រាជធានីភ្នំពេញ ៖ ក្រុមហ៊ុនវីតាល់ ដែលជាក្រុមហ៊ុនផលិតទឹកពិសាគុណភាពខ្ពស់ និងល្បីល្បាញលើសកម្មភាពសប្បុរសធម៌ បានពាំនាំអង្ករ២តោន និងផលិតផលទឹកពិសាវីតាល់ជាច្រើនកេសព្រមទាំងរបស់របរប្រើប្រាស់មួយចំនួនទៀត ឧបត្ថម្ភជូនដល់អ្នករត់ស៊ីក្លូទូទាំងរាជធានីភ្នំពេញប្រមាណ២០០នាក់ ។ នេះជាកម្មវិធី «ស៊ីក្លូនៃក្តីសង្ឃឹម» ដែលបានធ្វើឡើងនៅថ្ងៃទី១២ មីនា ២០១៧នៅវាលព្រះមេរុជាប់ព្រះបរមរាជវាំង ។
បើតាមការសិក្សាស្រាវជ្រាវរបស់យុវជនស្ម័គ្រចិត្ត បានបញ្ជាក់ថា អ្នករត់ស៊ីក្លូទូទាំងប្រទេសកម្ពុជា សព្វថ្ងៃមានចំនួនប្រមាណ២០០នាក់ ដែលពួកគាត់ភាគច្រើនរស់នៅក្នុងជីវភាពក្រីក្រ អ្នកខ្លះទៀតក៏គ្មានទីពឹង និងផ្ទះសំបែង ដែលស្នាក់នៅលើស៊ីក្លូរៀងរាល់យប់គួរឱ្យអាសូរ ។ ជាងនេះទៀតអ្នករត់ស៊ីក្លូទាំងអស់គឺសុទ្ធតែមានវ័យចំណាស់
ក្នុងនោះមានពីរនាក់មានអាយុជាង៨០ឆ្នាំទៅហើយ តែនៅបន្តរត់ស៊ីក្លូដើម្បីចញ្ចឹមជីវិតដដែល ។
ដោយសារតែមើលឃើញការលំបាកច្រើនសណ្ឋានបែបនេះ ទើបវីតាល់បានពាំនាំ និងគាំទ្រឱ្យមានកម្មវិធី «ស៊ីក្លូនៃក្តីសង្ឃឹម» ដើម្បីផ្តល់ការឧបត្ថម្ភដល់អ្នករត់ស៊ីក្លូទូទាំងរាជធានីក្នុងគោលបំណងចែករំលែកការលំបាកផ្នែកស្បៀងអាហារ ព្រមទាំងចង់ផ្សព្វផ្សាយដល់ស្ថាប័នពាក់ព័ន្ធដទៃទៀតងាកមកផ្តល់ជំនួយបន្ថែមចំពោះការខ្វះខាតរបស់អ៊ំៗស៊ីក្លូដែលមាននៅចំពោះមុខ ។
លោក ជុនហៀង ថាវសិទ្ធិ ប្រធានផ្នែកទីផ្សារនៃក្រុមហ៊ុន វីតាល់ បានមានប្រសាសន៍ថា ជាទូទៅប្រជាពលរដ្ឋខ្មែរទាំងអស់សុទ្ធតែបានដឹង បានលឺហើយថា ពូៗនិងអ៊ំៗរត់ស៊ីក្លូសព្វថ្ងៃគឺរស់នៅក្នុងជីវភាពកាន់តែលំបាក ព្រោះការនិយមប្រើប្រាស់ស៊ីក្លូរបស់ប្រជាពលរដ្ឋយើងមានការធ្លាក់ចុះខ្លាំងក្នុងយុគសម័យទំនើប ដែលធ្វើឱ្យចំណូលរបស់ពួកគាត់កាន់តែខ្សត់ខ្សោយ ។ ម្យ៉ាងវិញទៀត សព្វថ្ងៃនេះ អ្នករត់ស៊ីក្លូគឺភាគច្រើនជាមនុស្សមានវ័យចំណាស់ ហើយពិតជាត្រូវការជំនួយយ៉ាងខ្លាំងពីសប្បុរសជនទូទាំងប្រទេស ។ ការឧបត្ថម្ភថ្ងៃនេះប្រហែលជាមិនអាចជួយដល់ទុក្ខលំបាកទាំងស្រុងរបស់ពួកគាត់បានទេ ប៉ុន្តែវីតាល់សង្ឃឹមថា អំណោយនេះក៏អាចជួយទំនុកបម្រុងដល់ពួកគាត់មួយគ្រាផងដែរ ។ វីតាល់ឆ្លៀតឱកាសនេះសូមអំពាវនាវដល់ក្រុមហ៊ុន សប្បុរសជនដទៃទៀតចូលរួមជួយបន្តលើវិស័យស៊ីក្លូក្នុងប្រទេសចៀសវាងការឈានទៅរកការបាត់បង់ទាំងស្រុងនៅថ្ងៃអនាគតខាងមុខ។
លោកបន្តថា កម្មវិធីសប្បុរសធម៌មួយនេះអាចកើតមានឡើងគឺដោយសារតែអតិថិជនវីតាល់ ដែលជាម្ចាស់មូលនិធិ២៥៛ របស់យើង ។ លោកថា វីតាល់គឺជាផលិតផលដែលធានាបាននូវគុណភាព និងអនាម័យ ដែលបានអនុលោមតាមស្តង់ដារជាតិនិងអន្តរជាតិយោងតាមយើងយកចិត្តទុកដាក់ក្នុងការពិនិត្យគុណភាពជាចម្បង ។ ជាងនេះ
ទៀត វីតាល់គឺជាក្រុមហ៊ុនខ្មែរផលិតដោយជនជាតិខ្មែរយើងមានមនសិការជាតិ មោទនភាពជាមួយនឹងទស្សនវិស័យដើម្បីឲ្យក្រុមហ៊ុនវីតាល់ក្លាយជាក្រុមហ៊ុនជាតិដែលទទួលបានការកោតសរសើរជាងគេក្នុងវិស័យផលិតផលទឹកពិសា ។
យុវជនតាំង គឹមឡេង អ្នកដឹកនាំក្រុមយុវជនផ្តួចផ្តើមកម្មវិធីស៊ីក្លូនៃក្តីសង្ឃឹមបាននិយាយថា នេះជាលើកទី៧ហើយដែលក្រុមការងារលោកបានរៀបចំកម្មវិធីសប្បុរសធម៌សម្រាប់អ្នករត់ស៊ីក្លូទូទាំងរាជធានីនេះឡើង ។ លោកពិតជារំភើប និងសប្បាយចិត្តនៅពេលទទួលបានការគាំទ្រ និងចូលរួមកាន់តែច្រើនពីសំណាក់សាធារណជន ជាពិសេសក្រុមហ៊ុនវីតាល់បានចូលរួមជួយជ្រោមជ្រែងកម្មវិធីលើកនេះ។
លោកបន្តថា ក្រុមការងារលោកបង្កើតកម្មវិធីនេះឡើងដោយមិនបានបម្រើដល់ស្ថាប័នណាមួយឡើយ ព្រោះការធ្វើឡើងដូចដែលបានឃើញនេះ គឺកើតចេញពីសន្តានចិត្តយុវជនស្ម័គ្រចិត្តសុទ្ធសាធ ហើយចំពោះការឧបត្ថម្ភដទៃទៀតគឺបានមកពីការបរិច្ចាគពីបងប្អូនក្នុង និងក្រៅប្រទេសម្នាក់បន្តិចៗ។
គួរបញ្ជាក់ថា ទស្សនវិស័យរបស់វីតាល់មិនត្រឹមតែចង់ធ្វើសកម្មភាពសប្បុរសធម៌កាន់តែច្រើននោះទេ ក្រុមហ៊ុនក៏មានបំណង លើកទឹកចិត្តនិងផ្សព្វផ្សាយកម្មវិធីសប្បុរសធម៌នៅក្នុងប្រទេសកម្ពុជាឱ្យមានភាពកាន់តែពុះកញ្ជ្រោលផងដែរ ។ វីតាល់ប្តេជ្ញាថានឹងយកកញ្ចប់ថវិកាសប្បុរសធម៌ ដែលបានចូលរួមពីអតិថិជនទាំងអស់ ទៅធ្វើកម្មវិធីសប្បុរសធម៌ជាច្រើនបន្ថែមទៀត ដើម្បីឧទ្ទិសកុសលផលបុណ្យ ជូនត្រឡប់ទៅអតិថិជនទាំងអស់វិញ ៕
ចែករំលែកព័តមាននេះ