងភាពជាដៃគូបន្តដំណើរជីវិតជាមួយគ្នាជាដរាបរៀងទៅ»៕
ចែករំលែកព័តមាននេះ