ខេត្តកំពង់ស្ពឺ ៖ ក្រោយពីមានការទាមទាររកយុត្តិធម៌អំពីម្ដាយជនរងគ្រោះដែលស្លា.ប់បាត់បង់ជីវិតទាំងស្រពិចស្រពិលនោះ ពេលនេះថ្នាក់ដឹកនាំនគរបាលខេត្ត បានបញ្ជាឲ្យមានការស្រាវជ្រាវសាជាថ្មីឡើងវិញ។ ការបញ្ជាឲ្យមានការស៊ើបអង្កេត និងស្រាវជ្រាវនេះ តាមពិតធ្វើឡើងបន្ទាប់ពីម្ដាយជនរងគ្រោះបានដាក់ពាក្យបណ្ដឹងទៅតំណាងអយ្យការ ដើម្បីស្នើសុំឲ្យនគរបាលស្រុកបសេដ្ឋ បញ្ជូនសំណុំរឿងមកអយ្យការចាត់ការបន្ត។
យោងតាមប្រភពបានឱ្យដឹងថា ក្រោយពីម្ដាយជនរងគ្រោះបានដាក់បណ្ដឹងចូលតំណាងអយ្យការរួចមក បណ្ដឹងក៏ត្រូវបានបង្វែរទៅឲ្យស្នងការដ្ឋាននគរបាលខេត្ត ជាអ្នកអនុវត្តបន្ត។
ជួបជាមួយអ្នកយកព័ត៌មានយើង ស្ត្រីមានឈ្មោះ ង៉ែត សុភាព ត្រូវជាម្ដាយជនរងគ្រោះបានប្រាប់ថា បន្ទាប់ពីពាក្យបណ្ដឹងបានដាក់ចូលដល់តំណាងអយ្យការ គឺមានស្ត្រីម្នាក់តេទូរស័ព្ទមកប្រាប់គាត់ថា សូមឱ្យគាត់ទៅទាក់ទងជាមួយលោក សម សាក់ ស្នងការរងនគរបាលខេត្តដើម្បីបំភ្លឺបណ្តឹង។
ក្នុងករណីនេះ អ្នកស្រីបានលើកឡើងថា កូនគាត់ត្រូវជនសង្ស័យមួយក្រុមដេញកា.ប់ បណ្ដាលឲ្យស្លា.ប់បាត់បង់ជីវិត តែត្រូវបាននគរបាលស្រុកបសេដ្ឋ ធ្វើរបាយការណ៍ដាក់ថាជាករណីគ្រោះថ្នាក់ចរាចរណ៍ទៅវិញ។ ព្រោះតែហេតុដូចនេះហើយ ទើបគាត់កើតទុក្ខមិនសុខចិត្ត ក៏ប្តឹងបន្តមកថ្នាក់លើ ដើម្បីស្វែងរកភាពយុត្តិធម៌ដល់កូនប្រុសរបស់គាត់ដែលបានស្លា.ប់បាត់បង់អាយុជីវិតទៅ គាត់យល់ថា អាយុជីវិតមនុស្សមិនមែនអាយុជីវិតសត្វមាន់ទានោះទេ ហេតុអ្វីបានជានគរបាលស្រុកបសេដ្ឋ ធ្វើរបាយការណ៍បែបនេះ រាយការណ៍ទៅថ្នាក់លើទៅវិញ?។
បន្ទាប់ពីមានសារព័ត៌មានក្នុងស្រុកជាច្រើនបានចុះផ្សាយអំពីករណីកូនប្រុសរបស់គាត់ ត្រូវបាននគរបាលស្រុកបសេដ្ឋ ស្ដីបន្ទោសថា រឿងប៉ុណ្ណឹងសោះ ចាំបាច់រាយការណ៍ឲ្យអ្នកកាសែតផ្សាយធ្វើអី ។ ពេលនោះគាត់ក៏តបវិញថា បើអ្នកកាសែតអត់ផ្សាយទេ កូនរបស់ខ្ញុំស្លា.ប់ទៅចប់ត្រឹមរបាយការណ៍គ្រោះថ្នាក់ចរាចរណ៍បាត់ទៅហើយ។
សូមរំលឹកថា នៅក្នុងពាក្យបណ្ដឹងលោកស្រី បានរៀបរាប់ជូនតំណាងអយ្យការថា កាលពីថ្ងៃទី ១៤ ខែសីហា ឆ្នាំ២០២២ ឈ្មោះ ជឿន អិនឈិ ភេទប្រុស អាយុ១៨ឆ្នាំ រស់នៅភូមិឃ្លោក ឃុំព្រះខែ ស្រុកបសេដ្ឋ ខេត្តកំពង់ស្ពឺ និងឈ្មោះ សុខ ចម្រើន ហៅភារៈ ភេទប្រុស អាយុ២០ឆ្នាំរស់នៅភូមិបឹងព័ទ្ឋ ឃុំស្ដុក ស្រុកគងពិសី ខេត្តកំពង់ស្ពឺ ជាកូនរបស់គាត់ ។ ត្រូវជាមិត្តភក្កិនឹងគ្នា បាននាំគ្នាជិះម៉ូតូទៅលេងម្ដាយរបស់ ជឿន អិនឈិ នៅភូមិឃ្លោក រហូតដល់យប់បន្តិចក៏ត្រឡប់ទៅកន្លែងធ្វើការវិញ លុះពេលមកដល់ពាក់កណ្ដាលផ្លូវក៏ជួបនឹងក្មេងស្ទាវមួយក្រុមជិះម៉ូតូ honda dream c125 ពណ៌ខ្មៅ គ្មានស្លាកលេខ បានបើកដេញពីក្រោយដោយបើកភ្លើងនិងស៊ីផ្លេដាក់ផង។
លោកស្រីបន្តថា ដោយបានឮគេស៊ីផ្លេដាក់យ៉ាងរន្ថើនបែបនេះ ឈ្មោះ ជឿន អ៊ិនឈិ ជាអ្នកបើកម៉ូតូក៏បានអែបកៀន ពេលនោះស្រាប់តែមិត្តភក្តិរបស់គេ សុខ ចម្រើន ហៅភារៈ (កូនរបស់គាត់) បានប្រាប់ថា «អញត្រូវគេកា.ប់» បន្ទាប់មកក៏ទ្រេតខ្លួនមកប៉ះដៃ បណ្ដាលឱ្យរេចង្កូតម៉ូតូទៅបុកជាមួយម៉ូតូមួយគ្រឿងទៀត ម៉ាកហុងដាប៊ីត ពណ៌សក្រហម ពាក់ស្លាកលេខ កំពង់ស្ពឺ IQ 47 07 បើកបរដោយឈ្មោះ ខុន ចន្ទ្រា ភេទស្រី អាយុ១៩ឆ្នាំ រស់នៅភូមិក្រាំងស្បូវ ឃុំមហាឬស្សី ស្រុកគងពិសី ខេត្តកំពង់ស្ពឺ ដែលមកបញ្ច្រាសទិសគ្នា។
ម្ដាយជនរងគ្រោះនៅតែអះអាង និងបញ្ជាក់ផងដែរថា ឈ្មោះ ជឿន អ៊ិនឈិ បានបញ្ជាក់យ៉ាងច្បាស់ថា រូបគេនឹងកូនរបស់គាត់មិនមែនគ្រោះថ្នាក់ចរាចរណ៍ដែលជិះម៉ូតូសុខៗទៅបុកជាមួយម៉ូតូដែលមកបញ្ច្រាសគ្នានោះទេ គឺមានម៉ូតូម៉ាកហុងដា C125 ពណ៌ខ្មៅ គ្មានស្លាកលេខ ជាអ្នកដេញកា.ប់ពីក្រោយ។ ហើយនៅយប់កើតហេតុ កម្លាំងនគរបាលប៉ុស្តិ៍ភារីមានជ័យ នៃអធិការដ្ឋាននគរបាលស្រុកបរសេដ្ឋ ក៏បានធ្វើការឃាត់ខ្លួនជនសង្ស័យឈ្មោះ សុង រ៉ាវីត និងឈ្មោះ បឿន ភាព បានផងដែរ ដោយមានសាក្សីជាច្រើនបានដឹងឮ រួមទាំង ជឿន អ៊ិនឈិ ម្នាក់ទៀត។
ក្រោយពេលកើតហេតុ និងឃាត់ខ្លួនបានមួយសន្ទុះ ជនសង្ស័យឈ្មោះ សុង រ៉ាវីត និងឈ្មោះ ប៊ឿន ភាព ត្រូវបាននគរបាលក្រោមការគ្រប់គ្រងរបស់លោកវរសេនីយ៍ទោ ចន សុភីត អធិការនគរបាលស្រុកបសេដ្ឋខេត្តកំពង់ស្ពឺ ធ្វើការដោះលែងឲ្យមានសេរីភាពបាត់ទៅ ដោយបានធ្វើការកែប្រែកំណត់ហេតុបទល្មើសឃា.តកម្មទៅជាបទល្មើសគ្រោះថ្នាក់ចរាចរណ៍ទៅវិញ។ហេតុនេះរូបគាត់ជាម្ដាយកើតទុក្ខពុំសុខចិត្តទើបសម្រេចចិត្តដាក់ពាក្យបណ្ដឹងទៅតាមផ្លូវច្បាប់។
ដោយឡែកយោងតាមប្រភពពីមន្ត្រីនគរបាលខេត្តឯណោះវិញ បានបង្ហើបប្រាប់ផងដែរថា ក្នុងសារសំឡេងតាមប្រព័ន្ធតេឡេក្រាម គឺលោកស្នងការនគរបាលខេត្ត បានសួរទៅលោក សម សាក់ និងលោក ចន សុភីត ថា តើលោកទាំងពីរមានអំណះអំណាងអីបានជាធ្វើរបាយការណ៍រឿងនេះដាក់ថាជារឿងគ្រោះថ្នាក់ចរាចរណ៍?
ប្រភពដដែលបានបន្តថា តាមពិតលោក សម សាក់ មិនដឹងនោះទេ ព្រោះនេះជារបាយការណ៍មូលដ្ឋានជាអ្នកផ្ញើមក ហើយអ្នកដឹងរឿងច្បាស់ គឺនាយប៉ុស្តិ៍នគរបាលរដ្ឋបាលភារីមានជ័យ ជាកូនចៅរបស់លោក ចន សុភីត ផ្ទាល់តែម្ដង។ ទោះជាយ៉ាងណា លោក សម សាក់ ក៏បានស្ទុះស្ទាដឹកនាំកម្លាំងចុះស្រាវជ្រាវយ៉ាងយកចិត្តទុកដាក់ និងកំពុងធ្វើរបាយការណ៍ដាក់ជូនថ្នាក់លើពិនិត្យ ខណៈជនសង្ស័យទាំងពីរនាក់កំពុងរត់គេចខ្លួន បន្ទាប់ពីនគរបាលស្រុកបសេដ្ឋស្ទាក់ចាប់ច្រើនដងមកហើយ តែចាប់មិនបាន។
សាច់ញាតិជនរងគ្រោះ និងអ្នកភូមិ ព្រមទាំងមហាជនដែលដឹងរឿងសង្ឃឹមថា ក្រោយពីរឿងនេះ ដល់ដៃ ជំនាញខេត្តហើយ ច្បាស់ជាអាចផ្ដល់ភាពយុត្តិធម៌ទៅជនរងគ្រោះបានជាក់ជាមិនខាន ។ ហើយក៏មានអ្នកខ្លះបានលើកឡើងថា បើចាប់បានហើយ សុំធ្វើសន្និសីទកាសែត ហើយហៅអ្នកព័ត៌មានឲ្យចូលរួមផង ដើម្បីជាការផ្សព្វផ្សាយស្នាដៃអំពីការបង្ក្រាបបទល្មើសដែលកើតឡើងក្នុងមូលដ្ឋានឲ្យមហាជនបានដឹង កុំឱ្យគេចេះតែវា.យតម្លៃថា អធិការស្រុកបសេដ្ឋ អសមត្ថភាពក្នុងការដឹកនាំកម្លាំងក្រោមបញ្ជាបង្ការទប់ស្កាត់បទល្មើសមិនអោយកើតមាន និងបង្ក្រាបមិនបាននូវហេតុការណ៍ដែលកើតឡើងជាក់ស្ដែង។
ប្រភពចុងក្រោយពីនគរបាលស្រុកបសេដ្ឋមួយរូប ក៏បានបញ្ជាក់ប្រាប់ផងដែរថា សាវតារបស់ជនសង្ស័យ គឺនគរបាលកំណត់បានរួចហើយ ឈ្មោះ សុង រ៉ាវីត ភេទប្រុស អាយុ១៨ឆ្នាំ និងឈ្មោះ បឿន ភាព ភេទប្រុស អាយុ១៨ឆ្នាំ រស់នៅភូមិត្រពាំងធ្នង់ ឃុំព្រៃវិហារ ស្រុកគងពិសី ខេត្តកំពង់ស្ពឺ កម្លាំងនគរបាលព្រហ្មទណ្ឌស្រុកបសេដ្ឋ បានចុះទៅតាមស្វែងរកចាប់ខ្លួនជនសង្ស័យច្រើនដងមកហើយ តែជនសង្ស័យហាក់បីដូចជាដឹងខ្លួនមុន និងគេចខ្លួនបាត់រហូត៕
ចែករំលែកព័តមាននេះ