ស្រុកព្រៃនប់ ៖ នាព្រឹកថ្ងៃទី០៥ តុលា ២០២២ នេះ កោះសន្តិភាពបានជួបជាមួយអ្នកប្រកបរបរទូលបាយកញ្ចប់, អ្នកលក់គ្រឿងសមុទ្រ និងនៅតាមអាហារដ្ឋានមួយចំនួន ពិសេសអ្នកលក់នៅចំណុចទីប្រជុំជន…
ស្រុកព្រៃនប់ ៖ នាព្រឹកថ្ងៃទី០៥ តុលា ២០២២ នេះ កោះសន្តិភាពបានជួបជាមួយអ្នកប្រកបរបរទូលបាយកញ្ចប់, អ្នកលក់គ្រឿងសមុទ្រ និងនៅតាមអាហារដ្ឋានមួយចំនួន ពិសេសអ្នកលក់នៅចំណុចទីប្រជុំជន (វាលរេញ) ស្ថិតនៅលើផ្លូវជាតិលេខ៤បានឱ្យដឹងថា មុខរបរពួកគាត់នៅប៉ុន្មានថ្ងៃ ក្រោយពីមានការបើកឱ្យដំណើរការសាកល្បងផ្លូវល្បឿនលឿន(ភ្នំពេញ-ព្រះសីហនុ) មក បានធ្វើឱ្យចំណូលប្រចាំថ្ងៃពីការលក់ដូរមានការធ្លាក់ចុះខ្លះៗ ។ សូមរំលឹកថា កាលពីព្រឹកថ្ងៃទី១ ខែតុលា ឆ្នាំ២០២២ គឺការបើកដំណើរការសាកល្បងផ្លូវល្បឿនលឿនភ្នំពេញ-ព្រះសីហនុ ។
ពួកគាត់បានលើកឡើងថា មិនឆ្ងល់ទេពីបញ្ហាធ្លាក់ចំណូលនេះ ព្រោះពួកគាត់ដឹងច្បាស់ហើយថា កត្តាមកពីបងប្អូនអ្នកធ្វើដំណើរពួកគាត់បានជ្រើសរើសប្រើប្រាស់តាមផ្លូវល្បឿនលឿនភ្នំពេញ-ព្រះសីហនុជំនួសផ្លូវជាតិលេខ៤ ។ មួយវិញទៀត ផ្លូវទើបបើកឱ្យដំណើរការ ថែមទាំងមិនយកប្រាក់ទៀតផង ។
ទោះជាយ៉ាងនេះក្តី ពួកគាត់នៅតែមិនបន្តលក់ដូរជាធម្មតា គ្រាន់តែការកម្មង់អីវ៉ាន់ត្រូវបានកាត់បន្ថយខ្លះ ព្រោះមិនមែនស្ងាត់លក់មិនបានសោះនោះទេ គឺបានខ្លះៗដែរ ក្នុងនោះមាន អ្នកនៅមូលដ្ឋាន និងរថយន្តឈ្នួល រត់ដាក់មនុស្សតាមផ្លូវហូរហែដែរ ។
បងស្រីអ្នកលក់បង្គារម្នាក់លក់នៅជិតរង្វង់មូលសួនច្បារវាលរេញឈាងខាងកើតបានឱ្យដឹងទៀតថា មុខរបរគាត់នេះជាមុខរបរលក់តាមផ្លូវបាន តែអ្នកធ្វើដំណើរមកពីចំងាយឆ្លងកាត់មិនមែនសម្រាប់លក់ក្នុងផ្សារ ដូចនេះបើមិនមានអ្នកដំណើរឆ្លងកាត់ការលក់និងពិបាកហើយ ប៉ុន្មានថ្ងៃនេះលក់មិនសូវដាច់ទេ បានតែម៉ូយៗនៅក្បែៗនេះប៉ុណ្ណោះ ចំណែកអ្នកចំងាយវិញស្ទើរតែគ្មានទៅហើយ ។
គួរបញ្ជាក់ដែរថា ក្រោយពីមានការបើកឱ្យដំណើរការសាកល្បងលើផ្លូវល្បឿនលឿន ភ្នំពេញ-ខេត្តព្រះសីហនុ ការធ្វើចរាចរណ៍តាមបណ្តោយផ្លូវជាតិលេខ៤វិញ គឺហាក់មានសភាពស្ងប់ស្ងាត់ខ្លាំង ដោយកាត់បន្ថយការធ្វើចរាចរណ៍ជាងសព្វដង មិនថារថយន្តធុនតូច រថយន្តធុនធំនោះទេ ។ដោយឡែក ស្ថានភាពបែបនេះ បើសំឡឹងមើលនៅតាមអាហារដ្ឋាន មួយចំនួននៅស្របតាមបណ្តោយផ្លូវជាតិលេខ៤ ឬនៅទីប្រជុំជនវាលរេញនោះ គឺមានសភាពស្ងប់ស្ងាត់ទៅតាមនោះផងដែរ កាលពីថ្ងៃទី០៣ តុលា កន្លងមក ។
ចែករំលែកព័តមាននេះ