រាជធានីភ្នំពេញ ៖ មន្ត្រីជាន់ខ្ពស់ក្រសួងរ៉ែ និងថាមពលកម្ពុជាបានឲ្យដឹងថា កម្ពុជាត្រូវការវិនិយោគទឹកប្រាក់១ពាន់លានដុល្លារអាមេរិក ដើម្បីសម្រេចគោលដៅផ្គត់ផ្គង់ថាមពលអគ្គិសនី ដល់ប្រជាពលរដ្ឋនៅទូទាំងប្រទេសឲ្យបានត្រឹមឆ្នាំ២០២០ ។
លោក វ៉ិចទ័រ ចូណា អគ្គនាយកក្រសួងរ៉ែ និងថាមពល បានថ្លែងក្នុងសិក្ខាសាលាស្តីពីក្របខ័ណ្ឌពហុកម្រិតនៃការស្ទង់មតិជាសកលនៅកម្ពុជា «ឧបករណ៍ថ្មីសម្រាប់វាស់ស្ទង់កម្រិតនៃការទទួលបានថាមពល» នាថ្ងៃទី២៣ មីនា កន្លងមកថា ក្នុងរយៈពេល១០ឆ្នាំកន្លងមក ការផ្គត់ផ្គង់ថាមពលអគ្គិសនីនៅកម្ពុជា ទៅឲ្យអ្នកប្រើប្រាស់បានត្រឹមតែ២០%ប៉ុណ្ណោះនៃភូមិសរុបទូទាំងប្រទេស ប៉ុន្តែអាស្រ័យដោយមានកិច្ចខិតខំប្រឹងប្រែងរបស់រាជរដ្ឋាភិបាល និងការចូលរួមពីដៃគូអភិវឌ្ឍន៍នានា រួមទាំងការកៀរគរផ្នែកហិរញ្ញវត្ថុផ្ទាល់របស់រាជរដ្ឋាភិបាល បានធ្វើឲ្យការផ្គត់ផ្គង់អគ្គិសនីគិតត្រឹមចុងឆ្នាំ២០១៦កន្លងមក សម្រេចបានប្រមា៧៤,៧៤% នៃភូមិសរុបទូទាំងប្រទេស ចំនួន១៤.០៧៣ភូមិ ។ ដូចនេះ ជាគោលនយោបាយបន្ត កម្ពុជានឹងខិតខំសម្រេចឲ្យបាននូវការផ្គត់ផ្គង់អគ្គិសនី១០០% នៅត្រឹមឆ្នាំ២០២០ខាងមុខ ។
លោក វ៉ិចទ័រ ចូណា ឲ្យដឹងទៀតថា បច្ចុប្បន្ននេះ កម្ពុជាបានប្រើប្រាស់ថាមពលអគ្គិសនីដែលផលិតក្នុងស្រុកប្រមាណ៧៨% និងទិញពីប្រទេសជិតខាង២២% ។ ដូចនេះ នាពេលអនាគត កម្ពុជានឹងខិតខំផលិតថាមពលដោយខ្លួនឯងឲ្យបានយ៉ាងហោចណាស់៩០% ក្នុងនោះក៏អាចនឹងលក់ទៅឲ្យប្រទេសជិតខាងខ្លះៗផងដែរ ដោយសារថា នៅឆ្នាំ២០២០ខាងមុខ កម្ពុជានឹងប្រើប្រាស់ទុនប្រមាណ១ពាន់លានដុល្លារអាមេរិក ដើម្បីសម្រេចបានគោលដៅផ្គត់ផ្គង់ថាមពលអគ្គិសនី១០០%នេះ ។
រដ្ឋមន្ត្រីស្តីទីក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត មានប្រសាសន៍ថា ថាមពលអគ្គិសនីមានតួនាទីយ៉ាងសំខាន់ក្នុងការរួមចំណែកអភិវឌ្ឍន៍សេដ្ឋកិច្ច-សង្គម ភាពជឿទុកចិត្ត ការបង្កើនជីវភាព និងប្រាក់ចំណូលប្រជាជន ជាពិសេស ប្រជាជននៅតាមជនបទ ព្រមទាំងសម្រាប់វិស័យអប់រំ និងសុខាភិបាល ។ ដូច្នេះ ក្រសួងសេដ្ឋកិច្ច និងហិរញ្ញវត្ថុ តែងតែគាំទ្រនូវការពង្រីកសមត្ថភាពផ្គត់ផ្គង់អគ្គិសនីក្នុងប្រទេសកម្ពុជា ដើម្បីចែករំលែកនូវវិបុលភាពទៅដល់ប្រជាជននៅទូទាំងប្រទេស តាមរយៈការធ្វើឲ្យប្រជាជនតាមជនបទមានអគ្គិសនីប្រើប្រាស់គ្រប់គ្រាន់ និងតម្លៃសមរម្យស្របតាមគោលនយោបាយប្រែក្លាយកម្ពុជាឲ្យទៅជាប្រទេសឧស្សាហកម្មនាពេលអនាគត ដែលថាមពលអគ្គិសនីនេះមានតួនាទីដ៏ចម្បងបំផុតក្នុងសង្វាក់ផលិតកម្មនៃឧស្សាហកម្ម ។
នៅក្នុងពិធីប្រគល់សញ្ញាបត្រជូនដល់គរុសិស្សជិត១ពាន់នាក់នៅវិទ្យាស្ថានជាតិអប់រំ កាលពីព្រឹកថ្ងៃទី២២ មីនា សម្តេចតេជោ ហ៊ុន សែន ក៏បានថ្លែងបញ្ជាក់អំពីបញ្ហាអគ្គិសនីផងដែរ ដោយសម្តេចលើកឡើងថា ដើម្បីប្រយោជន៍ប្រជាពលរដ្ឋ មន្ត្រីរាជការ កម្លាំងប្រដាប់អាវុធ និងគ្រូបង្រៀន ក្រៅពីទទួលបានការបញ្ចុះអត្រាការប្រាក់សម្រាប់ប្រាក់កម្ចី ការបញ្ចុះតម្លៃទឹក និងការដំឡើងប្រាក់បៀវត្សរ៍នោះ សម្តេចតេជោ ក៏អះអាងពីការបញ្ចុះតម្លៃអគ្គិសនីផងដែរ ៕
ចែករំលែកព័តមាននេះ